Read Siyin Chin Thukhente 19 Bible Online

Thukhente 19 - Siyin Chin bible

Thukhente 19

¹Tua hun lai Israel kumpi a nei ma in, Ephraim mualtung ngam pek ah Levi te khat teang hi. Ama in Judah ngam Bethlehem khua panin numei khat a zino tu in la hi,

²ahihang tua nu sia ama tungah thin uuk ahikom Bethlehem khua a pa inn ah cia kik a, tha li taam hi.

³Tuasia ciang pasal pa in ama sam kik a, heak pui kik tu in zol sawm hi. Ama in a naseampa le laa nii keng hi. Tua nu in Levi pa inn sungah tumpui a, a pa in a mu ciang pha takin zindo hi.

⁴A pa in a taam natu a ngenget ciang ni thum taam hi. Amate nupa an nekhawm in, tua munah zan taam uh hi.

⁵A ni li ni zing ciang, zingtuung in tho a, vaiding tu in kithoai uh hi. Ahihang Levi pa munah a pa in, “Bang khat po ne phot vun. Noma atu phazaw tu hi. A zawkciang na ding thei tu uh hi,” ci hi.

⁶Tua ahikom pasalte nii zong hong to in, nekhawm dawnkhawm in om uh hi. Tua zawkciang a pa in, “Nong hesuakna in hi sungah zan taam lai vun a, nuam takin om vun,” ci hi.

⁷Levi mi pa sia pai tu a kipat ciang a pa in taam lai a sawl ahikom zan khat taam thua hi.

⁸A ni nga ni zingtuung in vaiding tu a kipat ciang a pa in, “Nong hesuakna in bang khat po ne vun. Nisaang dong ngak vun,” ci hi. Tua ahikom pasalte nii an nekhawm uh hi.

⁹Pasal pa, a zino le a naseampa khatvei ma vaiding tu hong kipat ciangin, a pa in, “En vun! tu sia nitak hi dektak zo hi; zan taam lai tavun. Hai ngawlin khua hong zing tu hi; hi sungah taamin nuam takin om vun. Zing ciang khualhaw tu in na tho pal tu uh a, na cia tu uh hi,” ci hi.

¹⁰Ahihang pasal pa in tua munah zan khat taam thua nuam ngawl ahikom ama le a zino, a naseampa le a tung tona kungh kithua sa a laate nii taw vaiding hi. Amate Jebus (Jerusalem hi) nai hong thet uh ciang ni niam zo ahikom naseampa in a topa munah, “Banghangin hi Jebus khuapi ah tawlnga in zan taam maw tu hi ziam?” ci hi.

¹²Ahihang a topa in, “Israel mite teenna ahi ngawl khuapi ah ei ih tawlnga buatu hi. Ih paitan tu a, tawm a khuala zawna Gibeah ahibuale Ramah ah zan ih taam tu hi,” ci hi.

¹⁴Tua ahikom amate in Jebus kaantan in paisuak uh hi. Benjamin namte ii ngamsung Gibeah khua hong thet ciangin ni tum hi.

¹⁵Amate lampi pan pial in tua munah zan taam tu in hong zuan uh hi. Amate khuapi sungah hong tum in, khuapi khawlmun ah hong to uh a, ahihang amate a inn ah zan ngiak tu in a paa a om bua hi.

¹⁶Amate tua munah a om laitakin, pasal huai khat sia a lo nasep a tawp zawkciang a kung nai ah hong cia hi. Ama pianna sia Ephraim mualtung ngam hi a, ahihang tu in Gibeah ah teang hi. (Tua munah midangte ahi uh le Benjamin nam pan veu hi).

¹⁷Pasal huai pa in khuapi khawlmun ah khualhaw pa mu a, “Koisung pan hong pai a, koisung zuan tu nu ziam?” ci in dongh hi.

¹⁸Levi mi pa in zo kik a “Ko Judah ngam Bethlehem khua ah haw khu hi, tu in ka inn uh Ephraim mualtung ngam thukna ah cia tu khu hi.

¹⁹ka laate atu sa an le taangphaw zongh nei a, anluum le sapittui zongh ka zino le kei le ka naseampa atu taw nei napi kuama in zan hong ngiaksak ngawl hi, Ka kisap theampo ma nei khu hi.

²⁰Pasal huai pa in, “Ka inn ah hong saang khi hi! Pha takin hong keam tu khi hi; khuapi khawlmun ah ngia kul ngawl hi,” ci hi.

²¹Tuabangin amate ciapui a, a laate vaaksak hi. A zinte a peang uh sil in, an ne uh hi.

²²Amate nuam takin a om laitak thakhat thu in khua sung pan numei le pa vai in a paktat pawlkhat in kiim uum a, kongkha nawmngawp uh hi. Amate in pasal huai pa munah, “Nang taw hong cia khawm pa sia hong pusua ta'n! Numei ompui bangin ompui nuam khu hi!” ci uh hi.

²³Ahihang pasal huai pa doipua ah pusuak a, amate tungah, “Lawmte awng, nong hesuakna in, tuabang hi heak vun! Tuabang tatsiat kiihuai ngamtatna te vawt heak vun! Hi sia pa sia keima zin hi.

²⁴En vun! Hi sungah ama zino le ka tanu om hi, ka tanu sia ngaknu thiangtho hi. Amate tu in kong pusua tu a, ompui thei nu hi. Na uk bangin vawt vun. Ahizong hisia pa tungah tuabang a lipkhaphuai in ngamta heak vun!” ci hi.

²⁵Ahihang tua mihingte in ama a thudon bua uh hi. Tua ahikom Levi pa in a zino la in doipua sang amate kungah koi hi. Amate in ama sia zankhuateak buanin zingsang dong tawlnga ngawlin vawtsia uh hi.

²⁶Khuavak ciangin numei nu sia a pasal omna, pasal huai pa ii inn kongkha ah hong pai in puk hi. Khuavak tel dong ama sia tua munah om lai hi.

²⁷A pasal sia zing tho a, kongkha hongin khualhaw tu in a pusua le, a zino sia inn mai ah a liik sa in om a, a khutte sia kongkha zamh tubangin a om mu hi.

²⁸Ama in, “Tho in. Pai tawng,” ci hi. Ahihang bangma a zo bua hi. Tua ahikom ama in a luang sia laa tungah a phei lamin suan a, inn ah cia pui hi.

²⁹Inn a thet ciang inn sungah tumin naam khat la hi. Ama in a zino luang sia see sawm le see nii sua hi, tuaciang see khat tek Israel nam sawm le nii sim ii a nga tu in thaak hi.

³⁰A mu theampo in, “Hi bang thu peuma za ngei bua hing! Israel te ii Egypt a nusiat zawk peuma in hi bang mama piang ngeingawl hi! Hisia huvau bang khat po ih hi kul tu hi! Ih vawt tu sia bang ahi tu ziam?” ci tek uh hi.