Read Siyin Chin Thukhente 21 Bible Online

Thukhente 21 - Siyin Chin bible

Thukhente 21

¹Israel te in Mizpah ah a kikhoptua uh laitakin TOPA tungah ciliap huai kamciam khat pia uh hi: “Ko sungah kuama in Benjamin mite ii zi tu in ka tanute pia ngawl tu khu hi,” ci hi.

²Tua ahikom tu in Israel mite Bethel ah hong pai in, tualai TOPA ii mai ah nitak dong to uh hi. Nging tak le thinbot takin amate mau tek uh hi:

³“Israel ii TOPA Pathian awng, banghangin hi thu piang ziam? Banghangin Benjamin nam sia Israel sung pan bomang tu in kithoai ziam?” ci hi.

⁴A zing ciang, zing tuungin mite in tua munah biaknatau khat sa in, pawlkhop sangaw biakpiaknate le sangaw biakpiakna pawlkhat a bup in hal uh hi.

⁵Amate in,” TOPA mai Mizpah ah Israel te kikhoptua lai in Israel nam theampo pan a kihel ngawl pawl a om ziam? (Amate in Mizpah ah a pai ngawl peuma kithatlum tu hi, ci in ciliap huai kiciamna khat vawt hi.)

⁶Israel mite sia a suapui uh Benjamin mite atu khuangai hi, tuaciang amate in, “Tu ni in Israel in a namte sung pan nam khat taan uh hi.

⁷Benjamin mi a taang laite zi tu, bang law tu hi ziam? TOPA tungah ciliap huai kamciam ih vawtna pan, ih tanute khat zongh amate zi tu in ih pia buatu hi, ih ci hi,” ci hi.

⁸Mizpah ah a kikhopna sungah Israel namte sung pan hong kikhawm ngawl akua te pawl om ziam ci in a kat uh ciang, Gilead ngam Jabesh panin kuama hong kikhawm ngawl uh hi;

⁹ngalkaphonpi sungah min kisap lai in Jabesh panin kuama in zo ngawl hi.

¹⁰Tua ahikom a kikhopna pan mihing a hangbel tulsawm le tulnii te thupia a, “Jabesh ah pai vun a, mi theampo, numei patang dong thatlum tavun.

¹¹Pa a minpiang theampo thatlum vun a, numei a thiangtho ngawl peuma that vun,” ci hi.

¹²Jabesh mite sungah ngaknu thiangtho 400 mu ahikom, Canaan ngam sungah a om Shiloh ngiaphual ah paipui uh hi.

¹³Tuasia ciang a kikhop honna pan Rimmon Suangpi a om Benjamin te munah ngal kilem natu thu zasak hi.

¹⁴Benjamin te hong pai kik in Israel a dangte in amate tungah Jabesh pan ngaknu a thalup ngawlte pia uh hi. Ahihang tua ngaknute amate atu in a kicing zo bua hi.

¹⁵Benjamin te atu in mipite khuangai hi, banghang ziam cile, TOPA in Israel namte ii kilomtangh na sia sutham hi.

¹⁶Tua ahikom a kikhawmte ii lampuite in, “Benjamin nam sungah numei om nawn ngawl hi. A taanglai pate ii zi tu, bang law tu hi ziam?

¹⁷Israel in nam sawm le nam nii sung pan nam khat sia bosua thei ngawl het tu hi. Benjamin namte a bo ngawl natu in lampi khat ih zon kul tu hi,

¹⁸ahihang amate in ih tanute a teenpui tu ki oai ngawl hi, banghang ziam cile eima in Benjamin te khat ii zi tu a tanu a pia pawpo sia ih haamsiat sa hi zo hi,” ci hi.

¹⁹Tua zawkciang amate in, “Kum sim a kivawt TOPA poaipi sia Shiloh ah tung dektak zo hi,” ci sia ngaisun uh hi. (Shiloh sia Bethel saksang, Lebonah ii thangsang Bethel le Shechem kilaklaw a lampi sia ii nisuana sangah om hi.).

²⁰Amate in Benjamin te munah, “Pai vun a, sapithuante sungah buu vun,

²¹tuaciang encik vun. Shiloh ngaknute poai sungah a laam tu hong pusua uh ciangin sapithuante sung pan hong pusuak tavun. Noma khat simin tua ngaknute sung pan zi khat tek zawthawk thu taw la vun a, Benjamin ngam ah cia pui vun.

²²Amate ii pate, suapuite in no kungah hong pai in lungkim ngawlna hong pau le, ‘Nong hesuakna in hong keamsak po tavun, banghang ziam cile amate sia ka zi tu a ngal kidona pan ka laak uh hi ngawl hi. Tuaciang no zongh in ko nong piak uh hi ngawl ahiciang, na kamciam uh a paltan suak ngawl nu hi,’ ci thei tu nu hi,” ci uh hi.

²³Benjamin te in tuabang ma in ngamta uh hi; Shiloh ah a laam ngaknute sung pan amate atu tek tealin a ngam ah ciapui in, khua saat kikin tua munah teang uh hi.

²⁴Tuasia hun laitak ma in a taanglai Israel te zongh tua mun nusia in, mi simin ama ii nam, a innkuanpuite kung, a neisa omna ah cia uh hi.

²⁵Tua hun laitakin Israel ngam ah kumpi a om bua hi. Mi theampo in amate uuk bangin ngamta uh hi.