Read Siyin Chin James 2 Bible Online

James 2 - Siyin Chin bible

James 2

¹Ka suapuite awng, a minthang Topa, ih Topa Jesus Christ thu umte na hi uh bangma in, a puasang omzia etna taw kuama doidan ngei heak vun.

²Sonteena in, mihau khat sia khamh khutzungbu bun a, puan pha silhin, kikhopna munah hong pai hen a, tuaciangin mihing khat sia puansia ngapkaai silhin, kikhopna munah hong pai hi.

³Puan pha taw a kizeampa zatak piak zawkna taw, “Hi sung tona phabel tungah to in,” ci a, ahihang mizawngpa munah “Nang zia lai ah ding in, tua ahibuale ka peang kung suat tungah to in,” ci le uhte

⁴tuasia ciangin noma pawlsung mama ah, kidoidanna a piangsak, a sia tupna bulphu in thukhenna taw a maw na hi uh hi.

⁵Hong ngai tavun, ka it suapuite awng! Pathian in hi leitung ah mizawngte sia, upna sungah a hau tu le ama a itte atu kamciam a piak kumpi ngam a lua tu in teal zo hi.

⁶Ahihang note in mizawngte sia na thusim bua uh hi! A kuate in no hong zothaw a, thukhenmangte mai hong then ahi ziam? Mihaute hi!

⁷No hong kipiasa tua minphatna a sonsiate sia amate ahi hi.

⁸Laithiangtho sungah a kimu Kumpi ngam ii thukham na zui uh le, a maan in na a seam na hi tu uh hi. Tua thukham in, “Noma le noma na ki it uh bangma in, na innpaam pa na it vun,” ci hi.

⁹Ahihang mihingte tungah a puasang omzia muna taw na en uh le, mawna vawt na hi uh a, tuaciang thukham in nang sia thukham paltan pa bangin hong mawsak hi.

¹⁰A kuama po thupiak khat a paltan pa in, thukham a vekpi in paltan ahi hi.

¹¹Banghang ziam cile “Palngul mawna vawt heak vun,” a ci pa mama in “Mihing that heak vun,” zongh ci si hi. Palngul mawna na vawt bua hial uh zong mihing na that uh le, thukham paltan na suak uh hi.

¹²Eite hong suatak thukham sia taw thu a kikhen tu mihingte bangin pau in, ngamta vun.

¹³Banghang ziam cile hesuakna a nei ngawl mihing khat tungah thu a khen ciangin, Pathian in hesuakna a lak buatu hi; ahihang hesuakna in thukhenna zo hi.

¹⁴Ka suapuite awng, khat po in upna ka nei ci napi in, a ngamtatnate taw a lak buale, bang phatuam ziam? Tua upna in, ama ngum thei tu ziam?

¹⁵Sonteena in u le nau sungah, puansilh kisamhte le, anneak tu kicingin nei ngawl om hi ci tawng.

¹⁶Amate tungah, “Pathian in thupha hong pia tahen! Na khua lum in, na ngilva tahen!” na ci uh hang, nuntak natu a kisamh nate na pia bua uh le na pauna in bang phattuamna om ziam?

¹⁷Upna ih ci zongh ta bangma hi: ngamtatnate a om ngawl upna in ama nguak ahikom a thi ahi hi.

¹⁸Ahizong khat po in, hi bangin ci thei tu hi, “Mihing khat in upna nei a, a dangkhat in ngamtatnate nei hi,” ci hi. Keima zo kikna in hi bang ahi hi. “Bangbangin mihing khat po in, ngamtatna om ngawl upna nei thei tu ziam? Ka upna sia ka ngamtatnate taw hong lak tu khi hi,” ka ci tu hi.

¹⁹Pathian khat bek om hi, ci in na um uh ziam? Pha hi! Doaite zongh in um a — kiitakna taw liing hi.

²⁰Mihing mawmawte awng! ngamtatna om ngawl upna in, kimanna nei ngawl hi, ci thu a kilak tu na dei uh ziam?

²¹Ih taanghpupi ahi Abraham sia bangbangin Pathian mai ah thutang a na suak ziam? Ngamtatnate pan hi, biaknatau tungah a tapa Isaac a piak ciang tua ngamtatna tungtawnin thutang a na suak hi.

²²Hi thu mu thei ngawl nu ziam? A upna le a ngamtatna sia kithua khawm a; a upna sia a ngamtatnate tungtawnin khuangkhim hi.

²³Tuaciang laithiangtho in hi bang a ci ciangin, thumaan son ahi hi, “Abraham in, Pathian um a, tuaciang a upna hang komin, Pathian in ama sia thutang in saang hi.” Tua hi a, Abraham sia Pathian ii lawm hi kici hi.

²⁴Tua hi a, en vun, mihing khat sia ngamtatnate taw Pathian mai ah thutang suak a, a upna bek pan hi ngawl hi.

²⁵Numei pumpi zuak Rahab zongh tuabang ma hi. Ama in Pathian mai a thutang a sua sia a ngamtatna pan hi, Israel thudawpkute huna pia in lampi dang khat panin, a suataksak ngamtatna pan ahi hi.

²⁶Tua ahikom thaa om ngawl pumpi sia a thi ahi bangma in, ngamtatna om ngawl upna sia zongh a thi hi.