Read Siyin Chin 1 Peter 2 Bible Online

1 Peter 2 - Siyin Chin bible

1 Peter 2

¹Tua ahiciang siatna a minpiang vawk siat in; leilotna, kihitheamsakna, ki eenna, ahibuale kiselnona kam note sungah om nawn heak hen.

²Nausen suaktuungte bangin a thiangtho thaa noaitui tatak du tawntung tavun, tuabang a na neakna taw in na khangto tu uh a, ngupna na nga tu uh hi.

³Laithiangtho in, “Noma mama in, Topa sia bangza in dik ziam ci in na mu zo uh hi,” ci hi.

⁴Mihingte in mannung ngawl hi ci in nial hikale Pathian ii manpha a sak, a teal, a nungta suangpi ahi, Topa kungah pai tavun.

⁵Nuntakna a nei suangte bangin pai tavun a, thaa biakinn sak natu in a kizanghte hi tavun, tua munah Jesus Christ tungtawnin, Pathian tungah a saan thamman, thaa taw kisai sangaw biakpiakna a pia a thiangtho thiampite bangin na seam tu uh hi.

⁶Banghang ziam cile laithiangtho in, “A man nei suang khat ka teal a, Zion ah innkingh suang tu in ka phut hi, tuaciang ama a um peuma in, a thin a kiam ngei buatu uh hi,” ci hi.

⁷No a umte atu in hi suang sia man nei mama hi; ahihang a um ngawlte atu in: inn sate ii mannung a sak ngawl, a nial suang sia a vekpi sung pan a thupibel hong suak hi,” ci hi.

⁸Laithiangtho mundang khat ma ah, “Hi suang in mihingte lutusak tu a, amate a liiksak suangpi suak tu hi,” ci hi. Kammal a up ngawl manin amate lutu uh hi; tuasia in amate atu in Pathian ii deina ahi hi.

⁹Ahihang note sia a kiteal sa minam, Kumpi thiampite, a thiangtho minam, Pathian ii aituam mite, khuazing sung pan a lamdang ama ii khuavak sungah nang hong sam pa Pathian ii a lamdang ngamtatnate a thangsak tu a hong tealsate na hi uh hi.

¹⁰Hun khat lai in, note sia Pathian mite na hi bua uh hi, ahihang tu in ama mite na hi uh hi; hun khat lai in, Pathian ii hesuakna na he bua uh hi, ahihang tu in ama ii hesuakna na saang zo uh hi.

¹¹Hi leitung ah khualmite le ngaltaite ahi no ka lawmte tungah hi bangin, kong thuum nuam hi! Na pumpi cii le sa deinate zawp heak vun, tuate in thaa taw kido tawntung uh hi.

¹²Pathian he ngawlte kawm ah na ngamtatna uh a phat mama hu in amate ii mihing tatsiate ci a hong zungkaw ciangin, na ngamtatna phate hong mu tu a, ama hong pai Ni ciangin, Pathian pok tu uh hi.

¹³Topa hangin mihing thunei peuma ii ukna nuai ah om tavun: a lianbel thunei ahi Kumpilianpa le,

¹⁴mihing tatsiate daan pia tu le, thupha a vawtte a pok tu in a koi, ngamkhen uk maangte khutnuai ah na om tavun.

¹⁵Banghang ziam cile a pha na vawt uhte taw, mihing mawmawte ii a mot paunate na thimsak tu uh Pathian in hong deisak hi.

¹⁶A suakta mite bangin nungta vun; ahizong ngitlo ngamtatnate seal natu in na suatakna uh zangh heak vun a, Pathian ii silate bangin nungta tavun.

¹⁷Mihing theampo zatak vawt vun, na thu uppuite it vun, Pathian thasiana nei vun a, Kumpilianpa zakta vun.

¹⁸No naseamte in a dik thukhual theite bek hi ngawlin, a thuthiam ngawl a thinngam na tote zongh zatakna a cingin pia vun, amate ukna nuai ah na om uh kul hi.

¹⁹Ama deina na phawna uh hu in, ngimthuak ngawl tu bul na thuak uh le, hite tungtaang ah, Pathian in thupha hong pia tu hi.

²⁰Banghang ziam cile na khialna hangin velna na thuak le bang phattuamna om na ziam? Ahihang a maan na sep uh ciang ngawngawn in na thuak veve uh le, Pathian in tua hu in thupha hong pia tu hi.

²¹Pathian in no hong sapna sia hi thu hang ahi hi, banghang ziam cile Christ ama mama in, no atu in thuak a, ama khuani na zui thei natu in ettee tu hong nusiat hi.

²²Ama in mawna vawt ngawl a, ama kam panin leilot thu pusuak hi ci in kuama in za ngeingawl hi.

²³Ama a kilan ciangin selnona kam taw thuk ngawl hi; ngimna a thuak ciang kuama tawng ngawl a thutang thukhenpa Pathian tungah a lametna koi zaw hi.

²⁴Eite, mawna sungah thi a, thutang suana sungah ih nuntak thei natu in, Christ ama mama in, thinglamtee tungah a pumpi taw ih mawnate hong puaksak zo hi. Ama liammate taw note hong damsak zo hi.

²⁵Note sia lam amh tuute bang na hi uh hi, ahihang tu in na thaa uh hong Keampa le Tuucingpa zui tu in, hong kipui kik zo hi.