Read Siyin Chin Thupualaakna 10 Bible Online

Thupualaakna 10 - Siyin Chin bible

Thupualaakna 10

¹Tua zawkciang a thahat vantunglalang a dang khat, vantung panin hong tuaksuk ka mu hi. Ama sia meei taw kituam a, a lutang kiimkot ah sangun khat in uum hi; a maitang sia ni taw kibang a, a peangte meikuang khuamte taw kibang hi.

²Ama in a khut sungah laizial no khat phalhsa in toai hi. Ama in a peang ziatsang sia tuipi tungah nga in, a peang veisang sia leitung ah nga hi,

³tuaciang ama in tawpi hawk taw a kibang awnging taw oksan hi. A oksat zawkciang, vanto salite in hawkin zo uh hi.

⁴Amate pau zawk po ciangin lai taw ciamtee tu in, at ka kipan hi. Ahihang vantung pan awnging khat ka za a, “Vanto salite ii pauna sia thuku in koi in, lai taw at heak in,” hong ci hi.

⁵Tuaciangin vantunglalang khat tuipi le leitung sisanh in a ding ka mu sia in, a khut ziatsang vantung ah laamto in,

⁶a tawntung a tawntungin a nungta, vantung, leitung, tuipi le a sung a om theampo a bitphua Pathian min taw kiciamna pia hi. Vantunglalang in, “Haisaang nawn ngawl tu hi!

⁷Ahihang vantunglalang a salina sia in, lemle a tum tak ciang, a naseam kamsaangte tungah a sonsa bangin Pathian in a thuku ngealna khuangkhim tu hi,” ci hi.

⁸Tua zawkciang vantung pan hong paupuina aw, ka zaak ngeisa aw sia in, kei hong paupui kik a, “Va pai ta'n a, tuipi le leitung a sisanh vantunglalang ii khut sungah laizial sia la ta'n,” hong ci hi.

⁹Vantunglalang kungah ka pai a, laizial no sia hong piak natu in ka ngen hi. Ama in kei tungah, “La in a ne in; na ngil sungah a thuk suak tu hi, ahihang na kam sungah khuaitui bangin thum tu hi,” hong ci hi.

¹⁰Laizial no sia ama khut tung pan la in ka ne hi, tuaciang ka kam sungah tuasia in khuaitui bangin thum hi. Ahihang ka valh zawkciang ka ngil sungah a thuk suak hi.

¹¹Tua zawkciang, “Nang in a tam mama ngamte, minam khente, kampaute le kumpipate taw kisai Pathian vaithak thu sia khatvei ma na thangsak kik tu hi,” hong ci hi.