Read Siyin Chin Thukhente 15 Bible Online

Thukhente 15 - Siyin Chin bible

Thukhente 15

¹Hun tawmvei zawkciang Samson sia, zungtaang laak hun laitakin, kealmoi khat kai in a zi kungah haw hi. A sunghpa munah, “Ka zi omna inndoi sungah pai nuam khi hi,” ci hi. Ahihang ama in a tum tu a oai bua hi.

²Samson munah, “Ensan takpi hi vak teh ci in kong um a, tua ahikom na lawmpa hong piaksak khi hi. Ahihang a nau nu sia ama sangin a mealpha zawsap hi. A taangin ama la thei ni hi,” ci hi.

³Samson in, “Tu in, Philistine mite tungah ka vawt po kei hong kimawsiat thei ngawl tu hi!” ci hi.

⁴Tua ahikom ama pai in, ngia zathum man hi. A meite nii veu nii veu in sawm khawm a, a sawmna khaubawk ah meisip thiat hi.

⁵Tuasia zawkciang meisipte halin Philistine te ii zungtaang lo sungah tha hi. Hi bangin ama in zungtaang a kila sa te bek hi ngawlin, laak ngawl laite le olive ciinna huante zongh haltham hi.

⁶Philistine te in akua in vawt ziam ci in a kat uh ciang Samson ii vawt hi a, banghang tuabangin vawt ziam cile Timnah khua ah a sunghpa in Samson ii zi sia Samson ii lawmte khat a piaksak hang ahi hunlam tel uh hi. Tua ahikom Philistine te va pai a tua nu a hal lup zawk uh ciang a pa inn zongh haltumsak uh hi.

⁷Samson in amate munah, “Tua ahile no hi bangin ngamta nu hi! Hite kong thuk kik mateng tawp ngawl tu in kiciam khi hi!” ci hi.

⁸Ama in amate sim ngawp a, tam ma thatlum hi. Tua zawkciang ama pai in Etam lianghawng sungah om hi.

⁹Philistine te hong pai in Judah ah ngiaphual saat a, Lehi khua sim uh hi.

¹⁰Tuaciang, Judah mite in “Banghangin ko hong sim nu ziam?” ci in dongh hi. Amate in “Samson man tu le ama ii ko hong vawt bangin ama tungah vawt tu in hong pai khu hi,” ci in zo uh hi.

¹¹Tua ahikom Judah te mihing 3000 sia Etam liang hawng ah pai in Samson munah, “Philistine te sia ei hong ukte ahi hunlam he ngawl ni ziam? Ko bang hong law thong ni ziam?” ci uh hi. Ama in, “Kei tungah hong vawt bangin amate tungah vawt khi hi,” ci in zo hi.

¹²Amate in, “Hi sungah kong paina uh sia nangma letheen tu le amate tungah nangma aap tu in hong pai khu hi,” ci uh hi. Samson in, “Noma tatak ma ii nong thalup ngawl natu kamciam hong pia tavun,” ci in ngen hi.

¹³Amate in, “Pha hi, hong letheen bek tu a, amate tungah hong aap tu khu hi. Ko nang hong that ngawl tu khu hi,” ci uh hi. Tuabangin amate in khauzeen thak nii taw heen cip in lianghawng pan cia pui uh hi.

¹⁴Lehi a thet ciang, Philistine te in ama ausan in hong del uh hi. Thakhat thu in TOPA vaangletna in ama hatsak hi, tuaciang ama in a khut le a baan a heenna khauzeente sia khauzam kaanghdeau sa bang phetin saantat hi.

¹⁵Tuaciang ama in a thi tuung laa khat ii khangu mu hi. Ama kunsuk in tawm a, tua taw pasal tulkhat thatlum hi.

¹⁶Tua ahikom Samson in, “Laa khangu taw miza a tul that ing nge, Laa khangu taw a luang uh kangthing bang siah ing,” ci in lasa hi.

¹⁷Tuasia zawkciang, a laa khangu vawk hi. Hi bang a pianna mun sia Ramath Lehi kici hi.

¹⁸Samson sia a dangko mama a, TOPA tungah hi bangin ko hi, “Zawna lianpi hong pia zo ni hi; tu in dangko in thi tu khi ziam, hi Pathian he ngawl Philistine te in hong man tu ziam?” ci hi.

¹⁹Tuasia ciang Pathian in tua mun Lehi ah leivang khat honsak a, tua ii sung pan tui hong pusuak hi. Samson in tua tui dawn a, ama a om nuamtuam zawhiat hi. Tua ahikom tua ciktui sia Hakkore kici a, Lehi ah om nginge lai hi.

²⁰Philistine te ii uk hun sung ma ah Samson in Israel kum kul sung lampui hi.