Read Siyin Chin Ruth 1 Bible Online

Ruth 1 - Siyin Chin bible

Ruth 1

¹Khua ngeipi hun lai, Israel te ii kumpi a nei ma in, a ngam sungah kialpi hong tung hi. Tua ahikom Ephrath bee le phung sung pan, Judah ngam Bethlehem khua a teang Elimelech a kici pasal khat sia a zi Naomi le a tapate nii, Mahlon le Chilion taw Moab ngam ah tawmvei sung teang tu in pai hi. Tua munah a teen lai in,

³Elimelech hong thi hi, tuaciang Naomi sia Moab numeite Orpah le Ruth

⁴a teenpui a tapate nii taw bek taang hi. Kum sawm bang zawkciang

⁵Mahlon le Chilion zongh thi uh hi, tuaciang Naomi sia pasal ngawl ta ngawl taw taang hi.

⁶Tua zawk tawmvei ciangin, TOPA in ama ii mite sia thupha pia a, an tam mama la hi ci in Naomi in za hi; tua ahikom a mote nii taw Moab ngam nusia tu in kithoai hi.

⁷Judah ngam zuan kik tu in amate kipan khawm tek hi, ahihang lam a pai kawmin

⁸Naomi in amate mun ah, “Cia kik tavun a, na nute uh taw om tavun. Kei tung le a thisate tungah nong thuthiam uh bangma in TOPA in no tungah hong thuthiam tahen.

⁹Tuaciang TOPA in no ngeal sia pasal nei kikin innkuan khat veve nei kik tu in hong siam tahen,” ci hi. Tua ahikom a vaithakna in Naomi in a mote nii namh hi, ahihang amate kap a,

¹⁰“Heak kik ngawl tu khu hi! Nangma taw na mipuite kungah hong zui tu khu hi,” ci uh hi.

¹¹“Ka tanute awng, na heak kik uh kul tu hi,” ci in Naomi in zo hi. “Kei taw banghangin paikhawm nuam nu ziam? Na teenpui tu in tapate vei hing kik thei lai tu hong um nu ziam?

¹²Cia kik tavun, banghang ziam cile kei sia pasal nei kik tu in huai lei zo khi hi. Lam et om lai hi ci ngaisunin tu nitak mama, pasal nei in tapate nei hial leng zong,

¹³a khan ngak zo tu nu ziam? Hi bang taw ngualdang na teenpui tu uh kikhaksak nuam nu ziam? Hi ngawl hi, ka tanute awng, tuabang suak thei ngawl hi ci sia he nu hi. TOPA in kei hong nungngat zo hi, tuaciang no atu in khuangai mama khi hi,” ci hi.

¹⁴Amate kap tu in hong kipan leleau hi. Tua zawkciang Orpah in a to nupi a vaithakna in namh a, tuaciang cia hi. Ahihang Ruth in a thasua nuam bua hi.

¹⁵Tua ahikom Naomi in ama tungah, “Ruth awng, na unu sia a mite le a pathian kung zuan kik zo hi. Ama taw cia khawm ta'n,” ci hi.

¹⁶Ahihang Ruth in, “Nang hong nusiasak heak in. Nangma taw hong paikhawmsak po ta'n. Na paina theampo ah ka pai tu a; na teenna po ah ka teang tu hi. Na mite sia keima mite hi tu a, na Pathian sia ka Pathian hi tu hi.

¹⁷Na thina po ah ka thi tu a, tua mun sia hong kiphumna mun hi tu hi. Thina ngawl buang, kei sia nang taw ka kikhen ta le TOPA in daan nasiabel kei tungah hong tungsak tahen,” ci in zo hi.

¹⁸Naomi in Ruth sia ama taw paikhawm tu in a thin khensat zo ci in a mu ciang a pau nawn bua hi.

¹⁹Bethlehem a thet dong amate paitan uh hi. Amate tua khua a thet uh ciang a khuathing bup liinglawng a, numei te in, “Hi sia Naomi hi takpi ziam?” ci in au uh hi.

²⁰Ama in, “Kei Naomi hong ci heak vun, Marah hong ci tavun, banghang ziam cile Vaanglianbelpa Pathian in ka nuntakna hong haksasak hi.

²¹Hi sung ka nusiat lai in na tam mama ka nei hi, ahihang TOPA in bangma ngawl taw hong ciasak kik hi. TOPA Vaanglianbelpa in hong puanil zo a, ngimna hong pia zo ahiciang banghangin Naomi hong cici lai nu ziam?” ci in zo hi.

²²Moab mi a monu Ruth taw Naomi ii hong ciana sia tu a bang ahi hi. Bethlehem hong thet hun lai in mangtaang at hun a kipat laitak ahi hi.