Read Siyin Chin James 3 Bible Online

James 3 - Siyin Chin bible

James 3

¹Ka suapuite awng, note sya seam nuam tam na om heak vun. Na heak uh bangma in ngualdang sangin ko syate tungah nasia zaw in thu hong kikhen tu hi.

²Ih vekpi in, sep khial ih nei bul hi. Ahihang mihing khat in, pau khialna a nei ngei buale ama sia a cialcing hi a, a pumpi bup zongh, a uk thei mi ahi hi.

³Siphu in ih thu hong nit thei natu in, a kam sungah kamkhau ih koi a, ih uukna pawpo ah ih paisak thei hi.

⁴Tua ahibuale teambaw khat ngaisun vun: tuaza in lian a, a thahat vui ii a seamna taw kihawl hikale, a heakna no mama khat taw kiheak zo hi, tuaciangin teambaw hawlpa ii paisak nopna pawpo ah pai hi.

⁵Leei zongh tuabang ma ahi hi: tuasia in no ahihang, na liante huvau ah kisuangtaak thei hi. Meikuang no khat taw, duipui khat a kihal theina thu ngaisun vun!

⁶Tuaciang leei sia meikuang taw kibang hi. Ama sia khialna omna leitung hi a, ih pumpi sungah mun la in hong om a, ih pumpi bup tungtawnin thusia kizelsak hi. Hell pan a hong pai meikuang taw in nuntak sung tawntung hong hal hi.

⁷Mihing in a nungta dang theampo — duisung nganhingte, vacimte, awmtaalin a vakte le, ngasate zualsak thei zo hi.

⁸Ahihang kuama in leei sia a zualsak zo ngei bua hi. Leei sia, sia a, uk thei hi ngawlin, thi theina nguu taw kidim hi.

⁹Leei sia ih Topa le Pa tungah lungdamkona in ih zangh a, Pathian taw a kisunin a kivawt ih mipuite haamsiatna in ih zangh si hi.

¹⁰Lungdamkona le haamsiatna kammalte sia kamhawng khat sung panin pusuak khawm hi. Ka suapuite awng, tubang hi tu kilawm ngawl hi!

¹¹Tuilim le tuikhaa sia ciktui naak khat sung pan pusuak khawm ngawl hi.

¹²Ka suapuite awng, theikung khat in olive ngate nga thei ngawl hi; sapitkung khat in thei ngate nga thei ngawl hi; sii tuinaak in tuilim piangsak thei ngawl hi.

¹³Note sungah a ciim thutel thei na om uh ziam? Amate in tuasia a nuntakna pha taw ahizong, kiniamkhiakna le ciimna taw a pha sepnate taw ahizong lak tahen.

¹⁴Ahihang na thinsung ah eenna, thin natna le duhopnate a om le, na ciimna na kiphatsakpuina taw thumaan thutak sia langpanin mawna vawt heak in.

¹⁵Tuabang ciimna sia vantung panin hong paisuk hi ngawl hi; tua in leitung neisa hi a, thaa vai hi ngawlin, doai vai ahi hi.

¹⁶Ki eenna le duhopna omna munah buaina le siatna namcin zongh om hi.

¹⁷Ahihang tungsang pan ciimna sia a masabel in thiangtho hi; tua in kilemna, cikna, lemzawngna zongh ahi hi. Tua in kihesuakna taw kidim a, a pha sepnate piangsak hi; tua in, kidoidanna nei ngawlin, kihithepsakna nei ngawl hi.

¹⁸Phatna in kilemna piangsakte ii a tu thaicii panin a piang thaw an ahi hi.