Read Siyin Chin Thukhente 16 Bible Online

Thukhente 16 - Siyin Chin bible

Thukhente 16

¹Ni khat Samson sia Philistine te khuapi Gaza ah pai in, tua munah pumpi kizuak numei khat mu a, tua nu lup pui hi.

²Gaza mite in Samson sia tua munah om ci in he ahikom amate in tua mun kiim uum a, zankhuateakin khuapi kongpi ah ama ngakin om uh hi. Zankhuateak in amate thim khipkhep in om a, “Khua hong vak dongin ih ngak tu a, tuasia ciang ama ih thatlum tu hi,” ci in ngaisun uh hi.

³Ahihang Samson sia lupna tungah zankim dong bek om hi. Tua zawkciang ama tho a khuapi kongpi hong zamh a — kongkhate, khuamte le kongkalnate theampo phai keak hi. Ama in tuate a liang ah kisuanh siat in, mualtung Hebron a kimu suk theina mun dong pua to hi.

⁴Hisia zawkciang Samson in Sorek Kuam sungah a teang Delilah kici numei khat taw ki it hi.

⁵Philistine kumpi ngate sia tua nu kungah pai in, “Ama sia banghangin tuza in hat a, bangbang hi leang ama kizo thei tu a, letheen in a cimaw in kikoi thei tu ziam ci in nangma tung hong son thei natu in, Samson theam vawt in. Ko khat simin ngunntang tul le zakhat tek hong pia tu khu hi,” ci uh hi.

⁶Tua ahikom Delilah in Samson mun ah, “Nong hesuakna in hong son ta'n, nang sia bang in hong hatsak mama ziam? Khat po in nang hong letheen nuam in hong cimawsak nuam le bangbangin hong hi tu ziam, hong son ta'n,” ci hi.

⁷Samson in, “Thalkhau thak a ko ngawl lai sali taw hong kiletheen le ngualdang khat pawpo bangma in ka tha zawm tu hi,” ci in zo hi.

⁸Tua ahikom Philistine kumpite in Delilah kungah thalkhau thak a ko ngawl lai zam sali hong paipui uh a, ama in Samson khii cip hi.

⁹Ama in pasal pawlkhat sia doituam dangkhat sungah ngaksak a, tuate zaak tu in, “Samson! Philistine te hong pai hi!” ci in au hi. Ahihang ama in khauzamte mei taw a kithutha ciang a tat bangin a thalkhaute hong saantat hi. Tuabangin amate in Samson ii thahat theina thuku sia he zo ngawl lai hi.

¹⁰Delilah in Samson munah, “En in, nang kei sia a mawmaw bangin hong vawt ni hi, thumaan hong son ngawl ni hi. Nong hesuakna in hong son ta'n, bangbang hi le khat po in nang hong letheen thei tu ziam?” ci hi.

¹¹Ama in, “Amate in a kizangh ngeingawl lai khauzeen thak taw hong sawm le ngualdang khat pawpo bangin ka tha zawm tu hi,” ci in zo hi.

¹²Tua ahikom Delilah in khauzeen thak te la in a heen zawkciang, “Samson! Philistine te hong pai hi,” ci in au hi. Inndoi khat sungah pasal pawlkhat in ngak nginge hi. Ahihang Samson in a khut heen na khauzeente khauzam bang phetin saantat hi.

¹³Delilah in Samson munah, “Kei sia a mawmaw khat vawtin hong vawt lai ni hi, thumaan hong son ngawl ni hi. Khat po in nang bangbangin hong letheen thei tu ziam, hong son ta'n,” ci hi. Ama in, “Ka sampheak lom sali teng hong pheaksakin, thiamtana sungah taanelh in tuk kilhna khat taw hong ngatsak le ngualdang khat bangin ka tha zawm tu hi,” ci in zo hi.

¹⁴Delilah in ama a mut natu in oai a, a samlom sali teng thiamtana khat sungah taanelh hi. Ama in a sam tukkilhna taw a ngatsak zawkciang “Samson! Philistine te hong pai,” ci in au hi. Ahihang ama hong khanglo a, a sam sia thiamtana pan hong nuk keak hi.

¹⁵Tua ahiciang Delilah in ama tungah, “Nong it tak ngawl po bangbangin kong it ci thei ni ziam? Thumvei vaset a mawmaw bangin hong vawt zo ni hi, bang in tuza ta in hong hatsak ci sia hong son ngawl lai ni hi,” ci hi.

¹⁶Ama in ni sim, ni simin dongh hi. Ama in tua nu ii a kut tawntung sia cimtak pi in cimtak a,

¹⁷a khakbel ciang a thu maan son hi. Ama in “Ka sam sia hong kimeetsak ngeingawl hi, kei sia ka sua pan kipan Pathian tungah nazirite khat in hong ki aaptuam hi. Ka sam hong kimeetsak hi le, ka thahatna ka taan tu a, ngualdang khat pawpo bangma in ka tha zawm tu hi,” ci hi.

¹⁸Delilah in Samson ii thumaan a son hunlam a phaw ciangin, Philistine kumpipa te tungah thupuak in, “Khatvei ma hong pai kik tavun. Ama in thumaan hong son zo hi,” ci hi. Tuasia ciang amate hong pai a, a sum teng hong keng uh hi.

¹⁹Delilah in Samson sia a kaang ah a lu sialin a mut natu oai a, tuasia zawkciang pasal khat samin, a sam lom sali teng meetsak hi. Tua zawkciang ama in Samson sia vawt sia zazaan hi, banghang ziam cile a hatna teng taan zo hi.

²⁰Tua zawkciang ama in, “Samson! Philistine te hong pai hi!” ci in au hi. Ama khanglo a, “Ka kisuut tu a, a ngei bangma in ka suakta tu hi,” ci in ngaisun hi. TOPA ii ama a nusiat hunlam a he bua hi.

²¹Philistine te in ama man a, a mittangte khelkeaksak uh hi. Amate in ama sia Gaza ah paipui a, taau khau taw khii in, thonginn sung an ngoaina ah naseamsak uh hi.

²²Ahihang a sam sia hong sau kik hi.

²³Philistine kumpite sia amate ii biak Dagon pathian tungah sangaw biakpiakna lianpi khat taw lungdam poai khaam tu in kikhawm tua uh hi. Amate lasa in, “Ih pathian in ih ngal pa Samson hong zosak hi!” ci uh hi.

²⁴Amate diksa mama ahiciang in, “Samson sam tavun a, ih et nop tu in ngamtasak tawng!” ci hi. Amate in Samson thong sung pan pusua a, amate mu nop tu in a ngamtatsak zawkciang khuampite kilaklaw ah dingsak uh hi. A mihonte in ama a mu uh ciang, amate ii pathian tungah pokna lasa uh hi: “Ih pathian in ih ngalpa, ih ngam lalcipsak a eite tam mama hong that pa hong zosak hi.”

²⁶Ama khut pan len in a paipui tangvalpa munah Samson in, “Innpi a dingsak khuampite hong thamsak ta'n, tuate neal nuam khi hi,” ci hi.

²⁷A inn sia numei le pasal a dimteak in om hi. Philistine kumpi nga te zongh tua munah om a, tuaciang innkhum tungah numei le pasal kingawm mihing tulthum khawng zongh Samson ii poai lak en in om uh hi.

²⁸Tuasia ciang Samson in thu ngen a, “Vaanglianpipa TOPA awng, kei hong phawk ta'n; nong hesuakna in Pathian awng, ka mittang te ngeal hong khelsak Philistine te tungah hi ka hatna khatvei zangh in phu ka lam zawk natu in ka thahatna khatvei bekma hong pia lai ta'n,” ci hi.

²⁹Tua ahikom Samson in innpi a dingsak a laizang a po suut khuampite nii zamh hi. A khut lang le lang taw tua suut khuamte nii len in sawnvawk a,

³⁰tuaciang “Philistine te taw hong thi khawmsak ta'n ci in au hi. Ama in a tha nei theampo taw sawn a, tuasia ciang inn hong cimh in, kumpi nga teng le a dang theampo delcip hi. Samson in a nuntak lai a thalup sangin a thi ciangin a tamzaw thatlum hi.

³¹A suapuipate le a innkuanpui dangte hong paisuk a, a luang phaam hi. Amate in ciapui a, Zorah le Eshtaol kilaklaw, a pa Manoah ii thaan sungah phum uh hi. Ama sia Israel lampui kum kul seam hi.