Read Siyin Chin Thupualaakna 11 Bible Online

Thupualaakna 11 - Siyin Chin bible

Thupualaakna 11

¹Tua zawkciang kei sia ciangkang khat hong kipia a, a sau teena piciang bang ahi hi, tuaciang hi bangin hong sawl hi, “Va pai ta'n a, Pathian biakinn le a biaknatau sia va tee ta'n, tuaciang biakinn sungah biakpiakna a nei mihing phaza hong sim ta'n.

²Ahihang a huang puanung sia na tee heak in, banghang ziam cile tua mun sia Pathian he ngawlte atu a kipiasa hi a, amate in Khuapi Thiangtho sia tha sawmli le tha nii sung tuanhcil tu uh hi.

³Ka tetti te nii khau-ip puan silh in, ka paisak tu a, amate in ni 1,260 sung teng Pathian ii thu vaithak thangsak tu uh hi,” hong ci hi.

⁴Tetti te nii a cite sia leitung Topa mai ah a ding olive kung niite le meivak khuam niite ahi uh hi.

⁵Khat po in amate vawtsia tu in a sawm le, a kam sung pan meikuang pusuak tu a, a ngalte lalcipsak tu uh hi; tuaciang hi bangin a kuama po amate susia nuamin a kipante sia kithatlum tu hi.

⁶Amate in van khakbil in Pathian thu vaithak a thansak hun sungin, ngua a zuksak ngawl natu in thunei uh hi. Amate in ciktuite chisan a suasak thei natu thunei si uh hi; tuaciang amate in a uuk ni sim po in, leitung sia ngimna lian nam theampo taw ngim piak thei natu zongh thunei uh hi.

⁷Amate in a thu vaithak a thansak zawk ciangin, a hawng thukpui sung pan hong pusuak nganhing sia in, amate sim tu hi. Tua nganhing in amate zo in thatlum tu a,

⁸a luangte sia amate ii Topa thinglamtee tungah a kithalupna mun tua khuapi lian sia sung lampi tungah kisial tu uh hi. Tua khuapi ii a minsealh sia Sodom, ahibuale Egypt kici hi.

⁹Ngam, minam, kampau namte le minam khente pan mihingte in a luangte sia ni thum le ni lang sung en tu a, a phumsak buatu uh hi.

¹⁰Leitung mihingte in hite nii ii thi hu in lungdam tu uh hi. Amate in lungdamna poaikhaam in, khat le khat letsong kithaak tu uh hi; banghang ziam cile tua kamsaangte nii in, mihingte tungah ngimna tam mama tungsak hi.

¹¹Ni thum le ni lang zawkciang, Pathian kung pan nuntakna a pia husanna hong pai in, amate sungah tum a, tuaciangin amate hong dingto uh hi; a mu theampo lau mama uh hi.

¹²Tua zawkciang kamsaangte nii in “Hi sungah hong pai to tavun!” ci in vantung panin awnging tatak khat za hi. A ngalte mu tangin, amate sia meeikaai khat taw van ah kaato uh hi.

¹³Tua hun laitak nasia tatakin zinliing hi; khuapi ii see sawm sua see khat laltham a, mihing tul sali thi hi. A om lai mihingte lau in vantung ah om Pathian letna pok uh hi.

¹⁴Liinna launa lian a niina sia bo ahihang a thumna sia hong pai pal tu hi!

¹⁵Tua zawkciang vantunglalang a salina sia in a lemle tum a, vantung ah awnging tatak taw, “Leitung uk natu vaangletna in ih Topa le ama Messiah ii neisa hi a, ama in, a tawntung a tawntungin uk tu hi!” ci hi.

¹⁶Tuasia ciang a kumpi tokhumte taw Pathian mai ah a to upa kul le lite bokin Pathian bia uh a:

¹⁷“Topa Pathian vaanglianbelpa, a om nginge le a omsa pa, Na vaangletna lian taw ukna kipan tu hi zo na hikom lungdam kong ko uh hi!”

¹⁸Pathian he ngawlte sia thin uukna taw kidim hi, banghang ziam cile na thin uuk tu hun le, a thite tungah thu na khen tu hun hong theng zo hi. Na naseam kamsaangte, a lian a no nang hong thasia theampo minphatna thaman na piak tu hun hi zo a, Leitung a lalsakte na lalsak tu hun hong theng zo hi!” ci hi.

¹⁹Vantung ah Pathian biakinn sia kihong a, Thuciamna Thingkuang sia tua munah kimu hi. Tuasia zawkciang khualengin, vanto ngawp a, zinliing in ngial nasia takin kia hi.