Read Siyin Chin 1 Timothy 4 Bible Online

1 Timothy 4 - Siyin Chin bible

1 Timothy 4

¹Thaa in thiangtho takin a sonna pan hun khaksang ciangin, mihing pawlkhat in a upna uh nusia tu hi; amate in, leilot thaa te thu ni tu a, doaite hilna zui tu hi ci hi.

²Tuabang hilciannate sia leilot theite in theamna taw kizelsak hi, amate thinsung sia thiksa taw hal bangin thi hi.

³Tuabang mihingte in zi nei ngawl pasal nei ngawlin omna le an pawlkhat neakna in khialna hi ci in hil hi. Ahihang thumaan thutak a hete le a umte in lungdamkona thungetna taw a neak tu in, tua ante sia Pathian piansak ahi hi.

⁴Pathian bitphua sa nate theampo pha hi; bangma nil tu vawk tu om ngawl hi, ahihang na theampo lungdamko thungetna taw saan tu ahi hi,

⁵banghang ziam cile tuasia Pathian kammal le thungetna in Pathian ii saan thei suaksak hi.

⁶Nangma in thaa thu ah upna kammalte taw kivaak a, thuhilna maan na zui kawmin, hi kong hilnate suapuite sungah na son nale nangma in Jesus Christ ii naseam pha khat na hi tu hi.

⁷Ahihang a son thamman ngawl, Pathian ii thu taw a kisi ngawl phua tawm taanghthute pan na kikeam ta'n. Pathian dei bang na nuntak zawk natu in kisinna nei ta'n.

⁸Pumpi thasaalin kisinna in phatna pawlkhat nei hi, ahihang thaa thu ah kisinna in, tu hun le maisang hun atu nuntakna ahikom manpha zaw pek lai hi.

⁹Hi thu in thumaan kam teptee khat hi a, up tu le a cing tak saan tu thumaan thutak ahi hi.

¹⁰Mihing theampo le, a tuan in a umte a Ngumpa, a nungta Pathian sungah lametna ih nei hu in eite in nasia takin hanciam a, na ih seam hi.

¹¹Hi lamlaknate le hilnate amate tungah sonsawn in.

¹²Khangmoi na hi hu in, kuama in na zawngsaksak heak in a, ahihang na pauna, na ngamtatna, na itna, upna le thiangthona sungah, thu umte ii ettee tu hi ta'n.

¹³Kong pai mateng in, na hun le na hanciamnate mihonpite tungah Laithiangtho simna, thuhilna le hilna in, na zangh in.

¹⁴Na sungah a om Thaa thiangtho telte na ngaingon heak in, tuate sia kamsaangte in pau a, pawlpi upate in na tungah khut hong ngak uh ciangin na nga uh ahi hi.

¹⁵Hite, na kisisin ta'n a, nangma le nangma tuate atu in kipia ta'n, tua hile na khantona ngual theampo in hong mu tu hi.

¹⁶Nangma le nangma ki en in a, na hilna zongh en in a, kidawm in. Hi bang na vawtte zom to ta'n; banghang ziam cile tuabangin na vawt le nangma le na thusonna hong za te in ngupna nga tu uh hi.