Read Siyin Chin 1 Samuel 17 Bible Online

1 Samuel 17 - Siyin Chin bible

1 Samuel 17

¹Judah ngam Socoh khua ah Philistine te ngalsim tu in hong kikhawmtua uh hi; Socoh le Azekah kilaklaw Ephes Dammim a cina mun khat ah ngiaphual saat uh hi.

²Saul le Israel te kikhawmtua in Elah Kuam sungah ngiaphual saat a, Philistine te a do tu in kinging uh hi.

³Philistine te mual khat tungah kingual a, Israel te sia a dang mual tung khat ah kingual in, a kilaklaw ah kuam khat om hi.

⁴Gath khuapi pan Goliath a kici pasal khat Israel te thato tu in Philistine ngiaphual panin hong pusuak hi. Ama sia a tun meter 3 dektak saang a,

⁵kilogramme 57 bang a ngit ngaldalna taaupuan silhin taau lukhu khu hi.

⁶A peangte zongh taau ngaldalna taw tuam a, a liangko ah taau tei khat kua hi.

⁷A teibul sia thiamtana pumlawng cia pha a, a teipalh sia kilogramme 7 bang ngit hi. Ama mai ah lum a puaksak ngalkap khat pai hi.

⁸Goliath ding in Israel te ausan a, “Tuasung ah bang hi nu ziam, ngalsim tu in kingual nu ziam? Saul ii silate awng, kei sia Philistine mi khat khi hi! Na mite khat kei taw kido tu in hong teal tavun.

⁹Ama in kei hong zo in hong thatlum le, ko sia na sila suak tu khu hi; ahihang keima in zo in a ma ka that zo le no sia koma sila suak tu nu hi.

¹⁰Tu mama in Israel ngalkaphonpi hong thato khi hi. Kei taw a kido ngam tu khat hong kidok ka sin vun,” ci hi.

¹¹Saul le a mite in hi thu a zaak uh ciang patau ngawp uh hi.

¹²28 David sia Jesse ii tapa hi a, Judah ngam Bethlehem khua pan Ephrath mi ahi hi. Jesse in tapa liat nei a, Saul kumpi a sep lai hunin ama sia huai mama zo hi.

¹³A tapa lianbel thum te Saul taw ngalsimin kuan zo uh hi. A ubel sia Eliab hi a, a zom sia Abinadab, a thumna sia Shammah ahi hi.

¹⁴David sia a nobel hi a, a ubel thum teng Saul taw a om laitakin,

¹⁵David sia Bethlehem khua ah a pa ii tuute cing tu in cia vazek hi.

¹⁶Goliath in Israel te zing sim nitak sim, ni sawmli sung sitset thato hi.

¹⁷Ni khat ni in Jesse in David munah, “Hi an em min sa kilogramme sawm le anluum sawm teng la in na ute omna ngiaphual ah manlang in va pai ta'n.

¹⁸Tuaciang hi noaikhal sawm teng sia a ngalkap mang pa va puak ta'n. Na ute bangbangin om ziam hong kan ta'n a, amate taw ciidam in na kimuna nong lak natu in bang ziam khat hong ciapui ta'n.

¹⁹Kumpipa Saul, na ute le Israel dang teng sia Elah Kuam ah Philistine te do in om hi,” ci hi.

²⁰A zing ciang zing tuungin David tho in, tuute a en tu mi dang khat vaipuak pia a nguai an heang in, Jesse sawlna ah pai hi. Israel te ngalmai ah ngalsim tu in kuan a, hanla a sam laitakin David theng hi.

²¹Philistine te le Israel te in kido natu mun la a, kimaitua in om uh hi.

²²David in a nguai an teng an zeak ngalkapmang pa aap a, ngalmai ah tai in a ute kungah bangbang na hi uh ziam ci in dongh hi.

²³Ama te a kipaupui laitakin Goliath sia mai ah hong pai a, nidang a hi ngei bangma in Israel te thato hi. Tuaciang David in ama aw za hi.

²⁴Israel te in Goliath a mu uh ciang lau in taikeak uh hi.

²⁵“Ama en vun! A thatona ngai vun! Kumpipa Saul in ama a that zo sia tel lian khat piak tu in kamciam hi; kumpipa in a teenpui tu in a tanu pia si tu a, a pa bangkua zongh phiangshia piasak ngawl tu hi,” ci in amate khat le khat kison uh hi.

²⁶David in ama kung nai a omte munah, “Hi Philistine pa that zo a, Israel mite mindaina pan a suaktasak sia in bang nga tu ziam? A peuma in hi Pathian he ngawl Philistine pa sia akua ka hi ci a, a nungta Pathian ii ngalkaphonpi nalh ngam ziam?” ci in dongh hi.

²⁷Amate in Goliath a that pa ii nga tu teng son uh hi.

²⁸David ii a u lianbel Eliab in David le mite kipaupui na teng za hi. Ama thin uuk a David tungah, “Nang hi sungah bang hong zong ni ziam? Dui sungah na tuute akua in keam tu ziam? Kin ngawl tu teng a kin, nang thong awng! Ngal kido en tu bekin hong pai na hi ziam!” ci hi.

²⁹David in, “Tu in bang vawt na khi ziam? Thu khat beak zongh hong dongh thei ngawl tu khi ziam?” ci in dongh hi.

³⁰Ama in midang khat sang nga in tua teng ma dongh hi, a dok simin tuabang vive ma in kizo hi.

³¹Pawlkhat in David ii pau teng za a, Saul tungah son uh hi, tuaciang Saul in ama samsak hi.

³²David in Saul munah, “Kumpipa awng, hi Philistine pa sia kuama ii kiitak kul ngawl hi! Keima pai in ama do tu khi hi,” ci hi.

³³Saul in, “Hi ngawl hi, bangbangin ama do zo tu ni ziam? Nang sia patang hi lai in, ama sia a khan tawntung ngalkap a seam sa hi!” ci in zo hi.

³⁴David in, “Kumpipa awng, kei sia ka pa ii tuute a keamcing pa khi hi. Tawpi in ahizong vompui in ahizong tuuno khat hong tuasak sim ma in,

³⁵del in ka sim a, tuuno ka suatak hi. Tuasia ciang tawpi ahibuale vompui in kei sang hong zot ciang, a longtawl pan zamh in, ka teak lum hi.

³⁶Tawpite le vompuite ka that zo a, a nungta Pathian ii ngalkap hon a nalh pa, Pathian he ngawl Philistine pa sia tuabang ma in vawt tu khi hi.

³⁷TOPA in tawpi le vompuite panin hong hut sa khi hi; ama in hi Philistine pa khut sung pan hong hun tu hi,” ci hi. Saul in, “Pha hi, va pai ta'n a, TOPA nang taw hong omkhawm tahen,” ci hi.

³⁸Ama ii ngaldalnate David pia a; David lu tungah taau lukhu khusakin, ngaldalna puan silhsak hi.

³⁹David in Saul ii namsau sia a ngaldalna puan tung pan kua in lampai tu a kisin le a pai thei bua hi, banghang ziam cile ama in tuate silh ngeingawl hi. Saul munah, “Hiteng taw kei ngalsim thei ngawl tu khi hi. Kei kingeinasee ngawl khi hi,” ci hi. Tua ahikom tua teng suutsiat hi.

⁴⁰Ama in a tuu cinna ciang la in, lui sung pan suangtang ngil nga tawmin, a thung sungah heang hi. A saili taw a kinging sa in Goliath taw kisi tu in kuan hi.

⁴¹Philistine pa sia David sangah a kalsuan hong kipan a, a lumtoaipa sia a mai ah pai hi. A nai vaial in ama hong pai a,

⁴²Ama in David pha takin a et zawkciang simmawkna taw hong kidim hi, banghang ziam cile David sia a etlawm a mealpha patang khat hi lel hi.

⁴³Ama in David munah, “Na ciang toai sia bang tu ziam? Kei sia ui po hong sa ni ziam?” ci hi. Ama ii pathian min taw David haamsiat hi.

⁴⁴Ama in David thato a, “Hong kuan ta'n, na pumpi sia vacimte le ngamsate neak tu in pia tu khi hi,” ci hi.

⁴⁵David in, “Nang sia kei hong sim tu in namsau, teipi le thikzum taw hong kuan ni hi, ahihang kei ka hile na nalh tawntung sa TOPA Vaanglianbelpa, Israel ngalkaphonpite ii Pathian min taw hong kuan khi hi,” ci hi.

⁴⁶Tuni mama in TOPA in nang sia keima khut sungah hong pia tu hi; kong zo tu a, na lu ka tan tu hi. Tuaciang Philistine ngalkapte luang sia vacimte le ngamsate neak tu in ka pia tu hi. Tuasia tak ciang leitung buppi in Israel ii Pathian khat a nei hunlam he tu hi,

⁴⁷tuaciang hi sungah a om mi sim in, a mite a hut natu in TOPA in namsau le teite kisamh ngawl hi ci in musak tu hi. Ama sia ngalphual ah a zo pa hi a, no teng sia ko khutnuai ah hong koi tu hi,” ci in zo hi.

⁴⁸Goliath in David sang zuan tu in hong kipan leleau hi, tuaciang David sia ama do tu in Philistine ngalmai sangah manlang in hong tai hi.

⁴⁹Ama in a thung sung sawk in, a saili tang la a, Goliath kap hi. Goliath ii talki kha a, a lungu tamh in Goliath sia a khup lam in lei ah puksuk hi.

⁵⁰Tuabangin namsau ngawl taw, saili le suangtang khat taw David in Goliath zo in thatlum hi!

⁵¹Ama tai in Goliath tungah a din zawkciang Goliath ii namsau a paai sung pan dok a, a ngawng tan in that hi. Philistine te in a ngalhang pa thi a mu ciangin taimang uh hi.

⁵²Israel mite le Judah mite au in amate del a, Gath le Ekron kongpite dong zuizen uh hi. Shaaraim paina lampi Gath le Ekron dong lamdung ah Philistine te liamin puk uh hi.

⁵³Israel te in Philistine te a zuizenna pan hong cia kik ciang a ngiaphual phuulsak uh hi.

⁵⁴David in Goliath lutang tawm in Jerusalem ah paipui hi, ahihang Goliath ii ngalhiamte sia ama puanbuk sungah keam hi.

⁵⁵Saul in Goliath taw kido tu in a pai David a mu ciang, a ngalkaphonpi ukpa Abner munah, “Abner awng, ama akua tapa ziam?” ci in dongh hi. Abner in, “Kumpipa awng, akua tapa ziam ngaisun zo ngawl khi hi,” ci in zo hi.

⁵⁶Saul in, “Tua ahile va kan ta'n,” ci in thupia hi.

⁵⁷Tua ahikom Goliath thatlum zo a, ngalphual ah David hong heak kik ciang in, Abner in Saul kungah paipui hi. David in Goliath lutang pua nginge lai hi.

⁵⁸Saul in, “Tangvalpa awng, nang akua tapa ni ziam?” ci in dongh hi. David in, “Bethlehem khua mi na naseampa Jesse ii tapa khi hi,” ci in zo hi.