Read Siyin Chin Thupualaakna 1 Bible Online

Thupualaakna 1 - Siyin Chin bible

Thupualaakna 1

¹Hi laibu sia Jesus Christ ii pualaak thute a kitepteena ahi hi. Hai ngawlin, a tung tu thute a naseamte tungah a lak thei natu in, Pathian in hi pualaakna pia hi. Christ in a naseampa John tungah a heaksak natu in, ama kungah a vantunglalang paisak a,

²tuaciang John in a mu theampo son siat hi. Hisia in Pathian ii thupuak le Jesus Christ ii a pualaak thumaante huvau thukona ahi hi.

³Hi thubu sungah a ki at laite a simte le maisang thu kisonkholna kammal a zuite in mihing lungdamte ahi hi! Banghang ziam cile hi thute hong tun tu hun hong nai zo hi.

⁴Asia ngamkhen sung a om pawlpi salite tungah, John in lai kong thaak hi: A om nginge, a omsa le hong pai pheang tu Pathian kung pan, a kumpi tokhum mai ah thaa sali te kung pan le

⁵a thumaan tetti hi a, thina pan kithosak kik masa leitung kumpite theampo a ukpa Jesus Christ kung pan thuthiamna le thinnopna sia note aa hi tahen. Ama in ei hong it a, ama chisan hangin eite, mawna pan hong suatak hi,

⁶tuaciangin eite sia a Pathian le a Pa atu a seam tu in thiampi in hong vawt hi. Jesus Christ tungah minthanna le vaangletna sia a tawntung a tawntungin om tahen! Amen.

⁷En vun, meei tungah ama hong pai hi! Mihing khat simin ama mu tu hi, tuate sungah ama a hollette zongh kihel tu hi. Leitung mihing theampo ama hu in khuangaina taw tau tu uh hi. Tuabangin hong piang tatak tu hi!

⁸“Keima in a masabel le a khakbel ka hi hi,” ci in a om nginge, a omsa, le hong pai pheang tu, Vaanglianbel Topa Pathian in ci hi.

⁹Keima in na suapuipa John ka hi a, tuaciang Jesus nungzui khat ka hina taw Pathian ngam lua tute ii thuak tu vawtsiatna noma taw a kibangin a thuak kenkon na seppuipa ka hi hi. Kei sia Patmos tuikulh tungah hong kikoi hi, banghang ziam cile, Pathian kammal le Jesus ii hong pualaak thumaan thutak ka thansak hang ahi hi.

¹⁰Topa ii ni in, Thaa in kei hong uk a, aw nging khat ka za hi, tua aw sia lemle aw bang hi a, ka nungsang panin hong paupui hi.

¹¹Tuasia in, “Na mu teng at in a, a laibu sia hi pawlpite omna khuapi sali ahi: Ephesus, Smyrna, Pergamum, Thyatira, Sardis, Philadelphia, Laodicea te tungah thaak in,” ci hi.

¹²Akua in hong paupui ziam ci in ka nung ka kiheak ciang, khamh meivakna sali ka mu hi,

¹³tuate kawmah mihing taw a kibang khat ka mu a, ama in a peang dong a tualsuk puan khat silhin, a awm kiimkot ah khamh kawngkhau khat vet hi.

¹⁴Ama sam sia tuumul ahibuale vuuk bangin paak a, tuaciangin a mittang sia meikuang bang ahi hi;

¹⁵ama ii peang sia a kithiangsak, a kinawt taau taw kibang a, a aw sia tuiteautuak hawk bang ahi hi.

¹⁶Ama in a khut ziatsang ah aksi sali toai a, tuaciang a kam sung panin a lang nii hiam namsau khat hong pusuak hi. A maitang sia sun lai nitaang bangin taang hi.

¹⁷Ama ka mu ciangin mithi sa bangin, a peang ah ka puk hi. Ama in a khut ziatsang ka tungah hong nga a, “Lau heak in! Kei sia a masabel le a khakbel ka hi hi.

¹⁸Keima in a nungta pa ka hi hi! Keima sia ka thi zo a, ahihang tu in a tawntung a tawntungin, ka nungta hi. Thina le mithite khua ka uk hi.

¹⁹Tua ahikom nungciangin, hong piang tu nate le tu laitak a om nate, na mu teng at in.

²⁰ka ziatsang khut sungah na mu aksi salite le khamh meivak khuam salite ii a kiphualseal a khiakna sia hi bang ahi hi: aksi salite sia pawlpi salite ii vantunglalangte hi a, meivakna khuam salite sia pawlpi salite ahi hi.