Read Siyin Chin Hebrew te 3 Bible Online

Hebrew te 3 - Siyin Chin bible

Hebrew te 3

¹Pathian hong sapsa zongh ahi, ka Tapidaw suapuite awng! Ih pualaak upna ii Thiampi Lianbel tu in, Pathian ii a sawlpa Jesus ngaisun vun.

²Pathian ii inn sungah Moses sia a nasepna ah a thumaan bangma in, ama in hi nasep seam tu in a teal Pathian tungah thumaan hi.

³Inn khat a sa pa in tua inn sangin upatna nga zaw hi. Tuasia bangma in, Jesus sia Moses sangin vaang piakna lianzaw taw kiphu hi.

⁴Inn theampo a sa khat tek om a, ahizong na theampo a vawt pa sia Pathian ahi hi.

⁵Moses sia Pathian inn sungah naseampa bangin, thumaan hi. Tuaciangin ama in maisang a Pathian ii son tu thute son hi.

⁶Ahihang Christ sia Pathian inn uk Tapa bangin thumaan hi. Eite in, ih lametnate sungah thinletna le kimuanna ih kholet le ama inn ih hi hi.

⁷Tua ahikom Thaa Thiangtho ii cina taw kizui in, “Tuni in Pathian aw na za uh le,

⁸na taanghpupite sennealngam sungah a om uh lai, Pathian a langpan lai, Pathian a ze et uh hun lai bangin, na thin uh na sahsak heak vun.

⁹Amate in kum sawmli tawntung ka sep teng mu zo napi Kei hong ze et uh a, hong sin zazaan uh hi, Pathian in ci hi.

¹⁰Tua ahikom tua mite tungah ka thin uuk a, hi bangin ka ci hi, ‘Amate in kei tungah hong thumaan ngawl tawntung a, ka thupiakte hong nial uh hi.’

¹¹Ka thin uuk a, ‘Tawlngakna ka piak natu ngam ah amate tum ngeingawl tu hi!’ ci in: a ciliaphuai kamciamna ka vawt hi,” ci hi.

¹²Ka thu uppuite awng, a nungta Pathian kung pan na lampial ngawl natu in, no sungah kuama peuma in ngitlona thinsung le up ngawlna thin na nei ngawl natu in kidawm tavun.

¹³Laithiangtho sungah, “Tuni” a kici kammal sia a kizak thei lai teng mawna ii hong theam ngawl natu le na thin uh a sak ngawl natu in, khat le khat ni simin na kihu zawk uh kul tu hi.

¹⁴Banghang ziam cile a kipat pan ih nei kimuanna sia a tawp dongin ih kholet le ei theampo sia Christ taw a kikopte ih hi hi.

¹⁵Hisia laithiangtho ii ci ahi hi: “Tuni in Pathian ii aw na za le, na taanghpupite ii Pathian a langpan lai uh bangin na thin uh na sahsak heak vun.”

¹⁶Pathian aw za a, ama a langpante a kuate ziam? Moses ii Egypt ngam panin a pusuapui theampo ahi hi.

¹⁷Pathian sia kum sawmli tawntung a kuate ii tungah thin uuk ziam? Sennealngam sungah puk a, a thi mawneite tungah Pathian a thin uuk hi.

¹⁸Pathian in a ciliaphuai kamciam pia a, “Amate tawlngakna ka piak natu ngam ah a tum ngei buatu uh hi,” a ci sia — akua te ii thu a sonna ziam? Ama a langpante ahi hi.

¹⁹Amate in tua ngam sungah tum thei ngawl hi, banghang ziam cile amate in um ngawl ahihang hi ci in ih he hi.