Read Siyin Chin Hebrew te 6 Bible Online

Hebrew te 6 - Siyin Chin bible

Hebrew te 6

¹Tua ahikom Tapidawte tungah thuhil phitnate nungsangah nusia in, a puicing kihilna taw eite mainawt tawng! A mannung ngawl nasepnate nusia in Pathian ih upna,

²baptize na nanamte, khut ngakna. tawntung thukhenna le a thisate thawkiknate, kansuut kikik pheang nawn bua tawng.

³Eite mainawt tawng! Pathian in hong lungkimpui le, ih vawt tu sia hisia ahi hi.

⁴Banghang ziam cile a upna uh a nusia sate sia a kisii kik natu in, kikaizawn kik thei nawn na ziam? Amate sia khatvei lai in Pathian ii khuavak sungah om ngei zo uh hi. Amate sia vantung letsong tep ngei zo uh hi. Amate sia Thaa Thiangtho zongh a saang ngeisa ahi uh hi.

⁵Pathian kammal pha hi ci in a tel sa, maisang a hong pai pheang tu, hun ii vaangletna zongh a he sate ahi uh hi.

⁶Tua zawkciang amate in a upna uh taisan uh hi! Amate sia a kisii kik tu sia suak thei nawn ngawl hi. Banghang ziam cile, amate in Pathian Tapa sia Thinglamtee tungah kilh kik a, mipi mai ah a maizumhuai in a pholaak ahi uh hi.

⁷Lothote atu a limci ankungte a posak nguatui a dawn leitangte ii tungah Pathian in thupha pia hi.

⁸Ahihang lopa le lingkungte a posak a ahile, tua leitang sia a mannung bua hi. Pathian ii haamsiat tu le, meikuang taw a halcip tu lauhuai hi.

⁹Ahizong hi bangin ih pau hang, kong it lawmte awng, no atu sia ka lungmuang hi. Note ii ngupna taw kizui thupha a phazawte na nei uh sia kong he uh hi.

¹⁰Pathian sia a maan ngawlin a ngamta ngei bua hi. Ama in na a sepnate ahizong, ama ii tungah itna na lakna uh ahi, Tapidawpui te ii tungah huna na piakte le na piapiak laite sia hong makngilsak ngawl tu hi.

¹¹Deisakna lianpi kong neisakna uh sia, bang ziam cile, na lamet uh thute hong taangtung takpi thei natu in, na lawpna uhte a tawp dongin, mihing sim in, na kepcing tek tu ahi hi.

¹²Na datham tu sia kong deisak bua uh hi, Pathian ii kamciamte na nga natu in, a umte le a thinsaute bang na hi natu in kong deisak uh hi.

¹³Pathian in Abraham tungah kamciam a piak ciangin, a kamciam teng a taangtun natu ama in kiciamna vawt hi. Ama sangin a lianzaw om nawn ngawl ahikom, ama ii min taw kiciam hi.

¹⁴Ama in “Thupha kong pia tu a, suan le paal tam mama kong pia tu hi ci in kamciam kong pia hi,” ci hi.

¹⁵Abraham sia a thinsau ahikom Pathian ii kamciam teng a saang hi.

¹⁶Mihing khat in kiciamna a vawt ciangin, ama sangin a lianzaw khat ii min zangh a, tua in kinialna theampo bosak hi.

¹⁷Ama ii kamciam a piakte, a saang tute tungah, Pathian in a tup a sawmna peal ngeingawl hi, ci in thiang takin telsak nuam ahikom a kamciamte sia, kiciamna taw in belap hi.

¹⁸Tua hi a, thu nam nii om hi, tuate sia kikheal thei ngawl a, Pathian in tua thute taw kisai in leilot thei ngawl hi. Tua ahikom ama sungah ngammuanna a ngate in, ih mai ah hong kikoi lametna sia kho takin ih let natu in nasia takin hanna ih nei hi.

¹⁹Hi lametna sia ih nuntakna atu in, thikkip bangin, ih nei hi. Tuasia in, maanin, muanhuai a, vantung biakinn a kidalna puankhai sia kaantanin mun thiangtho sungnung ah pai hi.

²⁰Ei taangin, Jesus in eite mai tua munah paikhol zo hi. Tuaciang, Melchizedek thiampi sia taw a kinguizui, a tawntung atu in, thiampi lianbel hong suak hi.