Read Siyin Chin 1 John 3 Bible Online

1 John 3 - Siyin Chin bible

1 John 3

¹Pa in ei sia bangza in hong it ziam tel tavun! Ama hong itna lian mama ahikom ei sia Pathian ii tate hong kici hi — tuabang takpi ma ih hi hi. Leitung in Pathian he ngawl ahikom leitung mite in ei hong he ngawl hi.

²Ka it lawmte awng, ei sia tu in Pathian ii tate ih hi hi, ahihang bang suak tu hi ziam ci in kician ngawl lai hi. Ahihang Christ hong kilaak ciangin eite sia ama taw kibang tu ih hi hunlam ih he hi, banghang ziam cile ama sia ahi bang tatakin ih mu tu hi.

³Christ sia thiangtho ahi bangma Christ sungah hi lametna a nei mihing peuma ama le ama a thiangtho in kikeam hi.

⁴A kuama po mawna khialna a vawt peuma in Pathian thukham paltan ahi hi, banghang ziam cile mawna ih ci sia in thukham paltanna ahi hi.

⁵Mawnate a la keak tu in Christ hong kilangh hi a, ama sungah mawna om ngawl hi ci in na he uh hi.

⁶Tua ahikom Christ taw kipumkhat a, a nungta peuma mawna zom suak nawn ngawl hi; ahihang a kuama po mawna vawt a zom suakte sia ama a mu ngeingawl ahibuale a he ngeingawlte ahi hi.

⁷Ka tate awng, kuama in theamsak heak vun! Christ sia thumaan thutang ahi bangma a kuama po thutangin a seamte sia thumaan thutang ahi hi.

⁸A kuama po mawna vawt a zom suakte sia Doaimangpa ii neisa ahi hi, banghang ziam cile a kipat pan ma, Doaimangpa in mawna vawt zo hi. Tua hang ma in Doaimangpa ngamtatna teng a susia tu tatak ma in Pathian Tapa hong kilangh hi.

⁹Pathian ta ahi peuma sia mawna vawt a zom suak bua hi, banghang ziam cile Pathian pianzia mama ama sungah om hi; tuaciangin Pathian sia ama Pa hi zo ahikom mawna vawt a zomsuak thei bua hi.

¹⁰Pathian ii tate le Doaimangpa tate kilaklaw ah, a kilamdanna in hisia ahi hi: thutangin a ngamta ngawl ahibuale ngual a it ngawl khat pawpo sia in Pathian ta ahi bua hi.

¹¹A kipat pan ma na zaak uh thu in: eite khat le khat ih ki it hamtang natu thu ahi hi.

¹²Eite Cain taw ih kibang buatu hi; ama sia Ngilo Pa ii neisa hi a, a suapuipa tatak Abel thatlum hi. Banghang Cain in ama thatlum ziam? Banghang ziam cile ama ii ngamtatnate sia maan ngawl a, a suapuipa ngamtatnate maan ahihang hi.

¹³Tua ahikom ka suapuite awng, leitung mite in no hong ensan le, lamdang na sa heak vun.

¹⁴Eite in ih suapuite it ih hi hu in, thina nusia a, nuntakna sungah theng zo ih hi hunlam ih he hi. Ngual a it ngawl peuma sia thina vaangletna nuai ah om lai hi.

¹⁵Ngualdang a ensan peuma sia mihing that hi a, mihing that khat in, ama sungah tawntung nuntakna nei ngawl hi ci in na he uh hi.

¹⁶Christ in eite atu a nuntakna hong piakna hangin eite in ki itna sia bang ziam ci in ih he hi. Tua ahiciang eite zongh, ih suapuite atu ih nuntakna ih piak ngam kul tu hi!

¹⁷A hau khat in a cimaw, a suapuipa kisapna mu napi hesuak ngawlin a en thong le Pathian ka it hi, bangbangin ci thei tu ziam?

¹⁸Ka tate awng, ih ki itna sia kam le muk bek ih hisak buatu hi; ngamtatna taw a kilangh ki itna takpi ahi kul hi.

¹⁹Tua ahikom thumaan thutak sungah ih om hunlam sia tu a bangin ih he tu hi; Pathian mai ah kimuanna ih nei natu sia hi bang teng hang ahi hi.

²⁰Ih thinsung ah maw ih kisa le, eite ii ih thinsung kitelna sangin Pathian sia lianzaw a, ama in na theampo he siat hi ci in ih he hi.

²¹Tua ahikom ka it lawmte awng, ih thin sung ah kithasunna ih nei bua nale Pathian mai ah thinhanna ih nei hi.

²²Ama thupiakte zui a, ama diksak bang ih ngamtat manin, ama tung pan ih nget pawpo ih nga hi.

²³Ama hong thupiak sia bang ziam cile a Tapa Jesus Christ ih up tu le Christ ii hong thupiak bangma khat le khat ih ki it natu ahi hi.

²⁴A kuama po Pathian thupiakte a zui le ama sia Pathian taw kipumkhat in a nungta hi a, Pathian zongh ama taw pumkhat in nungta hi. Tuaciang Pathian hong piaksa Thaa hangin Pathian sia ei taw kipumkhatin nungta ahi hunlam, ih he hi.