Read Siyin Chin 3 John 1 Bible Online

3 John 1 - Siyin Chin bible

3 John 1

¹Pawlpi Upa keima in — Ka it takpi ka lawm Gaius tungah lai kong thaak hi.

²Ka it ka lawmpa awng, thaa sungah thahat ci in kong heak bangma — na theampo ah maapai daupai in na ciidam natu thu ka ngen hi.

³Thumaan thutak sungah a nungta tawntung na hi bangma — Tapidaw suapui pawlkhat hong theng a, nang sia thumaan thutak sungah takkha hi ci in hong son ciang ka lungdam mama hi.

⁴Ka tate thumaan thutak sungah a nuntak ka zaak sia sangin hong lungdamsak zaw thei a dang bangma a om bua hi.

⁵Ka it ka lawmpa awng, na Tapidaw puite khualmi ahi laitak ngawngawn zong amate a tu nasepna ah thumaan in citak ni hi.

⁶Amate na itna thu teng hi sung pawlpi ah hong ko uh hi. Amate khualhawna sungah Pathian lungkim zia taw a paitan thei natu in na hu in.

⁷Banghang ziam cile amate sia Christ ii na seamin khual a haw uh ciang, thu um ngawlte tung pan huna bangma saang ngawl uh hi.

⁸Tua ahikom ei Tapidawte in hi mihingte ii thumaan thutak a tu a sepna sungah a seppui ih hi thei natu in ih hu tu hi.

⁹Pawlpi tungah laithak tomno khat ka at hi; ahihang amate ih lampui a suak nuam Diotrephes in kei ii ci bang sia hong thupi sim bua hi.

¹⁰Tua ahikom kong pai ciangin ama ngamtatna theampo: ko thu a cizathuai a hong sonte le a leilotna teng ka pholaak tu hi! Ahihang tua teng bek hi ngawl lai hi; Tapidaw suapuite hong pai ciangin saang nuam ngawlin, tuabang a saang nuamte ngawngawn tho in, biakinn pan hawlkeak tu hanciam lai hi!

¹¹Ka it ka lawmpa awng, a pha ngawlte zui heak vun a, a phate zui tavun. Thupha vawt peuma Pathian neisa hi a; thusia vawt peuma in Pathian a mu bua hi.

¹²Demetrius sia ngual theampo in phat son hi; thumaan thutak mama in ama phat son hi. Tuaciang ko zongh in tetti ka pang thua uh a, thumaan son ka hi uh sia na he uh hi.

¹³Kong son nop tam mama om ahihang laikung laite taw kong at nuam bua hi.

¹⁴No taw kimu pal tu in lametna ka nei a, tua hun ciangin maitang kisi in ih son tu hi.

¹⁵Thinnopna nga tavun. Na ngualtamhte theampo in nuksetna kam hong thaak hi. Ko ii lawm teng zongh maitang kisi in na nukset sak vun.