Read Siyin Chin Thupualaakna 22 Bible Online

Thupualaakna 22 - Siyin Chin bible

Thupualaakna 22

¹Vantunglalang in, Pathian le Tuuno kumpi tokhum kung pan hong luang suk, crystal suang bangin a tee vakil nuntakna nguntui sia hong lak a,

²khuapi sung lampi laizang ah luangsuk hi. Ngun ii a lang le lang ah nuntakna thingkung khat veve po a, tua thingkung sia, tha simin khatvei veu kum khat in sawm le niivei nga hi. Tuaciangin a thingteete sia minamte ciidamsak natu ahi hi.

³Pathian haamsiatna nuai ah a om peuma, khuapi sungah kuama a kimu buatu hi. Pathian le Tuuno ii kumpi tokhum sia khuapi sungah om tu a, a naseamte in ama bia tu uh hi.

⁴Amate in ama ii maitang mu tu a, amate talki tungah a min ki at tu hi.

⁵Zan a om nawn buatu a, amate in meiinn le nitaang kisamh nawn ngawl tu uh hi, banghang ziam cile Topa Pathian sia amate khuavak hi tu a, amate in a tawntung a tawntungin ukna nei kumpite bangin a maang tu uh hi.

⁶Tua zawkciang vantunglalang in, kei tungah, “Hi kammalte sia maan a, muan taak hi. Kamsaangte tungah a Thaa a pia Topa Pathian in hai ngawlin hong piang tu thute, a naseamte tungah lak tu in a vantunglalang sawl zo hi.”

⁷“Ngai vun! Kei, hong pai pal tu khi hi. Hi laibu sungah sonkholnate a zuite in mihing hamphate ahi uh hi,” Jesus in ci hi.

⁸Keima John in hite theampo ka za zo a, ka mu zo hi. Tuaciang ka zaak zawkciang le ka mu zawkciangin, vantunglalang peang ah ka bok a, hi nate hong lak vantunglalang sia bia tu in ka kipan hi.

⁹Ahihang ama in kei tungah, “Kei hong bia heak in! Keima in nangma le na suapuite ahi kamsaangte le hi laibu sungah a om thute a zuite theampo taw naseam khawm khat ka hi hi. Pathian bia in!” hong ci hi.

¹⁰Tuaciang vantunglalang in kei kungah, “Hi laibu sung a ki at thute a tun tu hong nai zo ahikom, iimcip heak in” hong ci hi.

¹¹A ngilo sia in a ngitlo bangin paisuak tahen a, a kiihuai sia in a kiihuai bangin zom suak tahen; a kuama po mihing phate in phatna vawt suak tahen a, a thiangthote in a thiangtho in om suak tahen,” hong ci hi.

¹²Jesus in, “Ngai in! Kong pai pal tu hi. Mihing sim tungah ama ii sepna bangin, ka piak tu thamante kong keng tu hi.

¹³Kei sia a masabel le a khakbel, a kipatna le a tawpna ka hi hi,” ci hi.

¹⁴Nuntakna thingnga neak thei natu le khuapi sungah kongkha kaantan in pai thei natu in a puantual a sawp thiangte in mihing hamphate ahi uh hi.

¹⁵Ahihang lampialte, bum le ai toaite, a paktatte, mihing thatte, milim biate, leilot kampauna le ngamtatna taw ngualtheam theite khuapi puasia ah om tu uh hi.

¹⁶“Keima Jesus in, hi thute pawlpi sung note tungah a thangsak tu in ka vantunglalang kong paisak zo hi. Kei sia David ii zung le a suan ka hi hi; keima in nikonghong aksi taang sia ka hi hi,” ci hi.

¹⁷Thaa le a Mothak in, “Hong pai ta'n!” hong ci hi. A zate theampo zongh in, “Hong pai ta'n!” ci si hen. A dangko theampo hong pai tavun; nuntakna tui a dei peuma in, tua nuntakna tui letsong in saang tavun.

¹⁸Keima John in, hi kamsaanna laibu sungah a kikhumte a sim peuma tungah kidop natu thu ka pia hi: Khat pawpo in a belap le, Pathian in hi thubu sungah a kison ama ii daante tungah ngimnate belap thua tu hi.

¹⁹Tuaciang khat pawpo in hi laibu sungah kamsaanna kammalte a dok le, Pathian in ama sia hi laibu sungah a kison nuntakna thingkung nga le Khuapi Thiangtho pan a nga tu tel teng taansak tu hi.

²⁰Hi thute theampo tetti a pang pa in, “Hi hi, maan hi! Kong pai pal tu hi!” ci hi. Na ci bangma hi tahen. Topa Jesus awng, hong pai ta'n!

²¹Topa Jesus ii thuthiamna sia a kuama po tungah hong om tahen.