Read Siyin Chin Thukhente 3 Bible Online

Thukhente 3 - Siyin Chin bible

Thukhente 3

¹Tua ahikom, TOPA in Canaan ah ngal kisimnate a he ngawl Israel te a ze et natu in minam pawlkhat taangsak lai hi.

²Hi bangin ahi sia Israel te khang simin ngal huvau a hil natu bek hi a, a tuanin kidona sungah a kihel ngeingawlte a hil natu ahi hi.

³A ngamsung a taanglai teng sia Philistine te khuapi nga hi a, Canaan te, Sidon te a vekpi le Lebanon Mualte tung, Baal Hermon Mual pan Hamath Mualciangh dong a teang Hiv te ahi hi.

⁴Moses tungtawnin Israel mite in a taanghpupite tungah TOPA ii thupiakte a ni ziam a ni bua ziam ci in Israel a ze et natu in amate a taanglai ahi hi.

⁵Tuabangin Israel mite sia Canaan te, Hit te, Amor te, Periz te, Hiv te le Jebus te kawmah teang uh hi.

⁶Amate sia tua mite taw kiteang tetekin, a pathiante bia uh hi.

⁷Israel mite in TOPA amate ii Pathian mangil ta uh hi; Ama tungah amate maw a, Baal le Asherah milimte bia uh hi.

⁸Tua ahikom TOPA sia Israel tungah thin uuk a, Mesopotamia kumpipa Cushan Rishathaim in zothal sakin, kum liat sung uk hi.

⁹Tuasia ciang Israel te in TOPA tungah a ko ciang, TOPA in amate a suatak tu mihing khat paisak hi. Hisia Caleb ii naupa, Kenaz ii tapa, Othniel ahi hi.

¹⁰TOPA thaa sia ama tung hong theng a, ama Israel lampui hong suak hi. Othniel in ngal sim a TOPA in Mesopotamia kumpipa zosak hi.

¹¹Kum 40 sung ngam le lei ah kilemna om a, tua zawkciang Othniel thi hi.

¹²Israel te sia TOPA tungah mawna vawt leleau hi. Hisia hu in TOPA in Moab kumpipa Eglon sia Israel te sangin hatsak zaw hi.

¹³Eglon sia Ammon te le Amalek te kikop hi; amate in Israel zo in, palm khuapi Jericho la hi.

¹⁴Israel te sia kum sawm le kum liat sung Eglon khutnuai ah om uh hi.

¹⁵Tuasia ciang Israel te in TOPA ko uh a, amate a suatak tu in mihing khat paisak hi. Hisia Ehud hi a, a veilawng pasal khat hi, ama in Benjamin nam Gera ii tapa hi. Israel mite in Ehud sia Moab kumpipa Eglon kungah letsong pia tu in paisak hi.

¹⁶Ehud in a lang nii hiam centimetre 50 dektak a sau namsau khat vawt hi. Ama in a ziatsang pangh a puan nuai ah tua namsau khit hi.

¹⁷Tua zawkciang ama in Eglon kungah a letsong paipui hi, Eglon sia a thau mama pasal khat hi.

¹⁸Ehud in letsongte a piak zawkciang, tua letsong a pua mite inn ah cia kik sak hi.

¹⁹Ahihang Ehud ahile Gilgal khua hui suangngelte omna pan heak kik a, Eglon kungah pai kikin, “Kumpipa awng, nang atu thuku khat nei khi hi,” ci hi. Tua ahikom kumpipa in a naseamte mun ah, “Ko nguak hong omsak tavun!” ci hi. Tuasia ciang amate a vekpi pusuak hi.

²⁰Tua zawkciang, kumpipa sia innkhum tung a votna, ama inndoi sungah ama nguak a to laitak Ehud pai in, “Pathian kung pan nang atu thupuak khat kong nei hi,” ci hi. Kumpipa dingto hi.

²¹Ehud in a khut veisang taw a ziatsang pangh pan namsau la a, kumpipa ngil hol hi.

²²Namsau bup a kuung taw cipin tum hi, tuaciang a thau in a namsau tuam hi. Ehud in kumpipa ngil panin a namsau dok kik ngawlin a kalka kawm pan a nungsangah let hi.

²³Tua zawkciang Ehud pusuak hi, a nungah kongkhate khakin taw kilh a,

²⁴tuabangin nusia hi. Naseamte hong pai uh ciang kongkhate taw kikilh mu uh hi, ahihang amate in kumpipa sia a sungah om nginge a, awng po haw hi tu in um uh hi.

²⁵Amate in ngak tuak tanvei a ngak zawk uh ciang kumpipa in kongkhate hong peang ngawl ahikom tawtang la in hong uh hi. Tua munah a topa sia a thisa in suat tungah om hi.

²⁶A naseamte ii ngangaa lanin Ehud sia tai man hi. Suangngelte omna kaantan in pai a, Seirah ah suakta hi.

²⁷Ephraim mualtung ngamsung a thet ciangin Israel mite ngalsim tu in a samna lemle tum hi; tuaciang ama in amate lampui in mualtung pan kuansuk hi.

²⁸Ama in, “Hong zui tavun! Moab na ngalte TOPA in hong zosak zo hi,” ci hi. Tua ahikom amate in Ehud zuisuk a, Moab te ii Jordan ngun a kan natu mun sia la uh hi; mihing khat zongh kaantansak ngawl uh hi.

²⁹Tua ni in amate in Moab te ii ngalkap phabel 10,000 bang that uh hi; khat zongh a suakta om ngawl hi.

³⁰Tua ni in Israel te in Moab zo a, ngam sungah kum 80 kilemna om hi.

³¹Lampui a zom sia Shamgar hi a, Anath ii tapa hi. Ama zongh in khuital hawlna ciangzum taw Philistine te 600 that in Israel te suatak hi.