Read Siyin Chin 2 Timothy 2 Bible Online

2 Timothy 2 - Siyin Chin bible

2 Timothy 2

¹Ka tapa awng, nang na hi le, Jesus Christ taw ih kikopna tungtawnin ih nga thuthiamna hangin thahat in.

²Tetti tam mamate ii mai ah ka thansak hilnate la in, ngualdang a hil sawn thei tu a muanhuaite tungah aap in.

³Jesus Christ ii a thumaan a ngalkappa bangin ngimna thuak in,

⁴a seam lai ngalkap khat in, a mangpa diksak tu uuk a, khua mi thawthongte ii vai sungah kihel ngawl hi.

⁵Tai kidemna sungah a tai khat in ngeina a kikoite a zui buale tel saang thei ngawl hi.

⁶Lothopa khat nasep haksa a seam sia in, anlaak ciangin ama ii tel tu in an a tung masabel sia nga tu hi.

⁷Kong son teng sia na ngaisusun in, banghang ziam cile Topa in a vekpi in hong tel theisak tu hi.

⁸Lungdamna Thupha sungah a kihil, keima thuhilna ahi, thina pan a kitho kiksak David suan ahi Jesus Christ sia na phawk ta'n.

⁹Lungdamna Thupha thuhilna in ka nei hu in, ka thuak a, mihing a maw a khialte bangin thikkol taw ngawngawnin hong kikhit hi. Ahihang Pathian kammal sia thikkhau kibul ngawl hi.

¹⁰Jesus Christ tungtawn a hong pai ngupna le tawntung minthanna sia Pathian tealsa mite zongh in a nga thei natu in, na theampo ka thuak kenkon hi.

¹¹Hi thu sia thumaan hi: “Ama taw ih thi khawm zo ahile, ama taw ma in ih nungta khawm tu hi.

¹²Thuakna ih zom to suak le ama taw ih maangkhawm tu hi. Ama ih nial le, ama zongh in hong nial tu hi.

¹³Ih thumaan bua zonghin, ama sia hong thumaan top hi, banghang ziam cile ama le ama kitheam thei ngawl hi.”

¹⁴Mihingte tungah hi thu phawksak in a, tuaciang kam kinialin a kihau ngawl natu in, Pathian mai ah a ciliap huai kidop natu in hilkhol in. Hite in bangma phat tuamna hong pia ngawl a, a zate atu in siatna piangsak bek hi.

¹⁵Pathian muna ah a kicing kikipsakna na nga natu in a phabelin naseam in a, nasep tungtaang ah a maizum natu a om ngawl naseampa bang hi in, Pathian thumaan thute a maan tak a hil theipa na hi in.

¹⁶A kiihuai le a mawmawthuai kam kikupnate pan kikeam in, tuate in mihingte Pathian kung panin kikhualasak bek hi.

¹⁷Tuabang kihilnate in ih sa hong neaksak meima balhte bang ahi hi. Tuabang a hil pasal niite sia Hymenaeus le Philetus ahi uh hi.

¹⁸Amate in thumaan lampi nusia in, ih thaw kikna sia hong piang zo hi ci in a hilna uh taw mihing pawlkhatte upna lalsak hi.

¹⁹Ahitazong Pathian ii a phaa sa, a kip tawdap sia kingawksak thei ngawl hi; tuaciang tua tungah hi kammalte ki at hi. “Topa in ama ii neisate he hi,” tuaciang “A kuama po Topa ii neisa ka hi a cite in ngamtat khialna pial tu hi.”

²⁰Inn lian khat ii sungah kuang le keau a namcin in om hi: pawlkhat sia ngunn le khamh taw kivawt a, a dangte sia thing le tungman taw kivawt hi, pawlkhatte sia hun thupi sungah zak tu hi a, a dangte sia hun thawthong sungah zak tu hi.

²¹Khat po in a siate theampo panin, a kithiangsak le ama sia tupna theampo ah kizangh tu hi, banghang ziam cile ama sia a Topa atu in a kipia a taktaipa hi a, na pha sep natu sung theampo ah a kizangh tu in kinging khol hi.

²²Khangno lungngulnate pialin, tuaciangin thumaan thutang, upna, ki itna, thinnopna sia, thinsung thiangtho taw Topa tungah huna ngen a, a aute taw nga khawm tu in na hanciam in.

²³Ahihang mawmawthuai le telmeal om ngawl kam kinialnate na pial in, tuate sia kihauna taw tawp ahi sia na heak ahi hi.

²⁴Topa ii naseampa in ngual taw kihau ngawl tu hi. Ama in mihing theampo tung a thinneam tu a, a thin uai sya pha hi tu hi.

²⁵Ama a langpante a puuaphat kik ciangin, thu khualna zangh tu hi. Banghang ziam cile Pathian in amate tungah kisii kikna pia in thumaan thutak a heak natu zongh hi thei tu hi.

²⁶Tuasia zawkciangin amate sia khuaphawk tu a, ama thu nisak nuamin a manpa Doaimangpa thaang sung panin amate suakta tu uh hi.