Read Siyin Chin 2 Peter 3 Bible Online

2 Peter 3 - Siyin Chin bible

2 Peter 3

¹Ka it lawmte awng, hi sia in no tung kong laithak a niina hi. Laithakte ngeal sungah na thinsung a om a thiangtho ngaisutnate a kiphawlo thei natu in, hi thute phawsak tu in kong hanciam hi.

²Taanghlai in a thiangtho kamsaangte sonnate le noma ii sawltakte tung pan na nga uh Topa le Hunpa thupiak sia na teptee tu ka dei hi.

³A masa phitin, hi hun khakbel sungah, a nuntakna uh pumpi deinate ii a uksak mihing pawlkhat hong pian tu sia na heak tu ka dei hi. Amate in hong nunau tu a,

⁴hi bangin, hong dongh tu uh hi. “Hong pai kik tu ci in kamciam hong pia ahi bua ziam? Ama koisung om ziam? Ih taanghpupite sia thi siat zo hi, ahihang simlei kibitphua lai pan bangma in, na theampo kibang lai hi!”

⁵Khuangei mama lai in, Pathian in thupia a, vantungte le leitung kibitphua ahi sia amate in thusim ngawl kaltang uh hi. Leitung sia tui sung pan le tui taw in kipiangsak hi,

⁶tuaciangin tua leitung lui sia tui taw ma in tuipi liimna taw kilalsak hi.

⁷Ahihang tu in a om, vantungte le leitung sia meikuang taw a kilalsak natu in, tua a kibang Pathian thupiak sia ma in keamcingin om nginge hi. Pathian a sel mite thu kikhen natu le a kilalsak tu hun, a ni hong thet tu ngakin kikeam zii hi.

⁸Ahizong ka it lawmte awng na khat na mangil heak vun! Topa muna ah ni khat le kum tulkhat sia a kilamdanna om ngawl hi; ama atu in tuate nii sia kibang hi.

⁹Mihing pawlkhatte ngaisut bang hi ngawlin, a kamciamte a tunsak natu in, Topa haisaang ngawl hi. Ama, no tungah a thinsau hizaw hi, banghang ziam cile ama in, kuama lalcipsak nuam ngawl a, a mawna uh pan kisiiksak siat nuam hi.

¹⁰Ahihang Topa Ni sia nguta bangin hong pai tu hi. Tua Ni ciangin vantungte a nging mama khat taw hong bocip tu a, vantung a om nate kuangkeak in, leitung le a sung a om theampo zong bo cimit tu hi.

¹¹Hite theampo tuabangin kilalcipsak tu ahile no sia bangbang mihingte na hi tu uh kisamh tu ziam? Na nuntakna uh sia thiangtho tu a, Pathian atu in a ki aaptuam nuntakna hi tu hi,

¹²vantungte kaanghtumin bocip a, vantung a om nate a sa in a tuithapsak siat tu ni — Pathian ii Ni ngakin, hong thet pal thei natu na sep thei tawpin seam in.

¹³Ahihang ko ka hi uh le, Pathian kamciam omsa sia ka ngak uh hi: thumaan thutang a om tawntung natu mun, vantung thakte le leitung thak ka ngak uh hi.

¹⁴Tuaciangin ka lawmte awng, tua Ni ngakin na om uh ciang Pathian mu na ah na thiantho natu, na sitbaang ngawl natu le ama taw na kilem natu in, ahithei za in hanciam tavun.

¹⁵Ih Topa thin sauna sia ngupna na nga natu in, hunpha hong piakna hi ci in ngaisun tavun. Tua in Pathian piak ciimna zanghin ih it suapui Paul ii hong laithak bangma ahi hi.

¹⁶A laithak theampo sungah tua thulu taw kisai in a at ciang a son thu in hi thu ahi hi. Ama laithakte sungah thu haksa pawlkhat om a, tuate sia heakna nei ngawlte le, kip takin a ding ngawlte in ahi ngawl lalam in son a, Laithiangtho hilna dangte zongh tuabangin son thei uh hi. Tuabangin amate le amate kilalsua uh hi.

¹⁷Ahihang no ka lawmte awng, hi thu na heaksa uh hi. A muanhuai na dinmun pan na puk ngawl natu le ngeina maan zui ngawl a maitatte ii khialnate taw hong lampui thaak ngawl natu in, kikeam tavun.

¹⁸Ahihang ih Topa le Hunpa Jesus Christ heakna le thuthiamna sungah na khangto suak vun. Ama tungah minthanna, tu le a tawntungin om tahen! Amen.