Read Siyin Chin 2 Timothy 4 Bible Online

2 Timothy 4 - Siyin Chin bible

2 Timothy 4

¹Pathian mai le Kumpi a hong maang tu in hong pai tu, a thite le a nungtate tungah thukhen tu, Jesus Christ mai ah, ciliap huai takin kong sawl nopna panin,

²ngupna thu sia thuhilna in na nei in, (a hun a lem zong, a lem bua zong) upsak natu, teih natu, hanthot natu in thinsauna taw na thansak natu na vawt hamtang in.

³Mihingte in upna thubul maante hong za nuam nawn buatu a, amate deina uh zui in, bilthak liang a, a zaak nop uh thute a son tu syate tam vaial hong khoptua tu hun hong theng tu hi.

⁴Amate in thumaan thute ngaina pan puapial in, phuatawm thute hong ngai nuamzaw tu hi.

⁵Ahihang nangma le nangma sia hunte theampo sungah na ki uk in; ngimnate na thuak kenkon in, Lungdamna Thupha thuhilpa nasepte naseam in a, Pathian naseampa bangin nasep tu theampo na seam in.

⁶Kei ka hile sangaw biakpiak bangin hong kivawt tu hun, hong theng zo hi; kei atu in nuntakna ka nusiat tu hun hong theng hi.

⁷Tai kidemna ah ka hi thei tawpin ka hi zo a, ka tai tu tan ka tai zo hi, upna ka keamcing zo hi.

⁸Tu in thumaan thutang thukhenpa, Topa in tua Ni ciangin kei hong piak tu, Pathian mai ah thutang suana zawna thaman in kei hong ngak nginge hi. Kei bek hong pia tu hi ngawl a, ama hong pai kik tu itna taw a ngakte theampo zongh pia tu hi.

⁹Kei kungah hai ngawlin nong pai natu in, hong hanciam ta'n.

¹⁰Demas in hi leitung it zaw a, kei hong taisan zo hi. Thessalonica hong zot san hi. Crescens sia Galatia zuan hi, tuaciang Titus sia Dalmatia zuan hi.

¹¹Luke bek kei taw om lai hi. Mark samin hi sungah hong paipui ta'n, banghang ziam cile ama in ka nasep hong hu thei hi.

¹²Ephesus ah Tychicus ka paisak hi.

¹³Nong pai ciang Troas khua Carpus kungah ka nusiat ka laktong puasilh hong paipui ta'n; laibute zongh hong keng ta'n, savun taw a kivawt sia a tuanin ka dei hi.

¹⁴Thik seakpa Alexander in hong nawngkaisak mama hi. Topa in ama ii sepna sa tung pan thaman pia tu hi.

¹⁵Nang mama zongh ama tungtaang ah na kidawm in, banghang ziam cile ama in ih ngupna thuhilnate nasia takin hong langpan hi.

¹⁶Keima le keima ka kihuuk phitbel lai in, kuama in kei hong dinpui ngawl a hong taisan siat uh hi. Pathian in amate tungah na siik heak hen.

¹⁷Ahitazong Topa sia kei kungah hong om a, thahatna hong pia hi. Tuasia ciangin Gentile te theampo ii a zaak tu in ngupna thu a cing in ka thangsak thei hi; tuaciang kei sia thidaan panin hong suaktasak hi.

¹⁸Topa in kei sia siatna theampo panin, hong suatak tu a, ama Vantung Ngam sungah muanhuai takin hong lato tu hi. Ama tungah vaangletna a tawntung le a tawntungin om tahen. Amen.

¹⁹Priscilla, Aquila le Onesiphorus te innkuan tungah paupuina kong thaak hi.

²⁰Erastus sia Corinth ah taam hi. Trophimus sia a ciina ahikom Miletus ah ka nusia hi.

²¹Phalbi ma in nong pai natu hong hanciam tavun. Eubulus, Pudens, Linus le Claudia te in paupuina hong thaak hi. Tuasia bangma in Tapidaw suapui dangte zongh in hong thaak hi.

²²Topa sia nangma ii thaa taw hong om tahen. Pathian ii thuthiamna sia note theampo taw hong om tahen.