Read Siyin Chin Hebrew te 9 Bible Online

Hebrew te 9 - Siyin Chin bible

Hebrew te 9

¹Thuciam masa sia in biakpiakna ngeinate le mihing ii vawt biakna mun zongh nei hi.

²Puanbuk khat kisa a, a puanung sia Thiangtho Mun kici hi. Tua ii sungah mei detna khuam le Pathian a piak anluum koina sabuai om hi.

³Kidalna puankhak a niina sia ii nungsangah Thiangthobel Mun a kici puanbuk khat om hi.

⁴Tua ii sungah sathau namtui halna, khamh biaknatau le, khamh taw a kituam Thuciamna Thingkuang om a, a sungah manna koina khamh uum le a teeno a suak Aaron ciangkhut le thupiakte a ki atna suangpheak niite om uh hi.

⁵Tuate tungah Pathian ompuina lim a lak, cherub te om a, maw kimaisakna mun ii tung pan a tha taw siin uh hi. Ahihang tu laitak sia tua nate theampo a vaikhua in son tu hun ahi bua hi.

⁶Hite sepzia sia hi bang ahi hi. Thiampite in ni simin puanbuk puanung sungah tumin a sep tute seam uh hi,

⁷ahihang a sungnung doituam sungah, Thiampi Lianbelpa bek kum khatin khatvei tum hi. Ama ii mawna le a mihingte ii a phaw thaak ngawl mawnate atu in, chisan la in, Pathian bia hi.

⁸Puanbuk puanung sia a kip in a om laitengin Thiangthobel Mun kihong ngawl lai hi, ci in Thaa Thiangtho in thiang takin hil hi.

⁹Hisia in tu hun kilakna lim khat ahi hi. Pathian tungah a kipia biakpiakna le, nganno taw biakpiakna in, a biate thinsung cialcingsak thei ngawl hi ci thu kimu hi,

¹⁰banghang ziam cile tuate in anneak, tuidawn le kithiansuana tuatuamte taw kisai bek hi. Hite sia a puatham zui tu ngeinate hi a, Pathian ngeina thak a piak sia a kipsak mateng atu hi bek hi.

¹¹Ahihang Christ sia hi lai ah a omsa naphate theampo ii Thiampi Lianbel tu in hong pai zo hi. Ama ii thiampi sepna puanbuk sia lianzaw a, cialcing zaw hi; tuasia in mihingte ii vawt hi ngawl a, a kibitphua simlei taw a kisai ahi bua hi.

¹²Christ in Thiangthobel Mun ah khatvei lian a tum zawkciang, ama in, kealte le khuitalte ii chi sia biakpiakna tu in a keng bua hi. Ama chisan piazaw in, ei atu in tawntung ngupna hong ngasak hi.

¹³Kealte le khuitalte ii chi le khuino halna vaamte a kithe ciang biakna huvau a, a thiangtho ngawl mihingte thiangthosak hi.

¹⁴Hisia thumaan ahikom, Christ ii chisan in bangza in seam zozaw seseam tu ziam! Tawntung Thaa tungtawnin, ama in Pathian tungah ama le ama a cialcing sangaw biakpiakna in, kipia zo hi. Ama chisan in a mannung ngawl biakna huvau panin, ih thinsung hong thiangsak tu hi.

¹⁵Tawntung thupha Pathian kamciamte a saan thei natu in, Pathian sapsa mihingte atu, Christ in thuciam thak khat hong vawtsakna in, hisia hang ahi hi. Hisia kipiangsak thei hi, banghang ziam cile thina khat om a thuciam masa sia a om kimlai ma in, mihingte a khialnate pan tua thina in suaktasak hi.

¹⁶Ngamhlua natu lai a kinusiat tungtaang ah tua lai atpa sia thi zo ci in a lak thei tu kisamh hi,

¹⁷banghang ziam cile thi zawkciang atu in a ki at lai sia, a at pa nuntak lai teng kizangh thei ngawl a, a at pa thi zawkciang bekin kizangh thei pheang hi.

¹⁸Tua hi a, thuciam masa sia ngawngawn zongh chisan zakna bek taw thu suak thei hi.

¹⁹A masa phitbel in Thukham sungah a thupiak theampo mihingte tungah Moses in sonthiang phot hi. Tua zawkciangin khuitalte le kealte chi la in tui taw a hel zawkciang, hyssop baak le tuu mulsan pawlkhat zanghin, Thukham laibu tung le mihingte tungah the hi.

²⁰Ama in “Hi chi in Pathian ii ih zui tu a, hong thupiak thuciamna a kipsak sia ahi hi,” ci hi.

²¹Tuasia bangma Moses in Puanbuk Thiangtho tung le biakna ah a kizangh nate theampo tungah chi the hi.

²²A tatakin, thukham ii ci bang hile na theampo phialma chisan in thiansua a, chisan a buak ciang bekin mawmaisakna om hi.

²³Vantung ah a om nate ii lim a late sia tuabangin kithiansua hi. Ahihang vantung nate mama in a phazaw biakpiaknate kulsak hi.

²⁴Banghang ziam cile, Christ in a tatak sia ii lim ahi mihingte vawt Thiangtho Mun sungah a tum bua hi. Ama in vantung tatak ma ah tumin Pathian mai ah eite luangin, tu in a na kilak tawntung hi.

²⁵Jew te Thiampi Lianbelpa in Thiangthobel Mun ah kum simin nganno chi taw tum hi. Ahihang Christ in ama le ama a kipia kikik bua hi,

²⁶tuabang hi thong le, simlei a kibitphua pan kipan tamveipi na thuak zo tu hi. Tu in hunkhen theampo a tawp natu hong nai ciangin, ama le ama a kipiakna taw mawna kithiansua natu in, ama in a tawntung atu, khatvei lian hong kilaak zo hi.

²⁷Mihing theampo khatvei tek thi tu a, tua zawkciang Pathian in amate tungah thukhen tu hi.

²⁸Tuasia bangma in, Christ zongh mihing tampite mawna a laaksak tu in, a nuntakna khatvei lian a kipia ahi hi. Ama sia a nii veina hong kilangh tu a, mawna taw kipekan tu hi nawn ngawlin, ama ngak nginge in a omte hun tu ahi hi.