Read Siyin Chin Ruth 3 Bible Online

Ruth 3 - Siyin Chin bible

Ruth 3

¹Tawmvei zawkciang Naomi in Ruth munah, “Inn tuam taw na om thei natu in pasal khat kong zonsak kul tu hi.

²Nangma nasep pui numeite ii Topa Boaz sia ih mealheak ahi hunlam ciamtee in. Tu in hong ngai ta'n. Nitak ciang ama in mangtaang na cil tu hi.

³Tua ahikom kibualin a, paaknamtui tawm kinoai in, tuaciang na puan phabel teng silh in. Tua zawkciang ama taang cilna ah va pai ta'n a, ahizong a neak a dawn zawk mateng tua munah na om hunlam hesak heak in.

⁴Ama koi sungah lum ziam pha tak ciamtee in, tuaciang a mut zawkciang a puanvan hawk in a, a khuadop ah lum in. Ama in na ngamtat natu teng hong son tu hi,” ci hi.

⁵Ruth in, “Na ci theampo ka vawt tu hi,” ci in zo hi.

⁶Tua ahikom Ruth sia ancilna munah pai in, a tonupi sawl bangin ngamta hi.

⁷Boaz sia a neak a dawn zawkciang a om nuam hi. Ama taangvawng lomte omna ah pai in mu nuam in lum hi. Ruth hong pai vadeen a, a puanvan hawkin ama khuadop ah lum hi.

⁸Zan lai in Boaz thakhatin hong khanglo in, kilumheak a, numei khat a khuadop ah a lum mu in lamdang sa hi.

⁹“Nang akua ni ziam?” ci in dongh hi. “Ruth khi hi, Topa awng. Nang sia mealheak kuung khat na hi ciang kei nong et tu vaipuak nei ni hi. Nong hesuakna in hong teenpui ta'n,” ci in zo hi.

¹⁰“TOPA in nang thupha hong pia tahen. Na tonupi atu na sepna sa te sangin, tu in na ngamtatna taw ih bangkua sungah na thumaanna lian zaw lai hi. A hau a zawng tangval khat po zong thei na hi hang tuabangin zong ngawl ni hi.

¹¹Ruth awng tu in, na thinngim heak in. Nong nget theampo vawt tu khi hi; khua sungah a om a kuama theampo in nang sia numei pha khat na hi sia hong he hi.

¹²Kei sia na mealheak kuung khat hi a, nang tungah vaipuak kong nei na in a maan thu hi, ahihang kei sangin a kuung zaw mealheak pasal khat om hi.

¹³Hi sungah zankhuateakin om vet in a, zingsang ciangin tua pa in nang vaipuak hong la tu ziam, hong la ngawl tu ziam ih en tu hi. Vaipuak hong la tu ahile a dik a pha hi, hong la bua ahile a nungta TOPA tungah kiciamna vawt hi tong, keima in vaipuak la tu khi hi. Tu in hi sungah zingsang ciang dong lum po in,” ci hi.

¹⁴Tua ahikom ama in Boaz ii khuadop ah lum top hi, ahizong ama a kimu ngawl natu in khuavak mahiat in tho hi, banghang ziam cile Boaz in ama tualai ah a om sia kuama in a hesak nuam bua hi.

¹⁵Boaz in ama munah, “Na puantual suut in a, hi sungah pha in,” ci hi. Ama in tuabangin pha a, Boaz in mangtaang kilogramme 20 dektak sun hi, tuaciang a liang ah a puak tu in suanh hi. Tua zawkciang khua sungah a vanh taw ama heak kik hi.

¹⁶Inn a thet ciang a tonupi in, “Bangbang nong hi ziam? ka tanu awng,” ci in dongh hi. Ruth in Boaz ii ama atu in, a sep a vawtsak theampo son hi.

¹⁷A son lai na pan, “Nangma kungah khut hawm nguakin kong cia ngawl natu in hi mangtaang teng zongh hong pia hi,” ci hi.

¹⁸Naomi in ama mun ah, “Tu in na thin sausak in, Ruth awng, hi thu teng koibang ciang hong theng tu ziam na mu dong ngak in. Boaz sia tuni in hi thu a thian mateng om thong ngawl tu hi,” ci hi.