Read Siyin Chin 1 Samuel 20 Bible Online

1 Samuel 20 - Siyin Chin bible

1 Samuel 20

¹Tua zawkciang Ramah khua Naioth panin David tai a, Jonathan kung zuan hi. Ama in, “Kei a bang vawt na khi ziam?Bang khialna lian vawt khi ziam? Na pa tungah bang tat khialna ka nei hu in kei hong that nuam liang ziam?” ci hi.

²Jonathan in, “Pathian in na thi tu oai ngawl hi! Thupi kale thupi ta buale, ka pa in a sep a vawt theampo kei hong son a phualseal ngeingawl tu hi. Tuabang ma hi ngawl ziam?” ci in zo hi.

³Ahizong David in, “Kei bangza in hong it na hi sia na pa in tel mama hi, tuaciang na pa in a ngealnate nang hong heaksak ngawl natu khensat zo hi, banghang ziam ci le nasia takin na thinna tu hi. A nungta TOPA taw kiciam ngam in kong son nop pan, kei sia ka thi natu kal khat bek in samh hi!” ci in zo hi.

⁴Jonathan in, “Nangma uk babangin seam tu khi hi,” ci hi.

⁵David in, “Zing ciang sia Tha Thak Poai ni hi. Tuaciang kei sia kumpipa taw an nekhawm tu in hong kingaisun hi. Ahizong nangma in phamaw na sa bua nale lo sungah pai in thai nitak sang dong buu tu khi hi.

⁶Na pa in sabuai ah ka to ngawl hunlam hong phawk le Bethlehem khua ah a innkuan bup atu in kumcin sangaw biakpiakna vawt tu hun ahi hu in kei tungah manlang takin a cia natu hong ngen hi ci in na son in.

⁷Ama in, ‘Pha hi,’ a ci le kei ngammuang tu khi hi; ahihang ama hong thin uuk le kei hong susia tu in khensat ahi sia na he tu hi.

⁸Nong hesuakna in, hi a thiangtho kamciamna kei tungah nong piak sia na kho let in. Ahizong keima mama a maw ka hile nangma in hong thatlum ta'n. Banghangin na pa ii hong thalup tu in hong paipui tu ni ziam?” ci in zo kik hi.

⁹Jonathan in, “Tuabangte ngaisut zongin nei vet heak in! Ka pa in nang hong susia nuam ci in he tatak leng hong son ngawl tu khi ziam?” ci in zo hi.

¹⁰Tuasia ciang David in, “Tua ahile na pa ii thin uuk awsua taw hong zo le hong zo ngawl sia akua in kei hong hesak tu ziam?” ci in dongh hi.

¹¹Jonathan in, “Lo sungah pai ka tawng,” ci in zo hi. Tuabangin amate pai uh hi,

¹²Jonathan in David munah, “Israel ii TOPA Pathian sia ih tetti hi hen! Zing ciang, hi hun le a zing kik ciangin ka pa dongh tu khi hi. Ama ii nang hong ngaisutzia a pha le kong zasak tu hi.

¹³Ama in nang, suksiat hong sawmin, tua thu kong hesak bua a, kong suaktasak buale TOPA in kei hong vaatlum tahen. TOPA sia ka pa taw a omkhop bangin nang taw zong hong omkhawm tahen!

¹⁴A nungta in ka om le, a thiangtho na kamciamna keam in a, kei tungah hong thumaan ta'n; ahihang ka thi le,

¹⁵ka innkuanpuite tungah tuabang thumaanna na lak tawntung in. Tuaciangin TOPA in na ngalte a vekpi in a maaimot zawkciang,

¹⁶ei ii khat le khat tungah ih kamciam sia peal ngawlin kho lai tahen. Tuasia na ciampeal le Pathian in nang daan hong pia tu hi,” ci hi.

¹⁷Khatvei ma Jonathan in ama a it natu David in kamciam piasak kik hi, banghang ziam cile Jonathan in David sia ama pumpi a it za in it hi.

¹⁸Tuaciang Jonathan in, “Zing ciang Tha Thak Poai ahiciang an neakna ah om buale teh, na om ngawl hunlam kician tu hi.

¹⁹Thai ciangin na om ngawl hunlam kitel seseam tu hi; tua ahikom va pai in tu nung a na bukna suang kholna lia ah na buu in.

²⁰Tua suangkhol sia phutuun bangin thaltang tang thum taw kong kap tu hi.

²¹Tuaciang ka naseampa munah tua thaltangte zongin ka sawl tu hi. Tuaciang ama munah, ‘En in, thaltangte nangma ii hi sangah om hi, tawm in,’ ka ci le nangma ngammuang takin hong pusuak thei tu ni hi. A nungta TOPA taw ka kiciam hi, na lau tu bangma om ngawl tu hi.

²²Ahihang ama munah, ‘Thaltangte nangma ii langkhat ah om hi,’ ka ci le na tai in, banghang ziam ci le TOPA in nang hong kiheamsak ahi tu hi.

²³Eima khat le khat kamciam ih kipiakna sia TOPA in ih kepcing tawntung natu in hong piangsak tu hi,” ci hi.

²⁴Tua ahikom David sia lo sungah buu hi. Tha Thak Poai ah Saul kumpipa anneakna ah hong pai a,

²⁵tuaciang ama to ngeina mun pang hui ah to hi. Abner sia ama kungah to a, Jonathan sia ama taw kimaingat in to hi. David tona sia awng thong hi,

²⁶ahihang tua ni in Saul in bangma son ngawl hi, banghang ziam cile, “Ama bang khat po tat hi tha tu hi, tuaciang a zeksa ngeina taw kisai in thiang ngawl po zongh hi thei tu hi,” ci in ngaisun hi.

²⁷Tha Thak Poai khuavak ni in, David ii tona awngthong lai a, tuaciang Saul in Jonathan munah, “Banghangin David in zeini zongh, tuni zongh an ne tu in hong pai ngawl ziam?” ci in dongh hi.

²⁸Jonathan in, “Bethlehem khua ah a pai natu in kei munah hong ngen hi.

²⁹Ama in, ‘Nong hesuakna in hong paisak ta'n, banghang ziam cile ka innkuan uh in sangaw biakpiakna poai khua sungah vawt tu khu hi, tuaciang ka suapuipa in tua munah om tu in thu hong pia hi. Tua ahikom ka ngualtamh na hi le hong paisak ta'n a, ka mealheakte taw hong kimusak ta'n,’ hong ci hi. Tua hu in ama sia na sabuai ah om thei ngawl hi,” ci in zo hi.

³⁰Saul sia Jonathan tungah a thinso a, “Bangza ta in na nu in ngual langpan a thumaan ngawl ziam! Tu in David sangah pang na hi sia hong tel khi hi, tuaciang nangma le tua na nu min daisak ni hi!

³¹David nuntak lai teng nang sia bangma hun hi ngam ii kumpipa suak ngeingawl tu na hi hunlam na he ziam? Tu in va pai ta'n a, hi sungah ama hong paipui ta'n — ama a thi kul hi!” ci hi.

³²Jonathan in, “Banghang thi liang tu ziam? Ama in bang seam na ziam?” ci in zo kik hi.

³³Tuasia ciang, Saul in Jonathan that nuamin tei taw khaw hi, tuaciang Jonathan in a pa ii David a thalup nop takpi hunlam tel hi.

³⁴Jonathan thin uuk mama in sabuai pan dingto a, tua ni bup bangma ne ngawl hi — tuasia Tha Thak Poai a ni nii ni ahi hi. David huvau in ama nasia takin a thinnuam ngawl hi, banghang ziam cile Saul in ama zawnsak vawt hi.

³⁵A zingsang ciangin a thukim sa om bangma Jonathan sia David taw kisi tu in lo sungah pai hi. Ama in patang khat pai pui a,

³⁶tuaciang ama munah, “Thaltang ka kaa tu sia tai in va zong ta'n,” ci hi. Patang sia tai a, Jonathan in a thaltang khat patang ii mai a kalh tu in kap hi.

³⁷Patang pa in a thaltang tukna a thet ciang Jonathan in oksan a, “Thaltang sia a khuala zawna ah tu hi!

³⁸Tua munah ding top heak in! Manlang in!” ci hi. Patang no sia thaltang tawmin a topa kungah heak kik hi,

³⁹a topa cinopna theampo a tel bua hi; Jonathan le David bek in he uh hi.

⁴⁰Jonathan in patang sia a ngalhiam pia a, khua sungah ciapui in sawl hi.

⁴¹Patang ii a nusiat zawkciang, David sia suangkholna nung panin dingto a, hong khupdin in a maitang lei pha in thumvei hong kun hi. Jonathan le ama kinamh in kap khawm uh hi; David ii khuangaina sia Jonathan aa sangin nasia zaw lai hi.

⁴²Tua zawkciang Jonathan in David munah, “Pathian nang taw hong om tahen. TOPA in nang le kei, nang ii suan le paalte le kei aa te khat le khat tungah a thiangtho kamciam ih vawt sa te hong keamcingsak thei tahen,” ci hi. Tua zawkciang David in nusia a, Jonathan sia khua sung zuan kik hi.