Read Siyin Chin Thupualaakna 2 Bible Online

Thupualaakna 2 - Siyin Chin bible

Thupualaakna 2

¹“Ephesus khua Pawlpi ii vantunglalang tungah hi bangin at in: “Hisia in a khut ziatsang ah aksi sali toai a, khamh meikhuam salite kawm ah a vakpa ii hong kamvaithak ahi hi.

²Na sep teng kong he hi; bangza in haksa mama in naseam a, thin uai takin na om sia kong he hi. Mi ngilote dual thei ngawlin, sawltak hi ngawl napi ka hi uh hi a cite zongh na sit uh a, ahi ngawl uh hunlam na tel zawkciangin, leilot mihingte hi ci in na mu uh zongh kong he hi.

³Note na thin uh uai a, kei atu in thuakin, na thin uh na thasua bua uh hi.

⁴Ahihang note kong mawsakna khat sia hi thu ahi hi. A masa a nong it uh bangin, tu in kei nong it nawn bua uh hi.

⁵Bangza dongin kiamsuk na hi uh sia ngaisun vun! Na mawnate uh panin kisiik vun a, na vawt phit uh sia vawt kik vun. Na mawnate uh pan na kisiik bua uh le, keima note kungah hong pai in, na meivakna uh a omna mun pan kong laaksak tu hi.

⁶Ahihang hisia in note atu phatna hi: keima ngaimawk bangma in, note zongh in Nicolaitans pawlte nasepna na ngaimaw uh hi.

⁷“Bil na nei uh le pawlpite tungah Thaa thusonnate ngai vun! “Pathian ii huan sungah a po nuntakna thingkung ii nga sia, zawna a ngate ii a neak thei natu thu ka pia tu hi.

⁸“Smyrna khua pawlpi ii kamtai vantunglalang tungah hi bangin at in: “Hisia in a masa phitbel le a khakbel ahi, a thisa a nungta kikpa tung pan kam hong vaithak hi.

⁹Na ngimna teng kong he hi; zawng hi ci in kong he hi — ahihang a tatak sia hau nu hi! Jew te khu hi a ci theamte ii no hong siatsonnate ka he hi; amate sia Satan ii neisa honkhat ahi uh hi.

¹⁰Na thuak lai tute a bang po ahizong, lau heak vun. Ngai vun! Doaimangpa in note hong ze etna in, pawlkhat thonginn sung denna in hong nei tu a, na ngimna uh sia ni sawm sung teng hi tu hi. Thi tu keak a kul zong kei tungah hong thumaan tavun, tua hile nuntakna sia zawna tel in kong pia tu hi.

¹¹“Bil na nei uh le pawlpite tungah Thaa thusonnate ngai vun! “Zawna a ngate niivei thina in a susia buatu hi.

¹²“Pergamum khua pawlpi tungah kamtai vantunglalang tungah hi bangin at in: “Hisia in a lang nii hiam namsau a neipa ii hong kam vaithak ahi hi.

¹³Satan ii kumpi tokhum a ngakna munah na teen uh kong he hi. A thumaan ka tetti Antipas sia Satan teenna tua munah a kithalup hun dongin, na upna uh na thasua bua uh a, kei tungah nong thumaan uh hi.

¹⁴Ahihang kong mawsiat nopna pawlkhat om hi: milim biakna an a neak natu le numei le pa paktat natu a kaizotna taw Israel te mawna sung a thengsak Balak tungah thu a hil Balaam thuhilna a zui pawlkhat na om uh hi.

¹⁵Tuasia bangma in Nicolaitans hilna a zui zongh na om uh hi.

¹⁶Tu in na mawnate uh pan kisiik kik vun! Na kisiik kik bua uh le ka kam sung pan a pusuak namsau taw tua mihingte a sim tu in, note kungah hong pai pal tu khi hi.

¹⁷“Bil na nei uh le pawlpite tungah Thaa thusonnate ngai vun! “Zawna a nga mihingte tungah a kiseal manna an pawlkhat ka pia tu hi. Amate khat tek tungah, a saangte ngawl po kuama dang ii heak ngawl minthak a ki at suangpheak khat tek ka pia si tu hi.

¹⁸“Thyatira pawlpi ii kamtai vantunglalang tungah hi bangin at in: “Hisia in, a mittangte meikuang bang hi a, a peangte taau nawtthiang bang ahi Pathian Tapa ii hong kam vaithak ahi hi.

¹⁹Note bang vawt ci sia kong he hi. Na itna, na thumaanna, na nasepna, le na thin uaina ka he hi. A masa na sep uh sangin tu in tamzaw seam ci in kong he hi.

²⁰Ahihang nang kong mawsiat nopna pan: Pathian naseam khi hi ci in a kivawttawm Jezebel numeinu sia dual ni hi. Ama hilna taw ama in ka naseamte lamkhialsakin, milim biakna ante neakna le, numei le pa paktatnate vawtsak hi.

²¹A mawnate a kisiik kik natu hun pia ka hi hang, ama in paktatna pan, kikheal nuam ngawl hi.

²²Tua ahikom tua nu le ama taw palngul mawna a vawtte sia lupna khat tungah, ka lawn tu a nasia takin thuak tu uh hi. Tua numei taw seksolna a vawtte a kisiik kik bua uh le, tu mama in ka ci sa bangin ka vawt tu hi.

²³A nungzuite zongh ka thatlum tu hi, tuasia ciangin pawlpi theampo in kei sia mihing theampo ii ngaisutna le a deina a he siat pa ka hi hunlam hong he tu hi. Note khat tek na ngamtat uh babangin kong thuk tu hi.

²⁴“Ahihang Thyatira a om a dangte in, hi ngitlo kihilnate na zui bua uh a; ‘Satan ii a thuk thukute’ a kicite na tel bua uh hi. Note tungah vanhngit a dang hong suan ngawl tu khi hi, kong ci hi.

²⁵Ahihang kong pai mateng na neisate uh kip takin na kep uh kul tu hi.

²⁶Zawna a ngate le a tawp dong ka dei bang a, a ngamta suakte sia ka Pa tung pan ka nga thuneina ka pia tu hi: minamte thikciang taw a uk natu thuneina ka pia tu a, amate in leibeal bangin amate a bek a bekin tamhthamsak tu uh hi. Amate tungah nikonghong aksi zongh ka pia tu hi.

²⁹““Bil na nei uh le pawlpite tungah Thaa thusonnate ngai vun!