Read Siyin Chin 1 Peter 4 Bible Online

1 Peter 4 - Siyin Chin bible

1 Peter 4

¹Christ in a pumpi ngim thuak ahikom in, note zongh ama khua ngaisutna bangma nei in noma le noma na kithahatsak nanak vun; banghang ziam cile a kuama po pumpi taw a thuak sate sia, mawna sungah a tualta nawn bua hi.

²Tua ahikom tu pan kipanin, na leitung nuntakna uh a om laiteng, mihing ii deinate in uksak heak vun a, Pathian ii deina in uksak hamtang vun.

³A bosa hun sungah Pathian he ngawlte ii sep nop teng, a khomin seam zo nu hi. Na nuntakna uh sia, zummawk ngamtatna, sikvilna, zu khamna, uangtatna, zuneakna, a thasiathuai milim biaknate taw zangh zo nu hi.

⁴Tu in Pathian he ngawlte in amate sansak po maitat, loklenna sungah na kihel nop nawn ngawl uh ciang, lamdang sa in note hong selno uh hi.

⁵Ahihang a nungtate le a thisate tungah thukhen tu in a kingingta sa Pathian mai ah amate in thusitna thuak tu uh hi.

⁶Mihing khat sim tungah, thu kikhen ahi bangma in, amate pumpi nuntakna tungah thu a kikhen sa hi a, a thite zongh Lungdamna Thupha a kihilna sia, tua thu hang ahi hi; amate thaa nuntakna sungah Pathian nuntak bangin, a nuntak thei natu thu a kihil ahi hi.

⁷Na theampo a bo natu hun hong nai zo hi. Thu na nget thei natu in noma le noma ki uk thiamin, na pilvang tavun.

⁸Khat le khat thinsung takpi taw na ki it tu sia thupi ngaisutbel tavun, banghang ziam cile ki itna in mawna tam mama sincip hi.

⁹Phun ngawlin khat le khat zin kido thiam tavun.

¹⁰Mihing sim in Pathian letsong tuatuamte a zeak thiampa bangin, Pathian tung pan a tuam vilvel na saan uh letsongte sia ngualdangte phattuam natu in zangh hamtang vun.

¹¹Thuhil pawpo in Pathian ii ngupna thute hil nanak tahen a; na theampo ah Jesus Christ tungtawnin Pathian tungah pokna a kipiak thei natu in, na a seam pawpo in Pathian piak thangui thatang taw seam nanak tahen, tua Pathian tungah minthanna le vaangletna a tawntung a tawntungin om tahen. Amen.

¹²Ka it lawmte awng, a haksa ze etna na thuak uh hu in, lamdang sa heak vun, a piang ngeingawl thute no tungah hong piang bangin ngaisun heak vun.

¹³Christ ii vaangletna hong kilangh ciangin, lungdamna a cingin na nga thei natu in, ama thuaknate thuakpui na hi uh komin, lungdam zaw tavun.

¹⁴Christ ii nungzui na hi uh hu in hong kizawngsak ahile, na lungdam tu uh hi; tua in a vaanglian Thaa ahi Pathian Thaa Thiangtho in no tungah a om hang ahi hi.

¹⁵Note sungah khat po in ngimna a thuak le zong, ama sia mihing a that, a nguta, khialna lian a vawt, tua ahibuale, midang a kamkup nop hu hi heak hen.

¹⁶Ahizong Tapidaw na hi uh hu in a thuak na hi uh le, maizum in nei heak vun, Christ minpu na hi uh hu in, Pathian tungah lungdamko tavun.

¹⁷Thukhen kipat tu hun hong tung zo a, Pathian aituam mihingte sia thu kikhen masa tu hi. Eite taw hong pan le Pathian kung pan hong pai Lungdamna Thupha a um ngawlte bang suak thong tu ziam?

¹⁸Laithiangtho in: “Miphate a kingup tu haksa hi; tua ahile Pathian a sel mawneite bang suak tu ziam?” ci hi.

¹⁹Tua ahiciang Pathian ii deina a om hu in a thuakte ahile, a kamciam a peal ngeingawl, amate a Bitphuapa sungah, a ngamtat phatnate taw amate le amate kipummuan tahen.