Read Siyin Chin 1 Peter 1 Bible Online

1 Peter 1 - Siyin Chin bible

1 Peter 1

¹Jesus Christ ii sawltak Peter in — Pontus, Galatia, Cappadocia, Asia le Bithynia ngamte ah ngaltai a, a kithethaang Pathian tealsa mite tungah lai kong thaak hi.

²No sia Pa Pathian tupna taw hong tealsa hi a, Jesus Christ thu a ni tu le a chisan taw a kithiansua tu in, ama Thaa taw a thiangtho minam a suak sate na hi uh hi. Thuthiamna le thinnopna note sungah hong dim tahen.

³Topa Jesus Christ ii Pa le Pathian tungah lungdamko tawng! Hong hesuakna lian ahikomin, Jesus Christ sia thina pan a thawsak kikna taw nuntakna thak eite hong pia hi. Hi sia in a nungta lametna taw hong dimh hi,

⁴tua ahikom a mite atu Pathian ii a koi, a thupha tam mamate a nei tu in ih kilamen hi. Ama in note atu in tua thuphate vantung ah keam a, tua munah muat thei ngawl, lal thei ngawl le vul thei ngawlin om hi.

⁵Tua teng sia noma atu ahi hi, hun tawpkhak ni ciang a kilaak khia tu a kinging sa in a om, ngupna sia upna tungtawnin a nga note atu in, Pathian vaang taw tuate hong kepcingsak hi.

⁶Na thuak uh haksatna namcin hu in tu laitak hun tawm vei no sung khuangaina na thuak uh kul hikale, hi thute ah lungdam vun.

⁷Tua haksatna thuaknate ii tupna in na upna uh a maanna a kilak natu ahi hi. A kisia thei khamh ngawngawn zongh meisa taw kisit lai hi; tua ahikom khamh sangin tam mama in a man nei zaw na upna uh zongh a kip thei natu in hong kisit tu hi. Tua hile Jesus Christ hong kilaak Ni tak ciangin pokna, minthanna le vaang piakna na saang tu uh hi.

⁸Ama mu ngeingawl na hi uh hang na it uh a, tu zongh in ama mu ngawl na hi uh hang na um uh hi. Tua ahikomin, kam taw a kison zo ngawl dongin lungdamna lianpi taw nasia takin na lawp uh hi,

⁹banghang ziam cile ama na upna uh hu in na upna uh ii tupna bulpi a hi thaa ngupna sia na saang uh hi.

¹⁰Kamsaangte ii pha tak a zon le a kat sia hi ngupna thu hi a, Pathian ii no tung hong piak tu hi letsong huvau amate in sonkhol zo hi.

¹¹Amate in tua thu sia bang hun ciang tung tu a, bangbang hong pai tu ziam cisia, heak tu in hanciam uh hi. Tua hun sia Christ in ngim thuak tu a, tua zawkciang minthanna taw kizom tu hi ci in amate sung a, a om Christ Thaa ii a sonkholna taw a lak hun sia ahi hi.

¹²Vantung panin Thaa Thiangtho ii vang taw a sawl, Lungdamna Thupha a thangsak, thupuakte tung pan tu in na zaak uh thute Pathian in hi kamsaangte tungah a pualaakna ah cileang, amate nasep sia in amate phattuam na tu in a seam hi ngawl a, noma atu in a seam hizaw hi. Hi thute sia vantunglalangte dong ii a tel nop uh thu ahi hi.

¹³Tua ahikom a diang tu in, na thin sung uh ah kingin khol tavun. Jesus Christ hong kilangh ciangin, note hong piak tu thupha tungah lametna a cingin nei tavun, na kipilvangsak vun.

¹⁴Pathian thu ni vun, tuaciang bangma na heak ma na nei uh, deinate in na nuntakna uh uksak heak vun.

¹⁵Tua hi ngawl zaw in, na sep na vawt theampo sungah note hong sam Pathian a thiantho bangma in thiangtho vun.

¹⁶Laithiangtho in, “Kei thiangtho ka hikom na thiangtho vun,” ci hi.

¹⁷Mihing khat sim ii a sepna bangin a kibang thukhenna taw mihing theampo thu a khen Pathian tungah thu na nget uh ciang, Pa awng, na ci uh hi; tua ahiciang hi leitung ah nungta in na om uh laiteng ama thasia tavun.

¹⁸Banghang ziam cile na taanghpupite pan na luasuk uh, a mannung ngawl nuntakzia pan na suatak natu in, note bang taw hong tan ci thu na he uh hi. Ngunn le khamh bangin a kisia thei thilte taw hong kilei hi ngawl hi;

¹⁹a sitbaang ngawl, ahibuale a mealhem ngawl tuuno, Christ ii a manpha a kipumpiakna taw hong tan a hina he tavun.

²⁰Ama sia simlei a kibitphua ma in, Pathian teal kholsa hi a, hi ni tawpkhak nite sungah no atu hong kilaak ahi hi.

²¹Ama thina pan a thosak, minthanna a pia Pathian sia ama tungtawnin na um uh hi; tuaciang note upna le lametna sia Pathian tungah kibul hi.

²²Tu in thumaan thutak na zui uh hu in, noma le noma na kithiansua zo uh a, na thu uppui mihingte it zo takpi tu na hi uhkom na thin theampo uh taw khat le khat nasia takin ki it tavun.

²³Banghang ziam cile a nungta tawntung Pathian kammal tungtawnin, a thi maw a nungta tawntung nu le pa khat ii tate bangin, na piangthak zo uh hi.

²⁴Laithiangtho in, “Mihing theampo sia lopa bang hi a, amate ii minthanna sia duisung paakte taw kibang hi. Tua lopa ko a, tua paakte pul hi.

²⁵Ahihang Topa kammal sia a tawntungin kip hi,” ci hi. Hi kammal sia no tung a hong kithangsak tua Lungdamna Thupha ahi hi.