Read Siyin Chin James 4 Bible Online

James 4 - Siyin Chin bible

James 4

¹Note sungah kihauna le kidona teng sia koisung pan hong pai ziam? Na sungah a kido tawntung leitung nopna na deina uhte pan hong pai ahi hi.

²Nate dei a, na nga thei ngawl uh ciangin, ngual thatlum tu in na kingingta uh hi; nate nasia takin na dei uh a, ahizong na nga zo bua uh hi, tuasia ciangin na kihau uh a, na kido uh hi. Na dei uhte na nga ngawl uh sia, banghang ziam cile Pathian munah na ngen bua uh hi.

³Tuaciangin na nget uh ciang, na nga bua uh hi, banghang ziam cile na niimnate pha ngawl hi; noma nopsak natu sung bek ah na zak tu uh nate na ngen uh hi.

⁴Thumaan ngawl mihingte awng! Leitung ii ngualtamh ih hi le Pathian ii ngal ih hi hunlam he ngawl nu ziam? A kuama po leitung ngualtamh a suak nuam sia Pathian ii ngal suak nuam ahi hi.

⁵Laithiangtho sungah, “Pathian ii ih sungah hong koisak thaa sia a nasia mama lungngulnate taw kidim hi,” a ci sia thumaan ngawlin ngaisun heak vun.

⁶Ahihang Pathian hong piak thuthiamna sia khohzaw kan lai hi. Laithiangtho in “Pathian in a kiphasakte nalh a, ahihang a kiniamkhiakte thuthiamna pia hi,” a ci bangma hi.

⁷Tua ahikom Pathian tungah ki aap vun. Doaimangpa nalh vun, tua hile note kung pan tai tu hi.

⁸Pathian kungah hong neak tavun, tua hile Pathian in note hong neak tu hi. Na khut uh sil vun, no mawneite awng! Na thinsung uh thiansua vun, no a kihitheamsakte awng!

⁹Heena, kaana, tauna taw om vun; na nuina uh sia kaana taw laih tavun a, na lungdamna uh sia, maikhinna taw laih tavun!

¹⁰Topa mai ah noma le noma kiniamkhiak tavun, tua hile ama in hong laamto tu hi.

¹¹Ka suapuite awng, khat le khat na kisonsia heak vun. Tapidaw suapui khat a sonsia ahibuale a tung a thu a khen sia in, Thukham sonsia a thukhen ahi hi. Thukham tungah thu na khen le, Thukham a zui nawn ngawl, Thukham tungah thukhenpa na hi uh hi.

¹²Pathian bekma thukham pia Pa le thukhenpa ahi hi. Ama bek in, ngum thei a, susia thei hi. Na mipuite tungah thukhen tu in nang sia akua kisa ni ziam?

¹³“Tuni ahibuale zing ciangin, khua khat ah khual va haw tong i, tualai ah kum khat bang taamin, sum meet vawt in, sum tam mama thalaw tong,” a cite awng hong ngai tavun.

¹⁴Na nuntakna sia zing ciangin bangbang hi tu ci ngawngawn na he bua uh hi! Note in tawmvei hong kilangh zok a, a bo kik meikhu lomno khat taw na kibang uh hi.

¹⁵Na pau tu uh sia hi bang hizaw tu hi: “Topa deina a om le ih nungta tu a, hisia ahibuale ziasia ih vawt tu hi.”

¹⁶Ahihang no, tu in kiphasak a, kisuangtaak nu hi; tuabang kisuantaakna theampo sia maan ngawl hi.

¹⁷Tua ahikom a pha tu he napi a pha a vawt ngawl sia in mihing mawnei ahi hi.