Read Siyin Chin 1 John 2 Bible Online

1 John 2 - Siyin Chin bible

1 John 2

¹Ka tate awng, mawna khialna na vawt ngawl natu in hi lai kong at hi; ahihang khat po in mawna a vawt le Pa mai ah ei taangin hong ngetsak tu khat — thutangpa Jesus Christ ih nei hi.

²Tuaciang Christ mama in eite ii mawna bek hi ngawlin a kuama po ii mawna zongh maisakna a pianna pa ahi hi.

³Pathian thupiakte ih zui le tuasia ciangin ama a he ih hi hunlam ih tel hi.

⁴Khat po in ama ka he hi ci napi, a thupiakte a zui buale mihing leilot hi a, ama sungah thumaan thutak a om bua hi.

⁵Ahihang a kuama po a kammal a zui sia in Pathian a itna kicingtaaksak takpi zo hi. Pathian taw pumkhat ih hina hi thu in hong telsak thei hi:

⁶Pathian taw pumkhatin nungta ing a cite in Jesus Christ ii nuntak bangin a nuntak kul hi.

⁷Ka it lawmte awng, tu a kong at hi thupiakna sia thuthak hi ngawl hi; tuasia in thupiak lui hi a, a kipatciil pan ma na neisa uh ahi hi. Thupiak lui sia noma ii zaaksa thu ahi hi.

⁸Ahihang tu a kong at thupiakna sia a thak hi, banghang ziam cile tua ii a maanna sia Christ sungah kimu a, no sung zongh ah kimu hi. Banghang ziam cile khuazing om nawn ngawl a, khuavak tatak sia taang zo hi.

⁹A kuama po khuavak sungah ka om ci napi a, a suapuite a ensan le ama in tu dong ma in khuazing sungah om hi.

¹⁰A suapuite a it te sia khuavak sungah teang ahikom ama sungah ngualdang khat khialsak thei natu bangma a om bua hi.

¹¹Ahihang a suapuipa a ensan khat pawpo sia khuazing sungah om ahi hi; ama khuazing sungah lampai a, khuazing in a mit tawsak ahikom, a zot natu he ngawl hi.

¹²Ka tate awng, na mawnate uh Christ hangin hong kimaisak zo ahikom lai hong thaak ka hi hi.

¹³Pate awng, a kipatciil pan a om pa na heak uh manin lai kong thaak hi. Tangvalte awng, Ngilo Pa zo zo na hi uh manin lai kong thaak hi.

¹⁴Ka tate awng, Pa na heak uh manin, lai kong thaak hi. Pate awng, a kipatciil pan a om pa sia na heak uh manin lai kong thaak hi. Tangvalte awng, note na tha uh hat ahikom lai kong thaak hi; Pathian kammal no sungah nungta hi, Ngilo Pa na zo zo uh hi.

¹⁵Leitung ahizong leitung na khat pawpo ahizong na it heak vun. Leitung na it uh le Pa it ngawl na hi uh hi.

¹⁶Leitung neisa ahi — hong mawsak thei eima atu lungngulnate, mite ii mit taw mu in a dei sia le mihingte kiphatsakpui leitung na theampo — hite sia khat beak zongh Pa kung pan hong pai ahi bua hi; a vekpi in leitung pan hong pai ahi hi.

¹⁷Leitung le a sungah a om, mihingte lungngul thei na theampo hong bo tu hi; ahihang Pathian ii deina bangin a seamte in a tawntungin nungta hi.

¹⁸Ka tate awng, hun bo tu hong nai zo hi! Christ ii Ngalpa hong pai tu hi ci in no tungah hong kison zo hi; tu in Christ ii ngalte tam mama hong kilangh zo a, tua ahikom hun bo tu sia nai zo hi ci in ih he hi.

¹⁹Hi mite in ei kipawlna sungah hong om tatak ngawl ahi hu in ei hong nusia hi; ei pawl sungah hong om hile ei taw hong omkhawm top tu hi. Ahihang eite taw hong kipawlkhawm tatak ngawl ahi hunlam a kithiangtel thei natu in amate in hong nusia hi.

²⁰Ahihang Christ ii no tungah Thaa Thiangtho hong buak sia na saang zo uh hi, tua ahikom na vekpi in thumaan thutak na tel uh hi.

²¹Tua ahikom lai kong thaakna in thumaan thutak na tel ngawl uh hang hi ngawl hi; thumaan thutak na heak uh hang hi zaw a, tuaciangin thumaan thutak sung pan leilot thu hong piang ngeingawl ci zongh na heak uh ahi hi.

²²Tua ahile a leilot pa sia akua ziam? Jesus sia Messiah hi ngawl hi a ci pawpo in leilot pa ahi hi. Tuabang mihingte sia Christ ii Ngalte ahi uh hi — amate in Pa le Tapa nial khawm hi.

²³Banghang ziam cile Tapa a nial pawpo in Pa zongh nial hi. Tapa a saang pawpo in Pa zongh nei hi.

²⁴Tua ahiciang a kipat pan na zaak uh ngupna thu sia noma thinsung uh ah na keamcing hamtang tavun. Tua thu na keamcing uh le Pa le Tapa taw pumkhatin na nungta tawntung tu uh hi.

²⁵Tuaciangin Christ ama mama ii eite hong piak tu hong kamciam sia — tawntung nuntakna ahi hi.

²⁶Note hong theam tu a hong kipante ii thu hong at khi hi.

²⁷Ahihang note na hi uh le, Christ in a Thaa no tungah hong buak zo hi. Note sungah ama Thaa a om laitengin hong hil tu kuama dang na kitaangsamh bua uh hi. Banghang ziam cile ama Thaa in na theampo huvau hong hil a, hong hil teng sia thumaan hi a, khial ngawl hi. Tua Thaa ii hilna na ni vun a, Christ taw pumkhat in na om vun.

²⁸Hi hi, ka tate awng, ama taw pumkhat in na om vun, tua hile ama hong kilangh ciangin eite sia thinletna taw ih kidim tu a, ama ii hong pai Ni ciangin maizum in ih buk a kul buatu hi.

²⁹Christ sia thumaan thutang hi ci in na he uh hi; tua ahikom na heak tu uh thu sia a maanin a seam peuma Pathian ta hi ci thu ahi hi.