Read Siyin Chin 1 Samuel 19 Bible Online

1 Samuel 19 - Siyin Chin bible

1 Samuel 19

¹Saul in a tapa Jonathan le a uliante theampo tungah David thalup tu a ngealna son hi. Ahihang Jonathan in David it mama ahikom,

²ama munah, “Ka pa in nang hong thatlum tu in hanciam hi. Zingsang ciangin kidawm in; kuama heak ngawlna mun khat ah buu in a, tuak ah om top in.

³Na bukna lo sung ka pa kungah pai in ka ding tu a, nangma ii thu ka son tu hi. Thu thak khat pawpo ka mu le kong hesak tu hi,” ci hi.

⁴Jonathan in Saul tungah David pok in, “Topa awng, na naseampa David tungah khial tha heak in. Ama in nang tungah hong khial ngeingawl hi; tuabang hi kana teng ci bua hing, a sep a vawt theampo nangma atu hu na lianpi vive hi.

⁵Goliath a thalup lai zongh in, ama ii luangkhaam a, tuaciang TOPA in Israel te atu zawna lianpi nga hi. Tua na mu ciangin na lungdam hi. Tua ahile banghangin, a maw ngawl khat tungah tu in khialna vawt nuamin, bangma a thu om ngawl bul David thatlum nuam ni ziam?” ci hi.

⁶Jonathan ci teng Saul in tel thei a, David that ngawl tu ci in TOPA min taw kiciamna vawt hi.

⁷Tua ahikom Jonathan in David sam a, a thu theampo son hi; tuaciang Saul kungah ama paipui in a sep maksak lai bangin David in kumpipa na seam hi.

⁸Philistine te taw ngal hong piang kik hi. David in sim a, nasia takin zo ahikom, amate taikeak uh hi.

⁹Ni khat ni in TOPA kung pan thaa ngilo khat in Saul uk hi. Ama sia a inn sungah tei khat toai in to a, tuaciang David sia tengtongh tumin tua munah om hi.

¹⁰Saul in David sia pang taw cipin a tei taw khaw hi, ahihang David in pial in a tei sia pang tungah po hi. David tai in suakta hi.

¹¹Tua zan ma in Saul in pasal pawlkhat David inn encik tu le zingsang ciang ama thatlum tu in paisak hi. David ii zi Michal in a kidop natu in sonkhol a, “Tuni tak na kiheam buale zingsang ciang thi tu ni hi,” ci hi.

¹²A zi in khelki panin khiasuk a, ama tai in suakta hi.

¹³Tua zawkciang Michal in a innkuan ii biak milim sia la in, lupna tungah a sial zawkciang, kealmul taw a kivawt lukham khamhsak in sitna khat taw siin hi.

¹⁴Saul ii mite in David that tu in hong pai uh ciang, Michal in ama a ciina hi ci hi.

¹⁵Ahihang Saul in paisak kik a, amate mama ii David a etcian natu thupia hi. Ama in, “A lupna taw hi sungah hong zawng tavun, keima that tu khi hi,” ci in thupia hi.

¹⁶Amate inn sungah pai kik a, lupna tungah innkuan ii biak milim sia kealmul lukham khamhin a om mu uh hi.

¹⁷Saul in Michal munah, “Banghang hi bangin kei hong theamin, ka ngalpa suaktasak ni ziam,” ci in dongh hi. Ama in, “A suatak natu hu bua leng, kei kong that tu hong ci hi,” ci in zo hi.

¹⁸David suakta in Ramah khua, Samuel kungah pai in Saul ii ama a vawtna te a vekpi in son hi. Tua zawkciang ama le Samuel sia Naioth ah pai in tua munah taam uh hi.

¹⁹David sia Ramah khua sung Naioth ah om hi ci in Saul tungah kison hi,

²⁰tua ahikom ama man tu in mihing pawlkhat paisak hi. Amate in Samuel a lampui in nei a, kamsaang honkhat laamin au in a om mu uh hi. Tuasia ciang Pathian thaa in Saul ii mite uk a, amate zongh a lap a au hong kipan uh hi.

²¹Saul in hi thu a zaak ciang kamtai pawlkhat pai thuasak a, amate zongh laam tu au tu in hong kipan uh hi. Ama in kamtaite a thum veina paisak a, amate zongh tuabang ma in ngamta uh hi.

²²Tuaciang ama mama Ramah ah pai tu in vai ding hi. Secu ah tuikhuk lian khat a thet ciangin Samuel le David koi sungah om ziam, ci in dongh a, amate Naioth ah om hi ci in kison hi.

²³Ama tuak sangah a pai ciang Pathian thaa in ama zongh uk a, Naioth dong lam tawntung laamin au hi.

²⁴Ama in Samuel omna ah a puan suutin laam in au a, a pumnguak in tua ni le tua zan lum hi. (Hisung panin, “Saul ngawngawn kamsaang suak zo ziam?” a ci paunak hong piang hi.)