Read Siyin Chin Hebrew te 7 Bible Online

Hebrew te 7 - Siyin Chin bible

Hebrew te 7

¹Hi Melchizedek sia Salem kumpipa hi a, a Saangbel Pathian ii thiampipa ahi hi. Abraham sia kumpi li taw kisimin, ngalzo a hong cia ciang, Melchizedek taw kisi a Melchizedek in thupha pia hi.

²Tuaciang Abraham in ngalte ii neisa a laak theampo tung pan see sawm sua see khat ama pia hi. (Melchizedek min ii khiakna masa sia “Thutang Kumpipa,” cina hi a, tuaciang, Salem kumpipa zongh kici ahikom, “Kilemna Kumpipa,” zongh kici si hi.)

³Melchizedek ii pa ahizong a nu ahizong a taanghpupite min ahizong a kiciamtee mun om ngawl hi. A suana ahizong a thina ahizong tepteena om ngawl hi. Ama sia Pathian Tapa bang ahi hi. Ama in a tawntungin thiampi hi top hi.

⁴Tua ahikom ama bangza in lian ziam ci in na ngaisun thei uh hi. A minthang ih taanghpupi ahi Abraham zongh in, ngal kisim na phual pan a, a nga vanhte sung pan see sawm sua see khat ama pia hi.

⁵Tuaciang, Levi suan thiampite sia Thukham in Israel mite tung pan see sawm sua see khat, a laak natu thupia hi. Tuate in, a minampuite hi a, tua a minampuite sia Abraham suante ma ahi hi.

⁶Melchizedek sia Levi suan hi ngawl hi. Ahihang Abraham tung panin see sawm sua see khat la in, Pathian kamciam a saang Abraham sia thupha pia hi.

⁷Thupha a pia pa in, thupha a saang sia sangin, lianzaw ahi hunlam tel laak om ngawl hi.

⁸Thiampite tungtaang a, see sawm sua see khat sia, a thithei mihingte in la hi. Ahihang Melchizedek ahile, laithiangtho son bangma in, see sawm sua see khat sia a nungta pa in la hi.

⁹Bang ci nuam hi ziam cile, Abraham in see sawm sua see khat a piak ciangin Levi in zongh a pia suak hi (A suan a paalte in khon hi).

¹⁰A tatakin ci leang, Levi sia piang ngawl lai hi, Melchizedek in, Abraham taw a kimu lai in Levi sia a taanghpupi Abraham pumpi sungah om hi, ci tu ahi hi.

¹¹Levi thiampite bulphu in, Israel mite tungah Thukham a kipia ahi hi. Tu in Levi thiampite nasepna sia a cialcing sa hile thiampi nam dang khat a pian kul ngawl tu hi. Tua Thiampi in Aaron za laih hi ngawlin, Melchizedek za laih tu a kulna sia hi thu hang ahi hi.

¹²Banghang ziam cile thiampi huvau ah kikhealna a om ciang, thukham zongh a kikheal kul hi.

¹³Tu a ih son teng huvau sia ih Topa in phung dang pan hi a, ama bee le phung sung pan thiampi a seam ngei kuama a om bua hi.

¹⁴Ama sia Judah minam a piang ahi hunlam sia a kuama po ii heak ahi hi. Tuaciang thiampite huvau a son ciangin Moses in Judah min a lo ngei bua hi.

¹⁵A thu paizia sia thiang vaial hi; thiampi tuam dangkhat hong khang a, tua pa sia Melchizedek bangma ahi hi.

¹⁶Ama sia thiampi kisuaksak hi. Mihingte ngeina le zui tu thu omte taw hi ngawlin mong nei ngawl nuntakna khat ii vaang taw kisuaksak hi.

¹⁷Banghang ziam cile laithiangtho in, “Nang sia thiampi khat na hi tawntung tu hi. Melchizedek taw a kinguizui thiampi za lua pa na hi hi,” ci hi.

¹⁸Tua ahikom ngeina lui sia, kiheam hi. Banghang ziam cile tua in thaneam a, a mannung bua hi.

¹⁹Banghang ziam cile Moses thukham in bangma a cialcingsak thei bua hi. Tu in Pathian taw ih kinai thei natu lametna phazaw khat hong kipia zo hi.

²⁰Tuaban ah, Pathian kiciamna zongh om si hi. Midangte thiampi a kisuasak lai in, tuabang kiciamna a om bua hi.

²¹Ahihang Jesus sia kiciamna khat taw thiampi a sua natu Pathian in, “Topa in a ciliap huai kamciamna khat vawt zo a, tuaciang, ama in a dawk kik buatu hi. ‘Nang sia a tawntungin thiampi na hi tu hi’ ” ci hi.

²²Tua ahikom hi a kilamdanna in, Jesus sia a phazaw thuciamna a kipsak pa zongh suaksak hi.

²³A kilamdanna dang khat zongh om lai hi: thiampi dang tam mama a om hi, banghang ziam cile amate sia thithi a, a nasep uh a zomto thei bua hi.

²⁴Ahihang Jesus sia nungta tawntung ahikom ama ii thiampi nasep sia ngualdang a ki aap sawn bua hi.

²⁵Tua ahikom ama in, tu le a tawntungin, ama tungtawn a, Pathian kung a zuante sia hun thei hi, banghang ziam cile ama in amate atu Pathian munah thu ngetsak tu in, a nungta tawntung hi.

²⁶Tua ahikom Jesus sia ih kitaangsapnate hong kicingsak thei, Thiampi Lianbel ahi hi. Ama thiangtho a; ama in mawna ahizong, khialna ahizong, ama sungah a nei bua hi; ama sia mawneite sung panin, kidoi tuam a, vantungte sangin a saang zaw in kilaamto hi.

²⁷Ama sia thiampi lianbel dangte taw a kibang bua hi; a masa phitbelin, ama mawna atu le tua zawkciang midangte mawna atu in, sangaw biakna ni simin a piak kul ngawl hi. Ama le ama a kipiak ciangin, a tawntung atu in khatvei lian sangaw biakpiakna vawt zo hi.

²⁸Moses Thukham in a cialcing ngawl mihingte thiampi lianbel tu in sep hi; ahihang Thukham om zawkciang hong piang, Pathian ii kiciamna taw a vawt kamciam in a tawntung atu in a cialcing Tapa sia Thiampi suaksak hi.