Read Siyin Chin James 5 Bible Online

James 5 - Siyin Chin bible

James 5

¹Tu in, no sumhaute awng, hong ngai tavun! No tungah hong tung tu ngimna haksatnate huvau kapin mau vun!

²Na hauna uh teng sia muat zo a, na puansilh teng sia nget in ne zo hi.

³Na khamhte le na ngunnte sia eakseau zo hi. Tuaciang hi a eakseaute in, no langkhat panin tetti hong hi tu a, meikuang taw kibangin, na sa uh hong ne khawng tu hi. Hi ni tawpkhak hun sungah, note in haunate na khol zo uh hi.

⁴Na lo sungah naseam mihingte ii thaman na pia bua uh hi. Amate ii phunnate ngai vun! Na an uh hong laksakte ii auna sia Topa Vaanglianbel Pathian bil sungah theng zo hi.

⁵Hi leitung ah na nuntakna uh sia a liap a vaal nate le nopsakna taw kidim hi. Hong kingaw lup ni ciang na thau natu in noma le noma na kivaak zo uh hi.

⁶Mawna nei ngawl mihingte mawsak in, na thatlum zo uh hi, tuaciang amate in no hong nalh ngawl uh hi.

⁷Tua ahikom, ka suapuite awng, Topa hong pai mateng in, na thin uh sausak vun. Lothopa khat in, leitang tung pan an manpha hong pian natu sia, bangza in thinsauna taw ngak ziam en vun. Amate in khuapi ngua le tuk ngua sia thinsau takin ngak hi.

⁸No zongh na thin uh a sau kul hi. Na lametna uh saangsak vun, banghang ziam cile Topa ii hong pai tu ni hong nai zo hi.

⁹Ka suapuite awng, note khat le khat tungah lungkim ngawlna taw na kiphunsan heak vun, tua hile Pathian in no tungah thu hong khen ngawl tu hi. Thukhenpa sia hong nai zo a, hong kilangh tu in kithoai zo hi.

¹⁰Ka suapuite awng, Topa min suangin a pau kamsaangte phawk vun. Thuakna sungah thinsau takin a thuak zo amate ii thuak zawk hatna sia ettee in nei tavun.

¹¹Amate sia mihing lungdamte hi ih ci hi, banghang ziam cile amate in thuak zo uh hi. Job ii thin sauna te na za zo uh a, a tawpna ah Topa ii piakkikna thu na he zo uh hi. Banghang ziam cile, Topa sia hesuakna le ciliapna taw kidim hi.

¹²A thupibelin ci leang suapuite awng, kamciam na vawt uh ciangin tomlo in kiciam heak vun. Vantung taw ahizong leitung taw ahizong, nadang khat pawpo taw ahizong tomlo in kiciam heak vun. Hi na sak uh ciang, “Hi hi” bekma ci vun, ahi ngawlna ah, “Hi bo” ci lel vun, tua hile Pathian ii thukhenna na thuak buatu uh hi.

¹³A ngim nga khat po no sungah na om uh ziam? Thungen tahen. A lungdam khat po na om uh ziam? Ama in pokna late sa tahen.

¹⁴A cina khat po na om uh ziam? Pawlpi upate sam hen a, amate in thungetsakin, olive thau taw Topa min suangin zut tahen.

¹⁵Hi upna taw thungetna in ciina damsak tu hi. Topa in ciidamna pia kik tu a, tuaciang mawna a vawtte kimaisak tu hi.

¹⁶Tua ahikom, na mawna uh sia khat le khat tungah kipualaak vun a, khat le khat thu na kingetsak vun, tua hile hong damsak tu hi. Mipha thumaan thutang khat ii thungetna in vaang nei hi.

¹⁷Elijah zong eima bangma mihing khat ahi hi. Ama in ngua a zuk ngawl natu in, nasia takin thungen a, kum thum le kum lang nguatui hang hi.

¹⁸Nguazuk kik natu thungen kik leleau a, van in nguatui hong buaksuk a, lei in an piangsak hi.

¹⁹Ka suapuite awng, note sung panin, khat po in, thumaan thutak panin, lampial a, a dang khat in hong ciapui kik le,

²⁰hi thu phawk tavun: a kuama po mihing a maw khat sia ama ngamtat khialna pan hong khealsak ahile, tua pa in mawneipa ii thaa a thi natu panin hun tu a, mawna tam mamate kimaisakna piangsak tu hi.