Read Siyin Chin Thupualaakna 21 Bible Online

Thupualaakna 21 - Siyin Chin bible

Thupualaakna 21

¹Tuaciangin vanthak le leithak khat ka mu hi. Vantung masa sia le leitung masa sia bomang zo a, tuipi zongh bo hi.

²Mothak khat a pasal tu taw kimu tu in a kipua bangin vantung Pathian kung panin Khuapi Thiangtho ahi Jerusalem khuathak hong tuaksuk sia ka mu hi.

³Kumpi tokhum pan a ngingin a pau khat ka za hi: “Tu in Pathian omna inn sia mihingte taw omkhawm zo hi! Ama in amate taw teang khawm tu a, ama mihingte a hi tu hi. Pathian mama in amate taw omkhawm tu a, ama in amate ii Pathian ahi tu hi.

⁴Amate mittang sung pan, thitui theampo nawlsak tu hi. Thina, heena, kaana le natnate a om nawn buatu hi. A luisa na theampo bomang zo hi,” ci hi.

⁵Tuaciangin kumpi tokhum tungah a to sia in, “Tu in na theampo a thak in ka vawt hi!” a ci zawkciang kei tungah, “Hi kammalte sia maan a muan thamman ahikom, lai taw at in” hong ci si hi.

⁶Tuaciang ama in, “Kiman zo hi! Kei sia a kipatna le a tawpna ahi a masabel le a khakbel ka hi hi. A dangko theampo tungah man piak ngawlin nuntakna ciktui a neak thei natu thu ka pia tu hi.

⁷Zawna a nga pawpo kei tung pan a saan tu thu in: Kei sia amate ii Pathian ka hi tu a, ama sia Keima tapa ahi tu hi.

⁸Ahihang a lauthauh, ngual leeheakte, zummawk seamte le ngual thatte, a paktatte, bum le ai toaite, milim biate, le a leilot thei theampo — a om natu sia niivei thina ahi meili le kaan sia ahi hi,” hong ci hi.

⁹Ngimna lian khawbeam sali a nei vantunglalang salite sung pan, khat in kei kungah hong pai in, “Hong pai ta'n, mo ahi Tuuno zi kong lak tu hi,” hong ci hi.

¹⁰Thaa in kei hong uk a, vantunglalang in, mualsaang mama khat ii dawn ah hong paipui hi. Ama in Vantung Pathian kung pan a hong paisuk Khuapi Thiangtho ahi Jerusalem khua hong lak a,

¹¹tua khuapi sia Pathian minthanna taw tee ziikzeak a, jasper suangmanpha bangin taangin, crystal suang bangin thiang sitset hi.

¹²Tua khuapi luphung sia saa in saang mama a, kongpi sawm le nii om in vantunglalangte sawm le nii in cing hi. Kongpite tungah Israel minam sawm le niite min ki at hi.

¹³A pangh khat simin kongpi thum veu om hi: thum sia nisuana sangah, thum sia thang sangah, thum sia saksang ah, thum sia nitumna sangah om hi.

¹⁴Khuapi luphungte sia phungkawng tawdap sawm le nii tungah kiciangto a, tuate ii tungah Tuuno sawltak sawm le niite min ki at hi.

¹⁵Kei hong paupui vantunglalang sia in, Khuapi kongpite le a luphungte a tee natu in khamh piciang khat nei hi.

¹⁶Khuapi sia king li nei a, a dung le a vai kikim hi. Vantunglalang in khuapi sia a teena piciang taw tee a: kilometre 2,400 pha in, a dung, a vai le a saanna kikim linlian hi.

¹⁷Vantunglalang in ama zak piciang taw a luphung zongh tee a, metre 60 saang hi.[2]

¹⁸Khuapi luphung sia jasper suangmanpha taw kiciangin, a khuapi mama sia khamh ciitak taw a kivawt hi a, limlangh bangin a thiang sitset hi.

¹⁹Khuapi luphung tawdapte sia suangmanpha namcin taw kivawt hi. A tawdap masa phit sia jasper hi a, a niina sia sapphire hi, a thumna sia agate a cite hi a, a lina sia emerald hi,

²⁰a ngana sia onyx hi a, a lukna sia carnelian hi, a salina sia yellow quartz hi a, a liatna sia beryl hi, a kuana sia topaz hi a, a sawmna sia chalcedony hi, a sawm le khatna sia turquoise hi a, a sawm le niina sia amethyst ahi hi.

²¹A kongpi sawm le niite sia keptang sawm le nii hi a; kongpi khat simin keptang khat taw kivawt hi. Khuapi lampite sia khamh ciitak hi a, maan bangin kimu let thei hi.

²²Topa Vaanglianbelpa Pathian le a Tuuno sia khuapi ii biakinn hi zo ahikom, khuapi sungah biakinn ka mu bua hi.

²³Tuuno sia khuapi ii meiinn hi zo a, Pathian minthanna vaang sia, ama tungah taang zo ahikom, tua khuapi in nitaang le thataang a kisamh bua hi.

²⁴Tua khuavak taang sungah leitung mihingte lampai tu uh a, leitung kumpite in khuapi sungah a nei a lamhte hong paipui tu uh hi.

²⁵Zan om ngawl tu ahikom, kongpite kikhakcip ngeingawl tu a, ni bupin kihong suak tu hi.

²⁶Minamte letna le hauna sia tua khuapi sungah hong kipaipui tu hi.

²⁷Ahihang a thiangtho ngawl, a maizumhuai a ngamtate le leilot theite kuama tua khuapi sungah a tum thei buatu uh hi. Tuuno nuntakna laibu sungah a min a kikhumte bek tua khuapi sungah tum thei tu uh hi.