Read Siyin Chin Thukhente 13 Bible Online

Thukhente 13 - Siyin Chin bible

Thukhente 13

¹Israel te in TOPA tungah maw kik a, tuaciang TOPA in amate sia Philistine te in kum 40 sung uksak hi.

²Tua hun laitakin Zorah khua ah Manoah a ci pasal khat om hi. Ama sia Dan nam sung pan ahi hi. A zi in ta nei thei ngawl hi.

³TOPA vantunglalang khat ama kungah kilangh a, “Nang sia ta nei thei ngawl ni hi, ahihang hai ngawlin na ngai tu a, tapa khat na nei tu hi.

⁴Sapittui, beer ahibuale a kikhaam an khat pawpo na neak ngawl het natu kidawm in;

⁵na tapa a pian zawkciang, a sam meetsak ngeingawl het tu ni hi, banghang ziam cile a pian ni pan kipan ama sia Pathian atu a kituam koi nazirite [1] khat in ki aap tu hi. Ama in Philistine te khut sung pan Israel te suataksak natu nasep kipan tu hi,” ci hi.

⁶Tua zawkciang tua nu a pasal kungah pai in, “Pathian mi khat hong pai a, ama sia Pathian vantunglalang bangin kiitakhuai mama hi. Ama hong paina mun ka dongh bua a, a min hong son bua hi.

⁷Ahizong ama in kei sia naupaai in tapa khat nei tu hong ci hi. Ama in sapittui le beer, ahibuale a kikhaam an peuma ka neak ngawl natu in thu hong pia hi, banghang ziam cile patang sia a nuntak lai teng Pathian tungah nazirite khat bangin ki aaptuam tu hi,” hong ci hi.

⁸Tuaciang Manoah in TOPA tungah thungen a, “TOPA awng nong hesuakna in, ko nong puak Pathian mipa ma hong paisak kik ta'n a, pano sia a sua ciang bangbang ngamta tu khu ziam ci in hong sonsak ta'n,” ci hi.

⁹Pathian in Manoah nget bangin, vantunglalang sia tua nu lo sungah a to laitakin pai kiksak hi. A pasal Manoah sia ama taw a om bua hi,

¹⁰Tua ahikom ama thakhatin tai a, a pasal mun ah, “En in! Khatvei ni a, hong pai pa ma kei kungah hong kilangh kik hi,” ci hi.

¹¹Manoah hong dingin a zi nung zui hi. Tua pa kungah pai in, “Ka zi kungah thuson sia nangma na hi ziam?” ci in dongh hi. “Hi khi hi” ci in zo hi.

¹²Tuaciang Manoah in, “Na paunate hong taangtun tak ciang patang sia in bang teng a vawt kul tu ziam? Bangbang nuntak zia taw nungta tu ziam?” ci in dongh hi.

¹³Vantunglalang in, “Na zi in ka sonsa theampo a vawt hamtang kul tu hi.

¹⁴Ama in sapitkung pan a piang peuma ne ngawl het tu hi; sapittui, beer ahibuale a kikhaam an ne ngawl het tu hi. Ama tungah ka sonsa theampo cing takin a sep kul tu hi,” ci in zo hi.

¹⁵Manoah in tua pa sia Pathian ii vantunglalang ahi hunlam he ngawl ahikom, ama mun ah, “Hesuakna taw na pai heak lai in. Nangma atu kealmoi khat huan phot tawng,” ci hi. Ahihang vantunglalang in, “Ka tawlnga zii zonghin, na an ne ngawl tu khi hi. Ahizong na vawt veve nuam le tuasia TOPA atu meihal biakpiakna in nei in,” ci hi.

¹⁷Manoah in, “Na min hong son ta'n, tua hile na pauna teng a tun tak ciang, kong patoai thei tu uh hi,” ci in zo kik hi.

¹⁸Vantunglalang in zo a, “Banghangin ka min he nuam ni ziam? Ka min sia a lamdang min hi,” ci hi.

¹⁹Tua ahikom Manoah in kealmoi khat la a, antang pawlkhat taw kopin nalamdang te a seam TOPA atu biakna suangtau tungah biakpiakna in pia hi.

²⁰Biaknatau tung panin meikuang a paito laitakin, Manoah le a zi in TOPA ii vantunglalang sia meikuang sung panin vantung a zotto mu hi. Manoah in tua pa sia TOPA ii vantunglalang hi ci in phawk a, a zi taw amate nii sia lei ah a bok lamin kisepsuk uh hi. Amate in tua vantunglalang sia a mu kik nawn bua uh hi.

²²Manoah in a zi munah, “Eima ih thi kul tu hi, banghang ziam cile eima in Pathian ih mu zo hi,” ci hi.

²³Ahihang a zi in, “TOPA in ei hong thatlum nuam hi thong le ih biakpiakna te hong saang ngawl tu hi; ama in hite theampo hong lak ngawl tu a, tu in hi bang thute hong son ngawl tu hi,” ci in zo hi.

²⁴Tua nu in tapa khat hong hing a, a min sia Samson phuak hi. Tapano sia hong khang a, TOPA in thupha pia hi.

²⁵Zorah le Eshtaol kilaklaw Dan ii Ngiaphual sungah a om laitakin, TOPA vaangletna in ama thahatsak tu in kipan hi.