Read Siyin Chin 1 Samuel 10 Bible Online

1 Samuel 10 - Siyin Chin bible

1 Samuel 10

¹Tua zawkciang Samuel in olive thau thawl khat la a, Saul lu tungah buakin ama a nap zawkciang, “TOPA in a Israel mite uk tu in nang sathau hong noai hi. Ama mite nangma uk in, a ngalte theampo kung panin amate na hung tu hi. Tuaciang TOPA ii a mite a uk tu nang hong teal takpina sia hi bangin kilak tu hi:

²Tuni kei nong nusiat ciang Benjamin ngam Zelzah khua Rachel ii thaan ah mihing nii taw na kisi tu hi. Amate in laa na zonte kimu kik zo a, na pa sia tuate atu thinngim nawn ngawl hi, nangma atu thinngim a, hi bangin dok sasaan hi, “Ka tapa vai bang law tu khi ziam?” hong ci tu hi.

³Tabor ah biakna thingkung omna san na thet dong na papai tu a, tua munah mihing thum, Bethel ah Pathian tung sangaw biakpiakna pia tu in a paite taw na kisi tu hi. Tuate khat in kealngual thum kai tu a, a dang khat in anluum luum thum, a thumna sia in savun thawl a dim sapittui pua tu hi.

⁴Amate in nang hong muak in, anluum luum nii hong pia tu a, tuate na saang tu hi.

⁵Tua zawkciang, Philistine te ngiaphual saatna khat a omna, Gibeah ngamsung Pathian Mual ah na pai tu hi. Khua sung tumna ah kamsaang pawlkhat, mualtung biaknatau pan tengtongh, khuang, tamngai le liamlo te tumin hong tuaksuk te taw na kisi tu uh hi. Amate laam in a au tu uh hi.

⁶Thakhat thu in TOPA thaa in nang hong uk in, amate biakna taw kisai a lapna le a auna te na pawm tu a, mihing tuamdang khat na suak tu hi.

⁷Hite hong pian ciangin Pathian ii na vawt tu a hong lampui pawpo sia vawt in.

⁸Keima mai Gilgal ah na paikhol tu a, tua munah ih kimu tu hi, tuaciang meihal sangaw biakpiaknate le pawlkhop sangaw biakpiaknate ka pia tu hi. Keima hong pai in, na sep na vawt tu teng kong son dong ni sali hong ngak tu ni hi,” ci hi.

⁹Samuel nusia tu in Saul a kiheak ciang, Pathian in Saul sia pianzia thak khat pia hi. Tuaciang Samuel son theampo tua ni in piang hi.

¹⁰Saul le a naseampa Gibeah hong thet uh ciang, kamsaang pawlkhat taw kisi hi. Thakhat thu in Pathian thaa in ama uk a, tua ciang amate ii lawp ngawpin a ngualnop lapna le a auna pawm hi.

¹¹Nidang in ama a he ngeite in hi bangin a om a mu uh ciang amate khat le khat kidongh a, “Kish ii tapa bang tawk ziam? Saul sia kamsaang khat suak zo ziam?” ci uh hi.

¹² Tua munah a teang pasal khat in, “Hi kamsaang dangte thu bangbangziam? — a pate sia akua bangte hi tu na um uh ziam?” Hisia sia, “Saul ngawngawn kamsaang khat suak zo ziam?” ci paunak ii kipatna ahi hi.

¹³Saul zongh lawp ngawpin a lap le a au teng a man zawkciang mualtung biaknatau ah paito hi.

¹⁴Saul ii pano in ama le a naseampa mu a, “Koisung theng man nu ziam?” ci in dongh hi. “Laa zong khu hi,” ci in Saul in zo hi. “Ka mu zawk ngawl uh ciang Samuel taw kimu tu in pai khu hi,” ci uh hi.

¹⁵“Tuaciang ama in bang hong ci ziam?” ci in Saul pano in dongh hi.

¹⁶Saul in, “Ama in ngannote kimu zo hi ci in hong son hi,” ci in zo hi — ahihang ama ii kumpipa a suana tu huvau Samuel ii ci teng a pano tungah a son bua hi.

¹⁷Samuel in Mizpah ah mipite biakkikhop khat sam a,

¹⁸tuaciang amate tungah, “TOPA Israel te ii Pathian in, ‘Egypt ngam panin kong pusua pui a, Egypt te le no hong nengniam midang te kung panin kong suatak hi.

¹⁹Keima sia na Pathian ka hi a, noma ngimna theampo le haksatna theampo panin hong suatak pa khi hi, ahihang tuni in hong nial in, kumpipa khat piak tu in nong ngen uh hi. Pha mama hi, tua ahile, TOPA mai ah a nam le a bee a phung zui in hong kikhawm tavun,’ ” ci in son hi.

²⁰Tuasia ciang Samuel in a nam simin mai ah paisak a, TOPA in Benjamin nam tangkal hi.

²¹Tuaciang Samuel in Benjamin namte sung pan a innkuan tek sia mai ah a paisak ciang Matri ii innkuan kiteal hi. Matri ii innkuan pan pasalte a mai ah hong pai a, tuaciang Kish ii tapa Saul kiteal hi. Amate in ama zongin a mu zawk ngawl ciang,

²²amate in TOPA dongh a, “A dang khat ma a om lai ziam?” ci uh hi. TOPA in zo a, “Saul sia zia sungah om hi, vanh honte nungah buu hi,” ci hi.

²³Tua ahikom amate va tai in Saul sia mipite kungah hong paipui uh hi, tuaciang ama sia midang khat pawpo sangin lu tun khat saangzaw in mu thei uh hi.

²⁴Samuel in mipite munah, “Hi munah TOPA ii teal sia pa om hi! Ei sungah ama taw a kibang kuama dang om ngawl hi,” ci hi. Mipite au siat in, “Kumpipa a khansau tahen!” ci uh hi.

²⁵Samuel in kumpipa khat ii sep thei te le a vaipuakte mipite tungah sonthiangin, laibu sungah a at zawkciang a thiangtho mun khat ah koi hi. Tua zawkciang ama in a kuama theampo inn tek ah ciasak hi.

²⁶Saul zongh Gibeah a inn ah cia hi. Pathian ii a lungtang a thuthaak pasal thahat pawlkhat in ama tonpui hi.

²⁷Ahihang mihing mannung ngawl pawlkhat in, “Hi sia pa in ei tungah a pha khat po bangbangin hong vawt thei thong tu ziam?” ci uh hi. Saul sia simmaw in letsong bangma a puak bua uh hi.