Read Siyin Chin Hebrew te 12 Bible Online

Hebrew te 12 - Siyin Chin bible

Hebrew te 12

¹Ei ih hi le, ih kiimkot ah hiza a tam mihonpi tetti ih nei hi. Tua ahikom ih mai hong khak thei na theampo le hong lencip thei mawnate vawkin, ih mai ah tai kidemna sungah thin khensatsa in tai tek tawng.

²A kipatna pan a tawp dong upna a piangsak pa, a kicingsakpa Jesus mitsuan tawng. Ama sia thinglamtee hangin thinkiam ngawl hi! Ama a ngak nginge lungdamna hangin, thinglamtee tungah maizum thina sia pha maw sa ngawl zaw a, tu in Pathian tokhum ziatsang ah to hi.

³Ama thuakna teng ngaisun vun; bangza in mawneite ii a nasia tatak etsatna thuak ziam! Tua ahikom note zongh thinkiam heak vun, hanciam vun.

⁴Banghang ziam cile mawna taw na kidona sungah thalup thuak tu dongin, na nalh tu uh kul ngawl lai buang hi.

⁵Pathian in a tate na hina uh taw hanthotna kam hong paute mangil zo nu ziam? “Ka tapa awng, Topa ii hong hil ciangin, a pha takin ngai in, hong teih ciangin thinkiam heak vun.

⁶Banghang ziam cile Topa in a itte theampo hil a, a ta bangin a saante theampo daan pia hi,” ci hi.

⁷Pa ii daan hong piak bang na thuak po vun; tua na thuakna in Pathian ii a tate bangin hong tuat a hina kiciansak hi. A pa ii daan a piak ngeingawl tapa a om ngei ziam?

⁸A tate theampo a piak bangin daan hong pia ngei bua ahile, ta tatak hi ngawlin, lamlak ta na hi uh hunlam kilangh hi.

⁹Ih leitung pate tungtaang ahile amate in daan hong pia a, eite zongh in zatakna ih pia hi. Tua ahile thaa lamsang ih Pa tungah bangza in ki aap zaw tu a, nungta zaw tu hi ziam!

¹⁰Ih leitung pate in pha a sak uh ciaciang, tawmvei sung daan hong pia hi; ahihang Pathian in, ahile, ama thianthona ih siim thei natu in eima phattuam natu a vawt ahi hi.

¹¹Eite daan hong kipiak ciangin, tua hun laitak ih lungdam natu hi ngawlin, ih hee natu hong pia hile kilawm hi. Ahihang nungsang ciangin, tuabang kitekna a thuakte in thumaan thutang nuntakna ii thinnopna thaman nga uh hi.

¹²Tua ahikom na khut uh a kha le laamto vun a, a huang vadil na khupte uh hatsak vun.

¹³Na peang a bai na sang a dam zawk natu le a kizak thei kik natu in, lamzin tang zui tawntung tavun.

¹⁴Mihing theampo taw na kilem tu hanciam vun a, a thiangtho nuntakna taw nuntak tu hanciam tavun, banghang ziam cile kuama in tua ngawl taw Topa a mu buatu hi.

¹⁵Pathian ii thuthiamna pan na heak kik ngawl natu kikeam tavun. A khaa thingkung khangto a, lalna tam mama a piangsak nguu a nei thingkung bang na hi heak vun.

¹⁶Esau bangin paktatna ahibuale thaa lamsang zawngkhalna kuama in na nei heak vun, ama in ta uzaw ii a nga tu hamphatnate theampo anneak khat taw zuak hi.

¹⁷Tua zawkciangin, na heak uh bangma, ama in a pa ii thupha saang nuam hi; ahihang ama kinolh hi, banghang ziam cile ama in ama ii a sep sate a kheal kik natu lampi sia thitui taak liangin a zon hang zong a mu thei bua hi.

¹⁸Note in Israel mite Sinai mual a zot uh bangin cii le sa ii phaw theinate ahi meikuang ahizong, khuazing le khuangial ahizong, vuipi suangval ahizong,

¹⁹lemle aw le awnging khat ahizong, tuate kung nong zuan bua uh hi. Israel mihingte in tua awnging khat a zaak uh ciangin, kammal dang a zaak ngawl natu in, thuum uh hi.

²⁰Banghang ziam cile amate in, “Nganhing khat ngawngawn in tua mual a thutha le suangtum taw hua lup kul tu hi,” ci in thupiakna sia a thuak zo bua uh hi.

²¹Tua a muna sia lauhuai leilam ahikom, Moses in “Lau in ka liing vadil hi!” ci hi.

²²Note Zion Mual le a nungta Pathian khuapi vantung Jerusalem, vantunglalang tul tam mamate omna ah nong pai zaw uh hi.

²³Note in vantung ah a min a kikhum Pathian taciilte lungdam takin a kikhopna ah nong pai uh hi. Note in mihing theampo thukhenpa Pathian kung le a kicialcingsak mihingphate ii thaa omna munah nong pai uh hi.

²⁴Thuciam thak a vawtpa Jesus kungah nong pai uh a, Abel chi ii sep sangin a phazaw pek nate hong kamciam, a kithe chi kungah nong zuan uh hi.

²⁵Tua ahikomin kidawm vun a, a sonpa sia ngai nuam ngawlin, nial heak vun. Pathian thu leitung ah a son pa nadon ngawl a, a nialte a suakta bua hi. Vantung pan hong sonpa na thusim buale bangbang suakta thei seseam tu hi ziam!

²⁶Ama aw in tua hun laitakin, leitung liingsak ahihang tu in ama in, “Leitung bek hi ngawlin, vantung zongh khatvei ma ka liingsak lai tu hi,” ci hi.

²⁷Hi kammal “khatvei ma” ci sia in bitphua sa nate ngawk zazaanin, khiin tu a, a kingawksak thei ngawl teng bek taang lai tu a hina thiang takin lak hi.

²⁸Tua ahiciang, lungdam tek tawng, banghang ziam cile eite in, a kingawk thei ngawl ngam ih nga hi. Ama lungkim tu bangin, eite in thasiana le kiitakna taw Pathian tungah lungdamko in, ama bia tek tawng;

²⁹banghang ziam cile ih Pathian sia a haltum thei meikuang tatak ahi hi.