Read Siyin Chin 1 Peter 3 Bible Online

1 Peter 3 - Siyin Chin bible

1 Peter 3

¹Tuasia bangma in, no zite awng na pasalte khat po Pathian thu um ngawl a om le, na ngamtatna taw Pathian thu um khat na suasak thei natu in na pasalte thu na nit uh kul hi. Kam khat zongh na pau kul ngawl tu hi,

²banghang ziam cile amate in noma ngamtatna sia bangza thiangtho in thasiahuai ziam ci in hong mu tu uh hi.

³Na hoi natu sam vawtzia taw, suangmanphate taw, nikteen puansilh daan taw, tuabang tungtham kipuuanate taw, kizeam heak vun,

⁴tuate taangin na hoina sungah Pathian ii muna ah a man neibel ahi a tul thei ngawl, a dik cikna thiamna le thinsung pha na nei tu uh hi zaw hi.

⁵A bosa hun sung biakna sungah a takkha, Pathian tungah lametna a neite sia, a pasalte thu a nitna uh taw a mealhoi veu suak hi.

⁶Sarah zongh tuabang ma ahi hi; Abraham ii thu ni a, ama sia topa ci in sam hi. Na pha seamin bangma sep kiitak na nei buana uh le, tu in no sia Sarah ii tanute na hi uh hi.

⁷Tuasia bangma in no pasalte zongh, na zite uh thaneam zaw ahi hunlam telthiam in na nuntakpui tu uh kul hi. Amate zatak vawt tavun, banghang ziam cile, amate zongh noma taw kibangin, Pathian ii nuntakna letsong sia sang khawm tu uh hi. Tuabangin na ngamta uhle na thungetna uh bangma in hong nawngkaisak ngawl tu hi.

⁸A tawpna ah: note theampo in a kibang ngaisutna le khuaheakna nei tavun; tuaciang khat le khat unau bangin ki it vun. Khat le khat tungah dikin, kiniamkhiak tavun.

⁹Ngitlona sia ngitlona taw thuk kik heak vun a, haamsiatna zongh haamsiatna taw thuk kik heak vun; tua hi ngawl zaw in thupha taw kithuk zaw vun, banghang ziam cile, note Pathian hong sap lai in piak tu a hong kamciam sia thupha hi zaw hi.

¹⁰Laithiangtho in: “Nuntak nuamin a nungta nuamte le hunphate a mu nuamte in, kam sia pau heak hen a, leilot thuson kheal nanak tahen.

¹¹Amate in siatna pan kikhealin phatna vawt nanak tahen; amate in kilem natu a thin theampo taw a hanciam kul hi.

¹²Banghang ziam cile, Topa in thutangte en a, a thungetna uh ngai hi; siatna a vawtte ahile ama in langpan hi,” ci hi.

¹³A pha vawt tu na lawp uh le, akua in hong nasak tu ziam?

¹⁴Ahihang thumaan nasepna na sep uh ciang ngawngawnin na thuak uh le, bangza in lungdam tu nu ziam! Kuama kiita heak vun a, thinngim heak vun.

¹⁵Ahihang na thinsung ah Christ sia thasiana nei tavun. Topa a hina bangin ama vaang pia vun. Na sungah lametna na nei uh sia sonthiang tu in hong dongh khat pawpo na zo thei natu in a tawntung kinging tavun,

¹⁶ahihang tuabang na son uh ciang, cikna thiamna le kithasiana nei tavun. Na thinsung ah, kithasunna omsak heak vun, tua hile hong kiselno ciangin, Christ nungzuite na hina uh taw na ngamtat phate hong sonsiate sia, amate pauna taw a maizum tu uh hi.

¹⁷Banghang ziam cile Pathian ii deina ahi nale a pha sepna hu a thuakna in, a sia sepna hu a thuakna sangin phazaw hi.

¹⁸Banghang ziam cile Christ in mawna hu in a tawntung atu khatvei lian thi zo hi, note Pathian kungah hong zot pui natu in mipha khat sia mawneite taangin thi zo hi. Ama pumpi thi ahihang thaa sungah kinungtasak zo hi,

¹⁹tuaciang a thaa nuntakna taw ama pai in, thaa thongtaakte munah thuhil hi.

²⁰Hi thaa te sia Noah ii teambaw a sak lai hun a, Pathian ii thin uai takin a ngak, Pathian thu a ni nuam ngawlte ii thaa te ahi hi. Teambaw sungah mihing tawmno — a vekpi in liat bek — tui in laamto in suaktasak hi,

²¹tua tui sia tu in note hong kingupna lim a lak, tui kiphumna ahi hi. Pumpi tung ciniinte silthiangna hi ngawlin, thinsung khentel theina pha taw Pathian tungah kamciam piakna ahi hi. Tua in Jesus Christ thawkikna tungtawn a note hong ngum hi,

²²ama, vantung ah pai zo a, Pathian ii ziatsang ah om in, vantunglalangte, vantung thuneite le vaang neite theampo uk siat hi.