Read Siyin Chin 1 Samuel 13 Bible Online

1 Samuel 13 - Siyin Chin bible

1 Samuel 13

²Saul in pasal tulthum teal a, ama in tulnii sia Michmash le Bethel mualtung ngam ah ama taw a om tu in koi a, tulkhat sia a tapa Jonathan taw Benjamin namte ii ngam Gibeah ah puak hi. Tua ngawl teng Saul in a inn tek ah ciasak hi.

³Jonathan in Philistine ngalkap ukpa sia Geba ah that hi, tuaciang Philistine mi theampo in tua thu za uh hi. Tuasia ciang Saul in kamtaite paisak a, ngam bup sungah Hebrew mite ngal sim tu a samna in lemle tumsak kawkoai hi.

⁴Saul in Philistine ngalkap ukpa a thalupna thu, Israel mite theampo kizasak a, tuaciang Philistine te in amate ensan hi; tua ahikom mite in Gilgal ah Saul koppui tu in a sap bangin pai uh hi.

⁵Philistine te sia Israel te sim tu in kikhawmtua uh hi; amate in siphu ngalleang 30,000, siphu ngalkap 6,000 nei a, ngalkapte sia tuipivaal a sen za in tam hi. Amate Bethaven nisuana sang Michmash ah kuanin, tuasung ah ngiaphual saat uh hi.

⁶Tua zawkciang amate in Israel te nasia takin sim a, Israel te a cimaw dinmun ah koi hi. Israel mi pawlkhatte sia suanghawng, leihawng le suangpi kawm ahibuale leidum le tuikhuk sungah buu uh a;

⁷a dangte Jordan ngun kan in, Gad le Gilead te ngamsung zuan uh hi. Saul sia Gilgal ma ah om lai a, ama taw a om mite lau in liing uh hi.

⁸Ama in ni sali sung Samuel ii sawl bangin Samuel ngak hi. Ahihang Samuel sia Gilgal ah hong pai peang bua hi. Mipite in Saul taisan tu kipan uh hi,

⁹tua ahikom ama in amate munah, “Meihal biakpiakna le pawlkhop sangaw biakpiakna ka kungah hong paipui tavun,” ci hi. Ama in meihal sangaw biakpiakna khat vawt a,

¹⁰a man lian laitakin Samuel hong theng hi. Saul in pai in muak a,

¹¹ahizong Samuel in, “Bang vawt thong ni ziam?” ci in dongh hi. Saul in zo a, “Mipite in hong taisan a, kong pai tu na ci bangin hong pai ngawl ni hi; tua banah Philistine te sia Michmash ah kikhawmtua hi.

¹²Tua ahikom, ‘Philistine te in hi sung Gilgal ah kei hong sim tu in om a, tuaciangin TOPA maipha ka nga natu sep ka nei bua hi. Tua ahikom sangaw biakpiakna khat ka piak kul vak,’ ci in ka ngaisun hi,” ci hi.

¹³“Tuasia mawmawt nasep hi,” ci in Samuel in zo hi. “Nang in na TOPA Pathian ii thupiak bangin ngamta ngawl ni hi. A thu ni hi lete nang le na suan na paalte in a tawntungin Israel hong uksak tu hi.

¹⁴Ahizong na ukna sia kizom suak ngawl tu hi. Nangma in a thu ni ngawl na hikom ama ii dei bang mihing zong tu a, a mite uk tu in vawt tu hi,” ci hi.

¹⁵Samuel in Gilgal nusia a, ama pai natu ah pai hi. A dangte in Saul sia a ngalkapte kungah a pai ciang zui uh hi. Amate sia Gilgal pan Benjamin te ngamsung Gibeah ah pai uh hi. Saul in a ngalkap 600 khawng teng sit hi.

¹⁶Saul, a tapa Jonathan le a mite sia Benjamin te ngam Geba ah ngiaphual saat uh hi; Philistine te ngiaphual sia Michmash ah om hi.

¹⁷Philistine te in pawl thum kisua in a ngiaphual tek pan veu in sim uh hi: pawlkhen khat in Shual te ngamkhen Ophrah ah pai uh a,

¹⁸a dang pawlkhat in Beth Horon zuanin, tuaciang a dangkhat te in Zeboim Kuam le duisung a kingalmu theina ngamngi ah pai uh hi.

¹⁹Israel te sungah thikseak kuama a om bua hi, banghang ziam cile Hebrew te ii namsau le tei a nei ngawl natu in Philistine te in nasia takin khak uh hi.

²⁰(Israel te in a hei, a tu, a phiau uh a hiamsak nop ciangin Philistine te kung veu ah pai uh hi.

²¹A hiamsak man sia hei le ngan hawlna ciang dawn ah a kisuan thik ahile ngunn dangkatang khat, lo thawna le tumanh ahile ngunntang tang nii piasak uh hi.)

²²Tua ahikom ngal kido ni in Saul le a tapa Jonathan simngawl ngalkap dangte in namsau le tei a nei bua uh hi.

²³Philistine te in ngalkap pawlkhat Michmash mualciangh cing tu in paisak hi.