Read Siyin Chin Thukhente 18 Bible Online

Thukhente 18 - Siyin Chin bible

Thukhente 18

¹Tua hun lai in Israel ngam ah kumpi om ngawl hi. Tua hun laitak ma in Dan nam in amate laak tu ngam zong uh hi, banghang ziam cile Israel namte sung panin amate tan tu in ngam nga mun nei ngawl lai hi.

²Tua ahikom Dan mite thuhe pasal nga sia amate ii nam innkuan teng sung pan teal in, Zorah khua le Eshtaol khua pan paisak a, ngamsung vil kawkoai tu le thu kankuu tu in sawl uh hi. Amate Ephraim mualtung ngam hong thet uh ciang Micah ii inn ah tung uh hi.

³Amate tua munah a taam sung Levi te khangmoi pa khat ii pau za uh hi, tua ahikom tua pa kungah amate pai in, “Hi sungah bang hi ni ziam? Akua in nang hi sungah hong paipui ziam?” ci in dongh uh hi.

⁴Tua pa in zo a, “Keima in Micah taw vaihawmna khat ka nei uh a, ama ii thiampi seam tu in sum taw hong tham hi,” ci hi.

⁵Amate in ama munah, “Nong hesuakna in Pathian dongh in a, ko khualhawna vai a vang natu ziam?” ci hi.

⁶Thiampipa in zo kik a, “No thin toi tu bangma om bo. TOPA in no sia hi khualhawna uh ah hong keam hi,” ci hi.

⁷Tua ahikom pasal nga teng sia Laish khua ah pai hi. Amate in tua mite sia Sidon mite bangma in ngammuang takin a teang mu uh hi. Amate sia a kilem, dai khipkhep a om mite hi a, kuama taw bangma kituu ngeingawl hi; a kitaangsap uh theampo nei uh hi. Amate sia Sidon mite kung pan a khuala mama na ah teang in, midang taw bangma kizopna a nei bua uh hi.

⁸Pasal nga teng Zorah le Eshtaol ah hong cia kik ciang, a ngammipuite in bang teng mu ni ziam ci in dongh uh hi.

⁹Amate in, “Hong pai tavun, Laish te sim tawng. A ngam ka mu zo uh a, ngam pha mama khat hi. Hi sungah bangma vawt ngawlin om thawthong heak vun; hong manlang tavun! Pai in tua ngam la vun!

¹⁰Tua mun na thet uh ciang a mite sia bangma khuaphawk meal ngawlin a om na mu tu uh hi. Tuasia ngamlian khat hi; mihing khat ii dei thei theampo nei a, Pathian in no tungah tua ngam hong pia zo hi,” ci uh hi.

¹¹Tua ahikom Dan nam sung pan pasal 600 sia Zorah le Eshtaol ah pai in ngal sim tu in kinging uh hi.

¹²Amate kuanto a Judah ngamsung Kiriath Jearim ah ngiaphual saat uh hi. Tua hu in a mun sia Dan Ngiaphual kici top lai hi.

¹³Amate tua mun pan paisuak in Ephraim mualtung ngam Micah ii inn theng uh hi.

¹⁴Tuaciang Laish khua kiim ngam vil tu in a pai pasal nga teng in a kitholpuite mun ah, “Hi sung innte khat sungah thingngel milim ngunn taw a kituam khat a om sia na he uh ziam? Milim dangte le ephod khat zongh om hi. Tuate bang law leang na ci uh ziam?” ci hi.

¹⁵Tua ahikom amate Micah inn sung khangmoi Levi pa omna ah pai a, Levi pa munah bang na cici ziam ci in dongh uh hi.

¹⁶Tua lanin Dan pan ngalkap 600 ngalsim tu a kinging teng sia kongpi ah ding uh hi.

¹⁷Thiampipa kongpi ah ngalkap zaluk te taw a om lanin thudawpku nga teng sia inn sungah tangtan in hong tum uh a, ngunn taw a kituam thingngel milim, milim dangte le ephod te a la uh hi.

¹⁸Tua pasalte Micah inn sungah tumin biakna vanhte a laak uh ciang thiampipa in dongh a, “Bang vawt nu ziam?” ci hi.

¹⁹Amate in, “Om nginge po in. Kam khat zongh pau heak in. Ko taw hong pai in ko ii thiampipa le thudokpa hong hi ta'n. Pasal khat ii innkuan atu thiampi na sep sangin Israel minam bup atu seam nuam zaw ngawl ni ziam?” ci uh hi.

²⁰Hi kammalte in thiampi pa sia lungkimsak mama ahikom ama in biakna vanh thiangthote la in amate taw ton hi.

²¹Amate kiheak a, a tate, a ngannote le a neisa teng taw dingkhia uh hi.

²²Amate tua inn pan, a khuala thithimna a thet zawk uh ciang, Micah in a innpaamte ngal sim tu in sam hi. Amate in Dan mite pha uh a,

²³tuaciang ausan uh hi. Dan pasalte in Micah mun ah, Bang thu om ziam? Hi mihon te bang hi lialua ziam?” ci in dongh uh hi.

²⁴Micah in zo kik a, “‘Bang thu om ziam’ na cisia, bang na cinopna ziam? Noma in ka thiampipa le pathian ka vawtte la in, paipui hi ngawl nu ziam?! Kei atu bang om nawn thong ziam?” ci hi.

²⁵Dan pasalte in, “Hi mite thin uuksakin, nangma hong sim tu na uuk lui bua nale bangma dang pau ngawlin om lete phazaw hi. Tua ahibuale nang le na innkuan bupin thi tu nu hi,” ci hi.

²⁶Tuasia zawkciang amate paisuak uh hi. Micah in amate sia ama atu thahat leih ci in mu ahikom ama heak kikin inn ah cia hi.

²⁷Dan pasalte in thiampipa le Micah ii vawt vanhte a laak zawk uh ciang pai a, Bethrehob taw a kuam sung a omkhawm, ngamdai mite ii khua, Laish sim uh hi. Amate in tua munah a teangte thatlum in a khua haltham uh hi. Amate a hun tu kuama a om bua hi, banghang ziam cile amate sia Sidon pan kikhuala si, midang kuama taw kizopna nei ngawl si hi. Dan mite in a khua saat kikin tua munah teang uh hi.

²⁹Amate in a khua min zongh Laish pan Dan ci in Jacob ii tapa a taanghpupi uh Dan min lawna in kheal uh hi.

³⁰Dan mite in tua milim sia biak tu in koi uh a, tuaciang, Gershom ii tapa, Moses ii tupa Jonathan in Dan nam atu in thiampi seam a, tuaciang ama ii suan le paalte zongh tua mite sal tang tu in a kipaipui hun dong thiampi veu seam uh hi.

³¹Shiloh ah Pathian biakna Puanbuk a om lai theampo in Micah ii milim sia tua munah taang top hi.