Read Siyin Chin Thukhente 4 Bible Online

Thukhente 4 - Siyin Chin bible

Thukhente 4

¹Ehud thi zawkciang Israel mite TOPA tungah mawna vawt leleau uh hi.

²Tua ahikom TOPA in amate sia Hazor khuapi a uk Canaan kumpipa Jabin in zosak hi. A ngalkaphonpi ukpa sia Gentile te ii Harosheth ah a teang Sisera ahi hi.

³Jabin in thik siphu ngalleang 900 nei a, ama in Israel te sia ngitlona le ngoltolna taw kum kul uk hi. Tuasia ciang Israel mite in TOPA tungah hu ngen in au uh hi.

⁴Tu in, Lappidoth ii zi Deborah sia kamsaang khat hi a, tua hun laitakin ama in Israel te ii thukhen seam hi.

⁵Ama sia Ephraim mualtung ngamsung Ramah le Bethel kilaklaw palm thingkung khat nuai ah to bul hi, tuaciang ama kungah Israel mite in ama ii khensatnate la tu in pai bul uh hi.

⁶Ni khat ni ciang ama in Naphtali ngam Kadesh khuapi pan Abinoam ii tapa Barak sam sakin ama tungah, “TOPA, Israel te ii Pathian in nang sia hi thu hong pia hi, ‘Naphtali le Zebulun namte panin pasal tulsawm la in a, Tabor Mual zot pui in.

⁷Keima in Jabin ii ngalkaphonpi ukpa Sisera sia Kishon ngun ah nang taw kido tu in kong paipui tu hi. Ama in a siphu ngalleangte le ngalkapte nei hi, ahihang zawna nang kong pia tu hi,’ ci in son hi.”

⁸Tuasia ciang Barak in, “Nangma in kei nong paipui le ka pai tu a, nong paipui buale ka pai buatu hi,” ci zo kik hi.

⁹Ama in, “Pha hi, nang hong paipui tu khi hi, ahihang nangma in zawna tungah bangma min na nga buatu hi, banghang ziam cile TOPA in Sisera sia nupi khat aap tu hi,” ci in zo hi. Tuabangin Deborah sia Barak taw Kedesh ah pai hi.

¹⁰Barak in Zebulun le Naphtali namte Kedesh ah sam a, pasal 10,000 samin ama zuisak hi. Deborah sia ama taw paikhawm hi.

¹¹Tua hun sungin Ken mi Heber in Kedesh khua hui Zanannim a om oak thingkung nai ah a puanbuk sa hi. Moses sunghno Hobab ii suan le paalte a dang Ken mite kung pan ama kikhiin zo hi.

¹²Barak sia Tabor Mual ah paito zo hi ci in a zaak ciang

¹³Sisera in a thik siphu ngalleang 900 teng le a mite theampo sam a, Gentile-te-ii-Harosheth pan Kishon ngun ah paisak hi.

¹⁴Tuasia ciang Deborah in Barak munah, “Pai in! TOPA in nang hong lampui hi! Tu ni in ama in Sisera tungah zawna nang hong pia zo hi,” ci hi. Tua ahikom Barak sia ama mi 10,000 teng taw Tabor Mual panin paisuk uh hi.

¹⁵Barak in a ngalkaphonpi taw a sim tak ciang TOPA in Sisera sia a siphu ngalleangte le a mite theampo taw kinuaisak a, a nokkhak bialbual tu in vawt hi. Sisera sia a siphu ngalleang tung panin tuaksuk a, a peangin tai hi.

¹⁶Barak in tua siphu ngalleang le ngalkaphonpi sia Gentile-te-ii-Harosheth dong del a, tuaciang Sisera ngalkaphonpi bup thatlum hi. Mihing khat zongh a kikhe bua hi.

¹⁷Ken mi Heber ii zi, Jael ii puanbuk dong Sisera tai hi, banghang ziam cile Hazor kumpipa Jabin sia Heber bangkua taw kilem hi.

¹⁸Jael pusuak in Sisera hong muak hi, “Hong pai ta'n, topa, ka tuipuan buk sungah hong tum ta'n. Lau heak in!” ci hi. Tuabangin ama tum hi, tuaciang innteaknu in puankhakna lia ah phual hi.

¹⁹Ama munah, “Nong hesuakna tuidam dawn tu hong pia ta'n; ka dangko hi,” ci hi. Ama in noai koina savun ip khat hongin a dawn tu in pia hi, tuaciang seal kik hi.

²⁰Tua zawkciang ama mun ah, “Puanbuk kongbiang ah ding in a, khat po hong pai in hi sungah a om, om ziam ci in hong dongh le om bo na ci in,” ci hi.

²¹Sisera sia toi mama ahikom mutthip paih hi. Tuasia ciang Jael in sek khat le puanbuk khetphin khat la in, ama kungah pai vadeen a, tuasia a thaideap pan khenin leisung dong pailetsak a, thatlum hi.

²²Barak in Sisera zongin hong pai ciang Jael in ama muak a, “Hi sungah hong pai ta'n! Na zon sia pa hong lak tu khi hi,” ci hi. Tuabangin ama a sungtan pui le Sisera sia lei ah a thisa in om a, puanbuk khetphin khat taw a lutang na kikhenlet hi.

²³Tua ni in, Pathian in Israel te in Canaan kumpipa Jabin zosak hi.

²⁴Canaan kumpipa a suksiat diipdeap dong amate in a nasia vaial, a nasia vaial in phul a, sim uh hi.