Read Siyin Chin Thukhente 6 Bible Online

Thukhente 6 - Siyin Chin bible

Thukhente 6

¹Khatvei ma Israel mite in TOPA tungah mawna vawt hi, tua ahikom Midian mite in amate kum sali uk hi.

²Midian te sia Israel te sangin hat zaw ahikom Israel te suanghawng te le mualtung a dang ngammuanna munte ah buu uh hi.

³Israel te in thaicii a poai uh ciang, Midian te, Amalek te le sennealngam minamte taw paikhawm in sim uh hi.

⁴Amate sia ngam sungah ngiaphual saat in, Gaza kiim thangsang ngam dong ankungte susia hi. Amate in khuite, tuute, laate la in, Israel te nuntak natu bangma kheet ngawl uh hi.

⁵Amate in a puanbukte le a ngannote taw hong pai uh ciang khaumaw za in tam uh hi. Amate le a kalaoh te tam leih a, sim zawk hi ngawl hi. Amate hong pai in,

⁶ngamsung susia ngawp a, tuaciang Israel te in amate nalh zo ngawl uh hi.

⁷Tuasia ciang Israel mite sia Midian te a nalh zawk natu in TOPA tungah hu ngen in au uh hi,

⁸tuaciang ama in kamsaang khat paisak a, TOPA Israel te ii Pathian ii thupuak hisia kengsak hi: “Egypt ngam na saltanna uh panin kong pusua pui hi.

⁹Egypt te le hi lai ngam sungah hong sim mite kung pan kong suatak hi. Maisang na manaw uh ciang amate sia ka notkeak hi, tuaciang amate ii ngam, no kong pia hi.

¹⁰Keima in TOPA na Pathian khi hi, tuaciang tu in amate ngam ah na teen uh laitakin Amor te ii pathiante na bia buatu uh hi, kong ci hi. Ahihang kei nong nadon bua uh hi.”

¹¹Tua zawkciang TOPA ii vantunglalang sia Ophrah khua ah hong pai a, Abiezer phung sungah a pasal khat ahi Joash ii neisa oak thingkung nuai ah hong to hi. A tapa Gideon sia Midian te mu ngawl natu in sapittui suukna munah zungtaang tawm hong cil ku hi.

¹²TOPA ii vantunglalang sia tua mun ama mai ah hong kilaak a, “TOPA sia nang taw omkhawm hi, ngalhang, a thahat pa awng!” ci hi.

¹³Gideon in ama munah,” Kong dongh thei tu ahile, topa awng, TOPA in hong ompui ahile hite theampo banghangin piang ziam? Ka pate ii hong son TOPA sep ngei nalamdang te — amate Egypt ngam pan a pusua puina thu theampo bang suak ziam? TOPA in ko, hong taisan zo a, Midian te khut sungah hong nusia zo hi,” ci hi.

¹⁴Tuaciang TOPA in ama thupia a, “Na thahatna theampo taw kuan in a, Israel te Midian te khut sung pan suatakin. Keima tatak ma in nang kong paisak hi,” ci hi.

¹⁵Gideon in, “TOPA awng, bangbangin Israel suatak thei tu khi ziam? Ka bee ka phung sia Manasseh nam sung pan a zawngkhalbel hi a, keima zongh ka bangkua sung pan a thupi ngawlbel ka hi hi,” ci in zo kik hi.

¹⁶TOPA in, “Suatak thei tu ni hi, banghang ziam cile keima in hong hu tu khi hi. Midian te sia mihing khat vawt tu bang bekin ol takin na sucip tu hi,” ci in zo hi.

¹⁷Gideon in, “Kei dik nong sa le nang sia TOPA na hi takpina tawm hong lak ta'n.

¹⁸Nong hesuakna in an taw biakpiakna kong paipui dong hong nusia heak in,” ci hi. Ama in, “Nong pai kik dong om tu khi hi,” ci hi.

¹⁹Tua ahikom Gideon inn sungah tumin, kealmoi khat huan a, mangtaang vui kilogramme 10 taw tol saw ngawlin anluum vawt hi. Ama in a sa sia khum sungah koi in, a satui sia beal sungah a koi zawkciang TOPA vantunglalang kung oak thingkung nuai ah paipui a, tua ante ama pia hi.

²⁰Vantunglalang in, “A sa le anluum teng hi suang sia tungah koi in a, a tungah satui buak in,” ci in sawl hi. Gideon in tuabangin vawt hi.

²¹Tua zawkciang TOPA vantunglalang in ama ii toai ciangkang ii dawn taw sa le anluumte kithuthasak hi, tuaciang suang sung panin meikuang pusuak a, sa le anluum kaanghtum hi. Tuasia ciang vantunglalang bo hi.

²²Tuasia ciang Gideon in TOPA vantunglalang mu ahi hunlam phawk in, launa lianpi taw, “Vaanglianpipa TOPA! Na vantunglalang taw maitang kisii in mu zo khi hi,” ci hi.

²³Ahihang TOPA in, ama munah, “Na thinnuamsak in. Lau heak in. Thi ngawl tu ni hi,” ci hi.

²⁴Gideon in tua munah biaknatau khat sa in,” TOPA sia thinnopna hi,” (“Jehovah Shalom”) ci hi. (Tuasia tu dong ma in Ophrah ah ding lai a, Abiezer ii bee le phung neisa ahi hi.)

²⁵Tua zanin TOPA in Gideon munah, “Na pa khuital le khuital dang khat la in a, na pa ii Baal biaknatau sia baltham in, tuaciang a kung a om Asherah numeipathian ii lim sia zongh phuktan in.

²⁶TOPA na Pathian atu in biaknatau khat leivum tungah a pha takin sa in. Tuaciang khuital a niina sia la in, biakpiak na in a bup in hal in, Asherah thingngel na phuktan sia thing in thut in,” ci hi.

²⁷Tua ahikom Gideon in a naseamte sawm taw TOPA sawl teng seam hi. Ama in a innkuanpuite le khua mite kiita lei ahikom sunin seam ngam ngawlin zanin seam hi.

²⁸Tua khua mite a zing ciang zingtuungin hong thaw uh ciang, Baal biaknatau le Asherah lim a kiphuktan teng le, tuaciang khuital a niina sia a saksa biaknatau tungah biakpiakna in a kihal mu uh hi.

²⁹Amate khat le khat kidongh a, “Akua in hisia vawt ziam?” ci hi. Amate in a kat uh ciangin Joash tapa Gideon vawt ahi sia he uh hi.

³⁰Tuasia ciang amate in Joash mun ah, “Na tapa hi sungah a kithalup thei natu in hong paisak ta'n! Ama in Baal biaknatau sia baltham a, a kungah a om Asherah lim sia phuktan hi,” ci uh hi.

³¹Ahihang Joash in ama a nalhte theampo tungah, “Baal panpui in ding tek nu ziam? Ama hung nu ziam? Ama a panpui khat pawpo sia zingsang khuavak ma in thalup thuak tu hi. Baal sia pathian ahile ama le ama kihung tahen. A kibaltham biaknatau sia ama aa hi,” ci hi.

³²Tua hun pan kipan Gideon sia Jerubbaal kina hi, banghang ziam cile Joash in, “Baal sia ama le ama kihung tahen; biaknatau a kibaltham sia ama aa hi,” a ci hu hi.

³³Tuasia ciang Midian mite theampo, Amalek te, le sennealngam sung teang minamte hong kikhawmtua a, Jordan ngun kaantan in, Jezreel Kuam ah ngiaphual saat uh hi.

³⁴TOPA ii thaa in Gideon uk a, tuaciang ama in Abiezer bee le phungte sung pan pasalte ama zui tu a samna lemle tum hi.

³⁵Ama in kamtaite Manasseh ngam khente ngeal ah paisak a, ama a zui tu in samsak hi. Ama in kamtaite sia Asher, Zebulun, le Naphtali namte kungah paisak a, amate zongh Gideon taw kipawl tu in hong pai uh hi.

³⁶Tua zawkciang Gideon in Pathian munah, “Israel te a suatak tu in kei nong zak tu in khensat zo khi hi, ci ni hi.

³⁷Pha hi, tuumul pawlkhat ka zungtaang cilna ah koi tu khi hi. Zingsang ciangin daaitui kia sia tuumul tung bek ah om in, lei ah a om buale, Israel suatak tu in hong zangh takpi tu na hina ka tel tu hi,” ci hi.

³⁸Tuabang tatak ma in hong piang hi. A zing ciang khuavak tuungin Gideon hong thaw ciang, ama in tuumul hong meak a, kuang khat dim tu za daaitui om hi.

³⁹Tuaciang Gideon in Pathian munah, “Kei tungah na thin uuksak heak in; khatvei lian bekma pau lai tong. Nong hesuak na in tuumul taw khatvei hong sinsak lai ta'n. Tusia hun ciang tuumul kosak in a, a lei kawtsak in,” ci hi.

⁴⁰Tua zanin Pathian in tuabang tatak ma in vawt hi. A zingsang ciang tuumul sia ko a, lei ahile daaitui kawt hi.