Read Siyin Chin Thukhente 7 Bible Online

Thukhente 7 - Siyin Chin bible

Thukhente 7

¹Ni khat ni in Gideon le a mite tho pal in Harod Cik paam ah ngiaphual saat uh hi. Midian te ii ngiaphual sia Moreh Mual nai amate ii saksang kuam sung ahi hi.

²TOPA in Gideon munah, “Midian te kong zawsak natu in na mihing nei teng sia kei atu tam lei hi. Tuate in amate ii zaw zawk khawng ma sa in kei min hong pusak ngawl tu uh hi.

³Mihingte tungah, ‘A lau khat pawpo sia inn ah cia kik thei tu hi, tuaciang ko sia hi lai Gilead Mual ah ka na om tu uh hi,’ ci in taangko vun” ci hi. Tuabang ahiciang 22,000 cia kik a, ahihang 10,000 taanglai hi.

⁴Tua zawkciang TOPA in Gideon munah, “Na mite tam lei lai hi, tui omna ah paipui in a, tua munah nang atu amate kong khen tu hi. Mihing khat sia nangma munah nang taw pai tu hi ka ci le pai tu hi. Nangma munah pai ngawl tu hi ka ci le pai ngawl tu hi,” ci hi.

⁵Gideon in tui omna ah paipui suk a, tuaciang TOPA in ama munah ‘Ui bangin a leei uh taw tui a liak theampo sia khupdin a tui a ne suk teng sung panin khen tu ni hi,” ci hi.

⁶A khutpheak uh taw tui suakin a leei uh taw a liakte zathum pha hi; a dang teng sia tui ne tu in khupdin a boksuk uh hi.

⁷TOPA in Gideon munah, “Midian te khut sung pan nang kong suatak tu a, a leei uh taw tui a liak mihing zathum teng taw zawna kong pia tu hi. A dangte theampo ciasak in” ci hi.

⁸Tua ahikom nguai an le lemle theampo a keam mihing zathum simngawl po Israel mi teng Gideon in inn ah ciasak hi.

⁹Tua zanin TOPA in Gideon thupia a, “Tho in a ngiaphual sim in; tuasia zawna nang hong pia khi hi.

¹⁰Ahihang na sim ngam buale, na naseampa Purah taw ngiaphual ah paisuk tavun.

¹¹Amate ci teng na za tu a, tuasia ciang sim natu na thin hong lian tu hi,” ci hi. Tua ahikom Gideon le a naseampa Purah sia ngalte ngiaphual mong dong hong pai uh hi.

¹²Midian te, Amalek te le sennealngamsung a minamte sia tua kuam sungah khaumaw hon bangin kizel uh hi, tuaciang a kalaoh te zong tuipivaal a senvui za in tam hi.

¹³Mihing khat in a lawmpa tungah a mang a son teng Gideon hong thet ciangin za hi. Ama in, “Ka mang in zungtaang taw a kivawt anluum khat ih ngiaphual ah hong liiksuk a, puanbuk khat kha hi. Puanbuk sia cimh in lei ah kipheangpha hi,” ci in a mang son hi.

¹⁴A lawmpa in, “Tuasia Israel te Joash ii tapa Gideon ii namsau hi! Khiakna dang mama nei thei buan te! Pathian in Midian le a ngalkap bup tungah zawna sia ama pia zo hi!” ci in zo kik hi.

¹⁵Gideon in tua pa ii mang le a khiakna a son teng a zaak ciang khupdin in Pathian bia hi. Tua zawkciang ama Israel te ngiaphual ah heak kikin, “Tho vun! Midian ngalkaphonpi tungah no sia TOPA in zawna hong pia zo hi!” ci hi.

¹⁶Ama in mihing zathum teng sia pawl thum in khen a, lemle khat le meisip a kikoi tungbeal khat tek pia hi.

¹⁷Amate tungah, “Ngalte ngiaphual mong ka thet ciang, hong en nginge tavun a, keima hi babang hi vun.

¹⁸Ka pawlte le keima in lemle kong tum uh ciang, no zongh ngiaphual kiimkot panin lemle tum in, ‘TOPA atu le Gideon atu’ ci in hong au tavun,” ci hi.

¹⁹Zankim mahiat, a cingte kilaih zawk bek ciangin Gideon le a mi zakhat teng sia ngiaphual mong hong theng hi. Amate in lemle tumin, a beal toai te sutham uh a,

²⁰tuaciang pawl dang nii te zongh in tuabang ma in hong ngamta uh hi. Amate a vekpi in meisipte a veisang khut taw len in, a ziatsang ah lemle toai in, “TOPA atu le Gideon atu namsau khat!” ci in a au uh hi.

²¹mi simin ngiaphual kiim ah ama din natu san tek ah hong ding tek in, ngalte ii ngalkaphonpi sia au in a taikeak uh hi.

²²Gideon mite ii a lemle tum sungin, TOPA in ngalte sia amate le amate khat le khat namsau taw kisimsak uh hi. Amate sia Zarethan sang ah Beth Shittah dong, Tabbath hui Abel Meholah khua dong tai uh hi.

²³Tua zawkciang, Naphtali nam, Asher nam le Manasseh nam khente ngeal pan mite kisam khia in Midian te del uh hi.

²⁴Gideon in Ephraim mualtung ngam a omte theampo kungah kamtai paisak a, “Midian te sim tu in hong pai suk tavun. Midian te kaantan thei ngawl tu in Jordan ngun le luite Bethbarah dong cing vun,” cisak hi Ephraim mite kikhawm tua in, tuaciang amate in Jordan ngun le luite Bethbarah dong simin topha uh hi.

²⁵Amate in Midian te ukpite nii, Oreb le Zeeb pummat uh a; Oreb sia Oreb Suangpi ah thatin, Zeeb sia Zeeb ii Sapittui suukna munah that uh hi. Amate in Midian te del paisuak a, Oreb le Zeeb ii lutangte sia Jordan nisuana a om Gideon ii kungah hong paipui uh hi.