Read Siyin Chin James 1 Bible Online

James 1 - Siyin Chin bible

James 1

¹Pathian le Topa Jesus Christ ii naseampa James in: leitung bup ah a kithethaang Pathian mite kong paupui hi.

²Ka suapuite awng, ze etna namcin na thuak uh ciangin hampha in na kingaisun tavun,

³banghang ziam cile, na upna in tuabang ze etnate na zaw zawkciang, thuak zawkna piang hi ci in na he uh hi.

⁴Note sia a kicing, a cialcing, bangma a kitaangsamh ngawlte na hi natu in na thuak zawknate in note, puk ngawlin lam tawntung hong khosak tahen.

⁵Ahihang note khat po in, ciimna na nei buale, a pia tu pa Pathian tungah thu ngen tahen; banghang ziam cile Pathian in ngo tatak le thuthiam takin, a kuama theampo tungah pia hi.

⁶Ahihang thu na nget uh ciangin, na up tu kul a, up laakna na nei ngawl het tu uh kisamh hi. Up laakna a nei khat pawpo sia, tuipi tungah vui ii seam kawkoai tuihual taw kibang hi.

⁷Tuabang mihing khat, a sepna theampo ah a thin a khensat thei ngawl khat sia in, Topa tung pan bangma nga tu in ngaisun heak hen.

⁹A zawng Tapidawte a zawnna pan Pathian in a lapto ciangin a lungdam tu uh a,

¹⁰tuaciangin a hau Tapidawte sia Pathian in a khiasuk le a lungdam tu uh ahi hi. Banghang ziam cile a hau khat sia ngam lopa paak bangin bo tu hi.

¹¹Ni hong suak a, nisa in a kung hal a; a paak pulin a hoina teng siacipsak hi. Tuasia bangma in mihaupa sia a nasepna ah, a sep laitakin kisusia tu hi.

¹²Ze etna haksa a thuak zote in a lungdam mihing ahi hi, banghang ziam cile tuabang hong sit nate a zaw ciangin, Pathian a itte tungah a kamciamsa nuntakna sia tel in saang tu hi.

¹³Mihing khat sia tuabang haksatnate taw ze etna a thuak le, “Hi ze etna sia, Pathian kung panin hong pai hi,” ci heak hen. Banghang ziam cile Pathian sia siatna in ze et zo ngawl hi, tuaciang ama mama in kuama a ze et bua hi.

¹⁴Ahihang mihingte sia, amate ii a pha ngawl deinate in kai a, a awk ciang, ze etna thuak ahi hi.

¹⁵Tuasia ciangin amate ii deina pha ngawlte a sung uh ah paai in mawna piangsak hi; tuaciang, mawna hong khanthin tak ciangin thina piangsak hi.

¹⁶Ka it suapuite awng, theamna um heak vun!

¹⁷A pha tel le ziakte le a cingtaak letsong theampo vantung panin hong pai hi; tua teng sia vantung khuavakte a bitphua, kikheal ngeingawl a, kihei in khua a zingsak ngawl Pathian kung pan hong paisuk hi.

¹⁸Ama ii piansaknate theampo sung pan a thupibel ih sua thei natu in, thumaan kammal tungtawnin, ama ii deina om babangin eite hong piangsak hi.

¹⁹Ka it suapuite awng, hi thu ciamtee tavun! Mihing khat simin thu ngaina thu zaakna ah manlang tu a, ahizong pau papaih ngawl tu a thin uuk papaih ngawl tu kul hi.

²⁰Mihingte thin uukna in, Pathian ii thutang tupna taangtung ngawlsak hi.

²¹Tua ahikom a kiihuai zongsang nate le seksolnate theampo vawk siat vun. Pathian tungah ki aap vun a, na thinsung ah hong khum a kammal na saang vun, tua in note hong ngum thei hi.

²²Ama ii kammal ngaina bek taw noma le noma kitheam heak vun a; ngamtatna taw zui paih zaw vun.

²³A kuama po kammal ngai a, a zui ngawlte sia limlangh sung ki en a, ama le ama a pian babangin a kimu mihing khat taw kibang hi.

²⁴Ama le ama pha tak a ki et zawkciangin pusuak a, ama meal bangbang hi ziam cisia mangil paih hi.

²⁵Ahihang mihingte a suaktasak a kicing thukham sia pha takin a et zawkciang thupi ngaisut tawntung a, a zaak sia a mangil kik paih sia hi ngawlin, a zui — a nuntak puite peuma sia Pathian in a sepna ah thupha pia tu hi.

²⁶Khat po in ama sia biakna kin mihing khat hi ing ci in a kingaisun ziam? Ama in a leei a uk zo buale ama ii a biakna sia a luithawthong suak a, ama le ama kitheam ahi hi.

²⁷Pa Pathian ii a thiangtho le biakna tatak hi ci in, a ngaisut sia hi teng hi: tangate le meingongte ii thuakna sung pan khoi natu le leitung siatna panin eima le eima kikep natu ahi hi.