Read Siyin Chin Thupualaakna 16 Bible Online

Thupualaakna 16 - Siyin Chin bible

Thupualaakna 16

¹Vantunglalang salite tungah biakinn panin awnging tatak khat in: “Pai tavun a, Pathian thin uukna khawbeam salite leitung ah sungsuk tavun!” a ci ka za hi.

²Vantunglalang a masabel sia pai in leitung ah a khawbeam a sungsuk hi. A kiitakhuai le a bot mama meimate sia a nganhing ii kitepteena a neite le tua ii lim a bia teng tungah hong piang hi.

³Tua zawkciang vantunglalang a niina sia in a khawbeam sia tuipi tungah sungsuk hi. Tui sia mithi khat ii chisan bang suak a tuipi sungah nuntakna a neite theampo thi siat hi.

⁴Tua zawkciang vantunglalang a thumna sia in a khawbeam sia ngunte le ciktuite tungah sungsuk a, tuate chisan suak siat hi.

⁵Tuite a uk vantunglalang in, “Tu hun le a bosa hunin a om a Thiangtho Pa awng, na thukhennate tang hi!

⁶Amate in Pathian ii mihingte le, kamsaangte chisan keesak ahikom amate dawn tu in chisan a pia zo hi. Amate in a kiphu a kilawm in thuak hi,” a ci ka za hi.

⁷Tuaciang biaknatau pan aw khat ka za a, “Topa Pathian Vaanglianbelpa awng! Na thukhennate maanin tang takpi hi,” ci hi.

⁸Vantunglalang a lina sia in, ni tungah a khawbeam hong sung a, tuasia ciang, nisatna meisa bang hi in, mihingte kaanghsak hi.

⁹Amate sia a sa mama nisa in hal uh a, tuaciang hi ngimna tungah a thunei Pathian ii min amate in haamsiat uh hi. Ahihang amate in a mawnate pan kisiik ngawlin ama ii letna zongh a pok buatu uh hi.

¹⁰Tua zawkciang vantunglalang a ngana sia in, nganhing sia ii kumpi tokhum tungah a khawbeam hong sungsuk hi. Nganhing ii ukna ngam sungah khuazing hong theng a, mihingte in na a sak hu in a leei pet uh hi,

¹¹tuaciang vantung Pathian tungah a meima botte hu in, haamsiat uh hi. Ahihang amate ngitlona pan a kisiik tuan bua uh hi.

¹²Vantunglalang a lukna in, Euphrates ngun tungah a khawbeam sungsuk hi. Nguntui hong kang a nisuana sang panin hong pai tu kumpipate atu in lampi piangsak hi.

¹³Tua zawkciang ulol taw a kibang thaa nin thum ka mu hi. Tuate in ngulpui kam sung, nganhing kam sung le leilot kamsaangpa kam sung panin hong pusuak uh hi.

¹⁴Amate sia nalamdang laknate a vawt doaite thaa ahi uh hi. Vaanglianbelpa Pathian ii ni thupi Ni in, ngal kidona sungah a khawmtua tu in leitung kumpipate theampo kungah hi thaa thumte pai uh hi.

¹⁵“Ngai vun! Nguta khat taw kibangin kong pai tu hi! Ngual mai ah pumnguak in om a, maizum a nga ngawl natu in, mu ngawlin a puansilhte a keamcing pa sia mihing lungdam ahi hi.”

¹⁶Tua zawkciang tua thaate in kumpite sia Hebrew kam a Armageddon a kicina munah hong paipui uh hi.

¹⁷Tuasia ciang vantunglalang a salina sia in, a khawbeam sia vui sungah hong sungsuk hi. Biakinn sung kumpi tokhum tung pan, awnging tatak khat hong nging a, “Kiman zo hi!” ci hi.

¹⁸Khua hong leng vazal a, luum vangam in vanto a, a lauhuai mama in zinliing hi. Hisia in zinliing theampo sung pan a nasiabel hi; mihingte a kibitphua pan kipan tuabang zinliing a om ngei bua hi!

¹⁹Khuapi lian sia khen thum in hong kiphaltham uh a, tuaciangin ngam theampo a khuapite sia kilalsak siat hi. Pathian in Babylon khuapi sia phawkin a thin uuk thangsiatna sapittui sia — ama ii hai panin dawnsak hi.

²⁰Tuikulh theampo bo in, mual theampo mangthang siat hi.

²¹Khat ciang kilogramme sawm nga bang a pha tu, a lian mama ngialtangte van panin mihingte tungah kia hi, tua ngimna lian sia nasia lei lawlawm ahikom, tua ngialkiate hangin mihingte in Pathian haamsiat uh hi.