Read Siyin Chin Thupualaakna 9 Bible Online

Thupualaakna 9 - Siyin Chin bible

Thupualaakna 9

¹Tuaciang vantunglalang a ngana sia in, a lemle tum hi. Aksi khat leitung ah a taaksuk ka mu a, tua aksi tungah a hawng thukpui sia ii tawtang kipia hi.

²Aksi in a hawng thukpui sia hong a, thik huanna meimang sung panin, a pusuak bangin meikhu pusuak hi; a hawng thukpui sung pan a pusuak meikhu in nitaang le vuite zingcipsak hi.

³Meikhu sung panin khaumaw honte lei ah hong taak uh hi, tuaciang amate tungah aikamte ii nei ngute kipia uh hi.

⁴Thingkungte, lopate ahibuale a kung dang khat pawpo a lalsak ngawl natu in, amate tungah thu kipia hi; Pathian ii tepteena a talki tungah a nei ngawl mihingte bek susia thei uh hi.

⁵Khaumawte in mihingte thisak ngawlin, tha nga hun sung teng ngim pia in, a vawtsiat natu bek thu kipia hi. Ngim piakna taw a vawtsiatna in, aikamte ii hong pe ciang, a bot sia taw kibang hi.

⁶Tua tha nga hun sung teng mihingte in thithei natu lampi a zon uh hang, a mu buatu uh hi; amate in thi nuam tu hikale, thina in amate taisan tu hi.

⁷Khaumawte sia ngalsim tu in a kinging siphute taw kibang uh hi; a lu tungah khamh taw kivawt kumpi lukhute taw a kibangte nei uh a, a maitangte sia mihingte maitang taw kibang uh hi.

⁸A sam uh sia numeite sam taw kibang a, a ha uh sia tawpi ha taw kibang hi.

⁹A awm uh sia thik awmdalna taw a kibangte taw kituam hi, tuaciang a thaphil nging aw in ngal kidona sungah a tai siphu ngalleang tam mamate ii ngin taw kibang hi.

¹⁰Amate in mei nei a, aikam mei bangin hong de thei hi. Tua meite taw amate in tha 5 sung teng mihingte a liamsak natu vaang nei uh hi.

¹¹Amate in a uk kumpipa khat nei uh hi, tuasia pa sia a hawng thukpui a uk vantunglalang hi. Ama ii min sia Hebrew kam in Abaddon hi a, Greek kam in Apollyon hi. (“A Susia pa” a cinopna hi)

¹²Launa a masabel sia bo a, ahihang hisia zawkciangin hong piang tu launa nam nii om lai hi.

¹³Vantunglalang a lukna sia in, lemle tum hi. Pathian mai ah khamh biaknatau sia ii king li panin, aw khat hong nging ka za hi.

¹⁴A awnging in vantunglalang a lukna sia munah, “Eupharates ngun ah a kiheencip vantunglalang li teng tha vun,” ci hi.

¹⁵Vantunglalang li teng kitha hi; tu kum, tu tha, tuni, tu hun lianin mihing theampo ii see thum sua see khat a thalup natu in amate li sia a kingingta sa in kikoi hi.

¹⁶Siphu ngalkap awn zanii om hi ci in hong kison hi.

¹⁷Ka mukholna sungah siphute le a tung tote ka mu hi; amate in awmdalna sia meikuang bangin a san, sapphire suangmanpha bangin vancii, kaan bangin a eng silh uh hi. A siphute ii lutang sia tawpi lutang taw kibang a, a kam sung pan meikuang, meikhu le kaante hong pusuak hi.

¹⁸Mihingte sung pan see thum sua see khat sia siphute kam sung pan hong pusuak ngimna lian nam thum ahi, meikuang, meikhu le kaan in thatlum uh hi.

¹⁹Banghang ziam cile siphute vaangneina sia a kam sung le a mei ah om hi. Amate ii meite sia lu nei ngulte taw kibang a, mihingte a liamsak natu in zangh uh hi.

²⁰Hi ngimna liante ii thalup mong a taanglai mihingte in amate khut taw a vawttawm uh nate panin a kikheal kik nuam bua uh hi. Doai biakna tawp ngawlin, khamh, ngunn, taau, suang le thing milim khuamu thei ngawl, khuaza thei ngawl, lampai thei ngawlte a biak uh zongh a kheal bua uh hi.

²¹Amate in ngual a thalupna, bum le ai toaina, numei le pa paktatna le nguktaknate uh panin a kisiik kik bua uh hi.