Read Siyin Chin 1 Samuel 18 Bible Online

1 Samuel 18 - Siyin Chin bible

1 Samuel 18

¹Saul le David a thuson man zo hi. Tuasia zawkciang Saul ii tapa Jonathan sia David tungah nasia takin a lung tu a, ama le ama a ki it za in David hong it hi.

²Saul in David sia tua ni pan kipan keam in, a inn ah a cia kiksak nawn bua hi.

³Jonathan in David it mama ahikom a tawntung kilawmtat natu in kiciam hi.

⁴Ama in a puantual silh lai sia suutin David pia hi, tua taw kikop in a ngaldalna puan, tuaciang a namsau, a thal le a kawngkhaute zongh pia hi.

⁵David sia Saul ii puakna po ah a nasep theampo zo ahikom Saul in ngalkap mang khat in koi hi. Hisia in Saul ii ngalkap bute le a mite lungkimsak hi.

⁶David in Goliath a thalup zawkciang hong heak kik a, tuaciang ngalkapte inn ah hong cia kik laitakin Israel ngamsung khua theampo pan numeite in Saul kumpipa muak tu in hong pai uh hi. Amate lungnopna late sa in laam a, daalkual khuangnote le liamlote tum uh hi.

⁷A poai vawtna sungah numeite in lasa in, “Saul in a tul in that a, ahihang David in a tulsawm simin that hi,” ci uh hi.

⁸Saul in hisia diksa ngawl a, a thin uuk mama hi. Ama in, “David atu in amate in a tulsawm simin that ci a, kei ciang a tul simin that hong ci bek hi. Amate in a kik ciang ama sia kumpipa suaksak tu hi!” ci hi.

⁹Tua hi a, tua ni pan kipan sia ama in David eang a, telkhial vilvel hi.

¹⁰A zing ciang Pathian kung pan thaa ngilo khat in thakhat thu in Saul hong uk a, a inn sungah a thin amh khat bangin kitom ngawp hi. David sia ni simin a tum ngei tengtongh tutum a, tuaciang Saul sia tei khat toai hi.

¹¹Saul in, “Pang taw cipin ama khaw let tong,” ama le ama kici a, ama in a tei taw niivei khaw hi; ahihang David in a khaw sim ma in pial hi.

¹²Saul in David kiita hi, banghang ziam cile TOPA in David ompui a, ama nusia hi.

¹³Tua ahikom Saul in ama sia, a khualana ah ngalkap tulkhat uk tu in paisak hi. David in a mite ngalsimna sungah lampui a,

¹⁴tuaciang a sim theampo zo hi, banghang ziam ci le TOPA in ama ompui hi.

¹⁵David ii zawnate Saul in heaksak a, kiita seseam hi.

¹⁶Ahihang Israel le Judah ngam a mihingte theampo in David it uh hi, banghang ziam cile tuabangin nasep a zo lampui thiam khat ahi hi.

¹⁷Tua zawkciang Saul in David munah, “Hi sungah ka tanu u zaw Merab om hi. Ngalhang le ngalkap thumaan khat bangin keima na, hong sepsak in, TOPA ii ngal dosak po lete na zi tu in ama hong pia tu khi hi,” ci hi. (Saul in ama ii David a thalup kul ngawl a, Philistine te ii hi bangin thalup tu in a ngaisun hi.)

¹⁸David in, “Kei akua hi a kumpipa ii maakpa ka sua natu ka bangkua bang hi na ziam?” ci in zo hi.

¹⁹Ahihang David atu Merab sia mo in thaak tu hun hong thet peetma ciang Meholah pan Adriel ci pasal khat kipia zaw hi.

²⁰Saul ii tanu Michal ahile David taw ki it a, hi thu Saul in a zaak ciang lungkim hi.

²¹Ama le ama hi bangin kici hi, “Michal sia David ka pia tu a; ama thaang ka sia natu ka tanu zangh tu khi hi, tuasia ciang Philistine te in ama thatlum tu hi.” Tua ahikom Saul in David munah a nii veina in, “Nang sia ka maakpa hi tu ni hi,” ci hi.

²²A ngalkapmangte in ama munah hi bangin ci kusak hi. “Kumpipa sia nang tungah lungkim a, tuaciang a ulian theampo in nang dik hong sa hi; tu laitak sia a tanu na teenpui tu hunpha hi,” ci uh hi.

²³Tua ahikom amate in David munah tu a teng son uh hi, tuaciang ama in, “Bangma a thupi sim thamman ngawl mizawng kei bang atu kumpipa ii maakpa sua tu sia kithupi vawtna lian lei hi,” ci in zo hi.

²⁴Uliante in Saul munah David ci teng a son uh ciang,

²⁵Saul in amate thupia in, “Kumpipa ii nang tung pan a dei mo man sia, a ngalte tung a phulam na in, Philistine mithi zakhatte ii vunteap hi,” cisak hi. (Hi sia Philistine te in David a thalup thei natu Saul ii ngealna ahi hi.)

²⁶Saul ii uliante in Saul pauna teng David tungah son kik a, David sia kumpipa maakpa a sua tu ngaisun in a lungdam hi. Kiteen tu ni a see ma in,

²⁷David le a mite kuan in Philistine te 200 thatlum uh hi. Ama in kumpipa mai ah amate vunteap teng paipui in a maakpa a sua thei natu in a mai pan sim siat hi. Tua ahikom Saul in a tanu Michal sia David taw kiteang tu in a piak kul hi.

²⁸Saul in David taw, TOPA omkhawm a, a tanu Michal zonghin David it ci in telthiang hi.

²⁹Tua ahikom ama in David kiita seseam a, a nuntak lai teng ngal in nei hi.

³⁰Philistine ngalkaphonpite hong pai in sim bul hi, ahihang kidona theampo ah David sia Saul ii ngalkap mang dangte sangin ngalzo thei zaw hi. Ta sia taw kizui in David hong minthang mama hi.