Read Siyin Chin Hebrew te 4 Bible Online

Hebrew te 4 - Siyin Chin bible

Hebrew te 4

¹Tu in Pathian in, ama sonsa tawlngak nuam sia ih nga thei natu in kamciam hong pia hi. Tua ahiciang, tua tawlngak nuam sia saang ngawlin khat zongh ih om thaak ngawl natu eite kidawm tek tawng.

²Banghang ziam cile eite zongh amate bangma in lungdamna thu ih za zo hi. Amate ahile tua thu za napi amate atu phatuamna a pia bua hi. Banghang ziam cile amate in a zaak uh ciangin upna taw a saang bua uh hi.

³Tua hi a, ei a umte in, Pathian hong kamciamsa tawlngak nuam sia ih saang hi. “Ka thin uuk a, hi bangin a ciliap huai kamciam ka vawt hi. ‘Amate in ka piak tu tawlngakna ngamnuam ah a tum ngei buatu hi!’ ” a ci bang tatak ma ahi hi. Ama ii nasep sia simlei a bitphua hun panin a kiman sa hi napi tu a bangin ci veve hi.

⁴Banghang ziam cile Laithiangtho sung mun khat ah ni sali ni huvau hi bangin ci hi: “Pathian sia a nasepna theampo pan a ni sali ni in tawlnga hi.”

⁵Hi thu a kison kik leleau na ah, “Amate in tawlngakna ka piak natu ngam ah a tum ngei buatu hi.” ci hi.

⁶Lungdamna Thu a za phit te in tua tawlngak nuam sia a saang bua uh hi. Banghang ziam cile amate in a um bua uh hi. Tua ahikom a saang tu in, a deisak midang om hi.

⁷Hi thu sia koi bangin kilak ziam cile Pathian in, “Tuni,” a kici nidang khat koi hi. Tua zawk kum tam mama ciangin, a kisonsa laithiangtho khante sungah a om bangma in Pathian in David tungtawnin, tua thute hi bangin son hi: “Tuni in Pathian aw na za uh le, na thin na sahsak heak vun.”

⁸Joshua in Pathian kamciam ahi tawlngak nuam sia mihingte tungah pia zo hi thong le, Pathian in nidang khat ciang son kik nawn ngawl tu hi.

⁹Tua ahikom ni sali ni in Pathian a tawlngak bangma in, Pathian mite atu in tawlngak nuam khat om lai hi.

¹⁰Banghang ziam cile tua Pathian kamciam a piak tawlngak nuam sungah a tawlnga peuma in, Pathian tawlngak bangma in, amate nasepna pan a tawlnga tu uh hi.

¹¹Tua ahikom, amate upna a sel hu in tawlngakna a nga ngawl bang ih sua ngawl natu in, ei zongh tua tawlngakna sia ih saan thei natu in, ih hi theiza in hanciam tawng.

¹²Pathian kammal in nungta a, thahat in, lang nii hiam namsau sangin hiam zaw hi. Ama in thaa le thinsung kisiktuana mun, ngu le taang ngungeak kipeena mun teng pailet hi. Ama in mihing deina le lungngulna te tungah thukhen hi.

¹³Pathian mai ah bangma a kiseal thei bua hi; bitphua sa na theampo sia ama mai ah kipualaak siat hi. Tuaciangin ih sep ih vawt sa theampo tungah thu hong sit tu sia ama ahi hi.

¹⁴Tua ahikom ih upna ih pualaak sate ii tungtaang ah eite kip tek tawng. Banghang ziam cile eite in Pathian omna tatak ah a pai sa, Thiampi Lianbelpa — Pathian Tapa Jesus ih nei hi.

¹⁵Ih Thiampi Lianbelpa in ei tha zawmna hong khuangai pui thei ngawlpa ahi bua hi. Tuabang hi ngawl zaw in, Thiampi Lianbelpa in, eima bangma in ze etna namcin na thuak a, ahizong a khial ngei bua hi.

¹⁶Tua ahikom, kimuanna nei in thuthiamna a omna mun Pathian kumpi tokhum kung zuan tek tawng. Tua munah hesuakna ih saang tu a, ih kitaangsap laitak hong hu tu in, thuthiamna ih mu tu hi.