Read Siyin Chin Thupualaakna 18 Bible Online

Thupualaakna 18 - Siyin Chin bible

Thupualaakna 18

¹Hi sia zawkciang vantung panin, vantunglalang a dangkhat hong tuaksuk ka mu hi. Ama in thuneina lianpi nei a, ama vaang in leitung bup taangsak hi.

²Ama in nging takin au a, “A lian Babylon khuapi cim zo hi! cim zo hi! Ama sia tu in doaite le thaa ninte in teenna in nei hi; a kiihuai le a ngaimawkhuai vacimte zongh a sungah teang hi.

³Banghang ziam cile, minamte theampo in ama ii paktat sikvilna sapittui ciik ne uh hi. Leitung kumpipate in ama taw paktat khialna vawt uh a, leitung sumvawtte in ama ii ciangtan om ngawl sikvilna hangin hau law uh hi,” ci hi.

⁴Tua zawkciang vantung panin aw dang khat hi bangin ka za hi; “Hong pusuak tavun, ka minamte awng! Ama kung pan hong pusuak tavun; Ama ii mawnate sungah kihel heak vun! ama ii daan thuakpui heak vun.

⁵Banghang ziam cile ama ii mawnate in van ban a, Pathian in ama ii ngitlonate ciamtee hi.

⁶Tua nu ii note tungah hong ngamtat bang tatak ma in note zongh amate tungah ngamta vun. Ama ii sepsa theampo a zaa nii in lo kik vun. Note atu hong vawt sa sia sangin a zaa nii in a ciik zaw sapittui ama neak tu in a hai sungah sung in.

⁷A minthanna le a nopsaknate ama le ama a kipiakna taw kizui in, ngimna le heena na thuaksak in. Banghang ziam cile ama in: ‘Hi sungah kei sia kumpinu in to khi hi! Kei sia meingong hi ngawl khi hi. Khuangai ngeingawl tu khi hi!’ a kici hi.

⁸Hisia hu in ni khat ni ciang ama in ngimna liante ahi — natna, heena, kial tunna, thuak tu hi. Ama thu a khen Topa Pathian sia thahat ahikom, ama sia mei taw kihal tu hi.”

⁹Ama taw paktatna sungah a kihel leitung kumpite in tua khuapi kak tumna meikuangte pan meikhu a mu ciangin au in kap tu uh hi.

¹⁰Amate in ama thuakna sia a thuakpui ngam bua uh a, a khualana ah ding uh hi. Amate in, “Bangza in kiitakhuai ziam! Bangza in lauhuai ziam! Hi a lian le a hat Babylon khuapi! Nai khat sung tengin daan hiza na tawk hi,” ci uh hi.

¹¹Kuama in amate vanhte a lei nawn bua uh a, leitung sumvawtte in, ama hu in kapin khuangai uh hi,

¹²kuama in a khamh, a ngunn, a suangmanpha, a keptangte; puan le puan sandupte, naaipuan, puansan; thing manpha namcin, saiha taw a kivawt thil tuatuamte, thing manham taw kivawt nate, taau, thik le marble suang taw a kivawtte, a lei nawn bua uh hi;

¹³thing namtuite, sathau namtui, thil namtui myrrh le frankincense paaknamtui te; sapittui le sathau, anvui le zungtaang, khui, tuu, siphute le leangte, sila le mihing nuntaknate dong, a khawng nawn bua uh hi.

¹⁴Sumvawtte in ama tungah, “Na thangai vanh pha theampo sia bomang siat zo a, na hauna le na khiaklaak huaina theampo bo siat zo hi, tuaciang in tuate bangma hunin na nga kik ngei nawn buatu hi!” ci uh hi.

¹⁵Tua khuapi sungah sum vawt a haute in, hi ama thuaknate kiita in a thuakpui ngam bua uh a, a khualana ah a ding tu uh hi. Amate kapin a tau tu uh a,

¹⁶tuaciang, “Bangza in kiitakhuai ziam! Tua khua atu in bangza in lauhuai ziam! Ama le ama sia naaipuan taw, puan sandup taw, puansan taw kizeam in, khamh kizepna, suangmanpha le keptangte taw kizeam ngei hi!

¹⁷Nai khat sungah a hauna theampo taan siat zo hi,” ci uh hi. Teambaw ukpa le a to mihingte, teambaw naseamte, tuipi tungah naseam in nuntak natu a thalawte le a dang theampo, a khualana ah dingin,

¹⁸ama a kaanghtum meikuangte pan meikhu sia a mu uh ciang, “Hi khuapi lian taw a kibang khuapi dang om ngeingawl hi!” ci in au uh hi.

¹⁹Amate in a lu tung uh ah leivui kithe in, au in tau in, “Bangza in kiitakhuai ziam? Tua khuapi atu in bangza in lauhuai ziam! Tua nu sia tuipi tungah a pai teambawte a neite theampo ama ii hauna taw a hausak khuapi ahi hi! Nai khat sung teng in taan siat zo hi!” ci uh hi.

²⁰Vantung awng, ama ii lalna hu in, lungdam in! Pathian ii mihingte, sawltakte le kamsaangte awng, lungdam tavun! Banghang ziam ci le ama ii note hong vawtna hu in, Pathian in ama daan pia zo hi!

²¹Tua zawkciangin vantunglalang a thahat khat in, an ngoaina suang cia a lian suang khat la in tuipi sungah deangsuk a, hi bangin ci hi. “Khuapi lian mama Babylon sia hi bangin kilawn suk tu a, a kimu kik nawn buatu hi.

²²Tengtongh tumna awte le mihing lasaknate, tamngai le lemle tumnate sia nang sungah a kiza ngei nawn buatu hi! Nuntak zonna naseamte nang sungah kuama a kimu nawn buatu hi; an ngoaina suang nging zongh nang sungah a kiza nawn buatu hi!

²³Meiinn taang zongh nang sungah a kimu nawn buatu hi; mo le zi neipa awte zongh nang sungah kiza nawn ngawl tu hi. Na sum vawtte sia leitung theampo ah a hatbelte hi a, na ngual theamna ai taw leitung mihingte theampo na theam siat hi!”

²⁴Kamsaangte le Pathian mite ii chisan le leitung ah a kithatlum theampo ii chisan sia, tua khuapi sungah kimu ahikom Babylon khuapi sia daan kipia hi.