Read Siyin Chin 1 Timothy 3 Bible Online

1 Timothy 3 - Siyin Chin bible

1 Timothy 3

¹A maan kam teptee khat sia: Pasal khat in pawlpi lampui khat hi tu a uuk le, ama in nasep pha mama khat lungngul ahi hi.

²Pawlpi lampuipa khat in sit baanna nei ngawl ahi tu kisamh hi; ama in zi khat bek a nei, thinpha a nei, ama le ama a ki uk zo, a cilngil ahi kul hi; zindo thiam, ngual a hil thei ahi tu kisamh hi.

³Ama sia zukham thei le a ngoltol hi ngawl het tu a, cinghin ngual taw kilem thei tu hi; ama in sum bek ngaisun ngawl het tu hi;

⁴ama in a bangkua sung pha takin uk thei tu a, a tate in zatakna takpi taw a thu a nitsak thei tu kisamh hi.

⁵Banghang ziam cile pasal khat in ama ii bangkua a uk natu zia a he buale Pathian ii pawlpi bangbangin keam thei tu ziam?

⁶Ama in kiphatsakna taw a kidim Doaimangpa bangin pua vawkna a thuak ngawl natu in, upna sungah a khanthin sa khat hi tu hi.

⁷Ama in mindai in Doaimangpa thaang sungah a awk thak ngawl natu in, pawlpi puasia a om mihingte ii zatak khat hi tu hi.

⁸Pawlpi upate zongh ngamtat pha nei tu a, a citakte ahi tu kisamh hi; amate in sapittui tam lei ne ngawl tu a, sum lam sangah duhop ngawl het tu hi;

⁹amate in upna thumaan a kipualaakte thinsung thiangtho taw kholet tu hi.

¹⁰Amate kisinsak phot tu a, a kisinna a ong le seam tak tu hi.

¹¹A zite uh zongh, ngamtat pha nei tu a, ngual ngen ngawl tu hi; amate in na theampo sungah thutuumin thumaan tu hi.

¹²Pawlpi upa khat in zi khat bek nei tu a, a tate le a bangkua sia pha takin uk zo tu hi.

¹³Pawlpi upa nasep pha takin a seamte in amate atu dinmun pha khat nga hi a, Jesus Christ sungah a upna hangsan takin son ngam tu hi.

¹⁴Hi lai kong at laitakin no kungah hong pai in hong mu pal tu, ci in lametna ka nei hi.

¹⁵Ahihang kong hai tha le hi laithakin a nungta Pathian ii pawlpi, thumaan thutak ii dinna le a panpui ahi Pathian bangkua sungah ih ngamtat natu hong hesak tu hi.

¹⁶Eite biakna in a lian thuku khat a hina sia kuama in, a nial thei buatu hi: Ama sia mihing mealin hong kilangh a, Thumaan hi ci in Thaa in lakin, vantunglalangte in mu hi. Ama sia minamte sungah a thu kihil a, leitung theampo in ama umin, tuaciang vantung ah ama kila to hi.